Kalimba ka Adulamu.
22
1 Davidi atukile kuko nu atinine ku kalimba ka Adulamu. Mibuto zage zongule, nu bansania ba numba z'isi, nu bagelile kuko kweli. 2 Nu bansania babezaga na tubebe nu babezaga na nsombi nu babezaga na lubaba ku mutima, bakundamenne nage, nu Davidi abede mukota wabo wa bita. Kwabezaga bwigi na bamulume nkama inazi gamozi nage. 3 Davidi atukile kwenda ku Misipa wa Moabu. Abuzizie mukota wa Moabu bunee: “Ndi ntunaziga tatane nu mmane kuvwa kwikala gamozi nobe aaba nu nasongolola kyankitile Kalaga?” 4 Avule nabo lwabusio lwa mukota wa Moabu nu beikede nage bindi binsania byabezaga Davidi ku kiziki kyalanga.
5 Mulengania Gadi abwide Davidi bunee: “Ntwikale lingo ku kiziki kyalanga. Enda wikale mu kisi kya Yuda.” Nu Davidi atukile, nu eingide mu lubanda lwa Hereti.
6 Saulo ongule buno Davidi amonekile ko nu bantu babezaga gamozi nage. Saulo eikalaga mu Gibea gansina muti wa mukwaju mu Rama. Abezaga n'isumo lyage mu kuboko nu bakiti bage babezaga bamutimbikania. 7 Saulo abwide bakiti bage bemenne bwigi nage bunee: “Ungwililazi beinyuwe ba Benjamina. Ndi mwana wa Yese akase umozi kumuli isoa aba isoa lya mizabibu? Ndi amwimike nawe mukota wa bita, u bakota ba tununu aba bakota ba nkama? 8 Aba inyuwe bansania mwakitile lwango ku kabamba kane? Aba takuli umozi wansolede nkungu nkizi zakitile mwana wane kakungu na mwana wa Yese, nu takuli umozi uli na kabebe kundi aba wakunsolela buno mwana wane bwakasile mukiti wane magala ma kuntegela anga bwakukita lelo?”
9 Tondo Doegi muEdomu wabezaga mukota wa bakiti ba Saulo abwide bunee: “Namonine ku mwana wa Yese akutuka ku Noba, kuli Ahimeleki mwana wa Ahitubu. 10 Nu we abuzizie Yehowa ku kabamba kage nu amukasile idia nu amukasile mwene wa nganda wa Goliati muFilistini.”
11 Kusila mukota asingile bantu kumana sankoga Ahimeleki mwana wa Ahitubu nu bansania ba numba z'isi, u basankoga babezaga ku Noba; bobansania bavule ku mukota. 12 Nu Saulo abwide bunee: “Uwe mwana wa Ahitubu, ungwa tanga.”
Nu akwide bunee: “Mukota wane, nne nili gano.”
13 Saulo amubwide bunee: “Kubuni mwakalile lwango, uwe nu mwana wa Yese, wamukasile idia nu mwene wa nganda, nu wamusegede ku Kalaga buno abe gantata gane, nu kuntegela aaba nu lelo?”
14 Ahimeleki akwide mukota bunee: “Nazi munkatini mwa bakiti bobe bansania uli mukatizia anga Davidi uli mukozi wa mukota nu mulangi wage, nu uli na lwanzo mu numba zobe? 15 Ndi busi bubo bwabezaga busi butangi bunamusegede ku Kalaga? Kilo, aba kakeke. Mukota ntaganzile mukiti wage aba numba za tatane kena, kubuno mukiti wobe nteizi bibino bitondo bikeke aba bingi.”
16 Tondo mukota abwide bunee: “Ahimeleki, lebelebe mwakue, uwe nu numba insania za so.” 17 Nu mukota abwide balangi bage bamutimba bunee: “Kebetukazi nu mwite basankoga ba Yehowa, kubuno babo lingo beli ku lulenge lwa Davidi, nu bamenyine buno atinine aba tabantendile.” Tondo bakiti ba mukota bananine kubika maboko mabo ku basankoga ba Yehowa kubeita.
18 Ububo mukota akakizizie Doegi bunee: “Kebetuka, wite basankoga.” Nu Doegi muEdomu akebetukile nu asolobokede basankoga nu mu busi bubo eitile bantu makumi kinana nu batano bavwalaga efodi za kitani. 19 Nu azikizye Noba, u mwino wa basankoga, na mwene, bamulume nu bakikulu, bana aaba nu babo bamomaga, ngombe, mpunda nu mikoko. 20 Tondo mwana umozi wa Ahimeleki, mwana wa Ahitubu, onine, izina lyage Abiatari. Atinine kuli Davidi.
21 Abiatari asambalide Davidi buno Saulo azikizye basankoga ba Yehowa.