Davidi onia bantu ba ku Keila.
23
1 Nu batendile Davidi bunee: “Ungwilila, baFilistini bakwitana na baKeila nu bakunyaga bili ga milungu za kususulila.” 2 Davidi abuzizie Yehowa bunee: “Ndi nende? Ndi nite babano baFilistini?” Nu Yehowa akwide Davidi bunee: “Enda. Wite baFilistini nu wonie Keila.”
3 Bantu ba Davidi bamutendile bunee: “Ungwilila, tukukua boba gano mu Yuda, embe lino ndi tukwenda ku Keila kwitana na mayombo ma baFilistini!” 4 Ku bubo Davidi abuzizie Yehowa lingo, nu Yehowa amwakwide bunee: “Zanzuka, gela ku Keila kubuno nakasenne baFilistini mu kuboko kwobe.”
5 Davidi nu bantu bage bendile ku Keila. Beitenne na baFilistini, batikizye bituganwa byabo nu beitile beingi kubeli. Ububo Davidi onezie beiya ku Keila. 6 Nu gatinine Abiatari mwana wa Ahimeleki ku Davidi ku Keila, akumbile na efodi mu kuboko. 7 Gabasambalide Saulo buno Davidi eingide mu Keila, abwide bunee: “Kalaga amukasenne mu kuboko kwane. Akatwa, bweingila mu mwino guli na nibi nu mpimbitoa.” 8 Nu Saulo amanine bantu bansania ku bita buno bagele ku Keila kukubizia Davidi nu bantu bage.
9 Nu gamenyine Davidi buno Saulo einine kumukita bubi, abwide Abiatari, sankoga bunee: “Vwa kuno na efodi.” 10 Nu Davidi abwide bunee: “Ee, Yehowa, Kalaga wa Israeli, mukiti wobe ongule lebelebe buno Saulo akukengela kuvwa ku Keila kuzikya mwino ku kabamba kane. 11 Ndi bantu ba Keila bangabule ku kuboko kwage? Ndi Saulo agele anga bongule mukiti wobe? Ee,Yehowa, Kalaga wa Israeli, nkukusega utende ku mukiti wobe.”
Nu Yehowa abwide bunee: “Agele.”
12 Nu Davidi abuzizie lingo bunee: “Ndi bantu ba ku Keila bangabule gamozi na bantu bane ku kuboko kwa Saulo?”
Nu Yehowa abwide bunee: “Bakugabule.”
13 Ububo Davidi nu bantu bage, bwigi na bantu nkama mutuba, batukile ku Keila nu bendile ku kiziki na kiziki kibavwamine kwenda. Gabasambalide Saulo buno Davidi atinine kutuka ku Keila, ntendile lingo.
Saulo akulonda Davidi mu kalula.
14 Davidi asigede mu kalula mu kiziki kyalanga. Eikede mu mwiduko mu kalula ka Zifu. Saulo amulondaga ku bindi byage binsania tondo Kalaga ntakasenne Davidi ku kuboko kwage. 15 Davidi amonine buno Saulo avule kumwita.
Geikede Davidi mu kalula ka Zifu mu lubanda, 16 Yonatana mwana wa Saulo endede Davidi mu lubanda nu amukokomezizie mu Kalaga. 17 Amutendile bunee: “Ntukue boba, kubuno kuboko kwa tatane Saulo takwakusange; wangate Israeli nu nabe wa kunsi kwobe. Tatane Saulo eizi bubo u bwabe lebelebe.” 18 Nu bakitile idagano bobabili lwabusio lwa Yehowa. Davidi eikede mu lubanda nu Yonatana asubizie kwage ku numba.
19 Bantu ba ku Zifu bendile ku Saulo mu Gibea kutenda bunee: “Ndi Davidi ntebisa kweitu mu biziki byalanga, mu lubanda, nu mu mwiduko wa Hakila guli ku lulenge lwa kwidume lwa Yesimoni? 20 Ee mukota, kano kaluma gela anga bukutunda mutima wobe. Gela nu twamukasane mu kuboko kwa mukota.”
21 Nu Saulo abwide bunee: “Yehowa amukase mponga kubuno mwankwila kyombo. 22 Endazi mutitike nu kusongolola nunsania, mumone geli masindi mage; mumenye nazi wamumonine ko gago kubuno bambwide buno eli mwenge nunsania. 23 Mumone nu kusongolola biziki binsania byakwibisa mubyo. Subyazi kundi na bumwamone nunse kubo, nu nende n'inyu, nu ndi eikili mu kikyo kisi, namulonde mu tununu tunsania twa baYuda aaba nu ganamumone.”
24 Bazanzukile nu bendile ku Zifu lwabusio lwa Saulo. Nu Davidi nu bantu bage babezaga mu kalula ka Maoni, mu Araba ku lulenge lwa kwidume lwa Yesimoni. 25 Saulo nu bantu bage bendile kumulonda. Gabasolede Davidi, agelile ku ikozi lili mu kalula ka Maoni. Gongule Saulo ku bubo ayangile Davidi ku kalula ka Maoni. 26 Saulo nu bantu bage bendile ku lulenge lumozi lwa mwiduko nu Davidi nu bantu bage ku lungo lulenge lwa mwiduko. Davidi asasizie buno ntamoneke ko na Saulo. Nu Saulo nu bantu bage batimbikanizie Davidi nu bantu bage, babakate. 27 Tondo mugenzi wavwilide Saulo kutenda bunee: “Sasia kuvwa, kubuno baFilistini bavule kunyaga kisi.” 28 Nu Saulo alekede kuyanga Davidi nu endile kukulumana na baFilistini. Ububo bamanine kikyo kiziki Sela-Hamalekoti (bwisulilwa buno Ikozi lya Malekanuko). 29 Davidi abakamine kutuka gago nu eikede mu biziki byalanga bya Engedi.