Davidi akwila Saulo kyombo.
24
1 Nu gasubizie Saulo ku baFilistini, bamubwide bunee: “Ungwilila, Davidi eseli mu kalula ka Engedi.” 2 Nu Saulo endile na tununu tusatu (3.000) twa bantu basombwedwe mu Israeli unsania kulonda Davidi nu bantu bage ku miduko zamaninwe Bilimba bya Mpene za mu Lubanda. 3 Gaabasile ku mikolo za makozi ma mikoko zabezaga mu ntungo mwa nzila, gago gabezaga kalimba; Saulo eingide muko kumunwa. Davidi nu bantu bage babezaga beikala kuzinda kalimba kongo. 4 Bantu ba Davidi bamutendile bunee: “Su, lelo u busi bubo bwakubwide Yehowa bunee: ‘Ungwilila, nakasane mwiti wobe ku kuboko kwobe nu wamukite anga buukutunda.’” Tondo Davidi azanzukile nu asesile bukebuke ku mwimbo wa nsulu za Saulo.
5 Tondo kumbusa, eibezizie mu mutima kubuno asesile ku mwimbo wa nsulu za Saulo. 6 Nu abwide bantu bage bunee: “Yehowa andange nsikite kikino kitondo ku mukota wane, kya kubika kuboko kwane kweli, kubuno eli mubongibwa wa Yehowa.”
7 Bubo u bwananizie Davidi bantu bage na mamo moki nu ntazigile buno beite Saulo. Saulo azanzukile, atukile mu kalimba nu abasile mu nzila. 8 Kusila Davidi azanzukile, atukile mu kalimba nu amanine Saulo bunee: “Ee, mukota, mwangati wane!” Nu Saulo akebetukile. Davidi akumbamizie malanga mage gansi nu idambikile bukukama gansi.
9 Davidi abwide Saulo bunee: “Kubuni kuukungwililaga ku moki ma bantu bakutenda bunee: ‘Lola, Davidi akutunda kukubabazia?’ 10 Ntukumona, lelo meiso mobe mamona bwakukasenne Yehowa ku kuboko kwane mu kalimba. Bantendile buno nikwite tondo nakukwilide kyombo. Nu natendile bunee: ‘Nsyabike kuboko kwane ku mukota wane, kubuno eli mubongibwa wa Yehowa.’ 11 Tatane, ntukumona, lola tanga mwimbo wa nsulu zobe guli mu kuboko kwane. Ku kabamba ka buno nasesile ku mwimbo wa nsulu zobe nu nsyakwitile, menya nu songolola buno takuli bubi aba bwagi mu kuboko kwane, nu nsyakwagide. Tondo uwe ukulonda kalamo kane kukatikya. 12 Yehowa atule gatusamba nobe, nu Yehowa ansube kuguli. Tondo kuboko kwane takwakwite. 13 Anga bukutenda musumo wa bakulu: ‘Ku bagi u kukutukaga bwagi.’ Tondo kuboko kwane takwakwite. 14 Mukota wa Israeli avule kuyanga nazi? Ukuyangana na nazi? Ndi mboa zakule? Ndi sela? 15 Ububo Yehowa abe ngatu nu atule gatusamba nobe. Lebelebe amone nu antendele ku kitondo kyane nu anonie ku kuboko kwobe.”
16 Gasilile Davidi kutenda mamano moki ku Saulo, Saulo abwide bunee: “Mwana wane Davidi, ndi iyuki lyobe lilyo?” Nu Saulo alalukile nu alilile. 17 Nu abwide bunee: “Uli wisanana kuntinga, kubuno wankitide busoga nu nne nakusubizia bubi. 18 Nu uwe walolesia lelo buno ukunkitilaga busoga, kubuno Yehowa ambikile mu kuboko kwobe nu ntwanitile. 19 Kubuno ndi muntu asanga mwiti wage ndi anamusiga kwenda bulonge bukata? Yehowa akusubizie busoga ku buwankitila lelo. 20 Nu kano kaluma nizi lebelebe wangate, nu bukota bwa Israeli bwalindibwe mu kuboko kwobe. 21 Kano kaluma ndumbilile mu Yehowa buno ntwazikye kibuti kyane kumbusa kwane nu ntwazimizie izina lyane mu numba za tatane.”
22 Nu Davidi alumbilide bubo ku Saulo; kusila Saulo endile kwage ku numba, nu Davidi nu bantu bage babakamine ku kiziki kyalanga.