Ahimeleki akasia Davidi.
21
1 Davidi abasile ku Noba ku sankoga Ahimeleki. Ahimeleki avule agilimina gaakulumanizie Davidi nu amubwide bunee: “Kubuni kuwavwa uwenyene nu takuli ungo gamozi nobe?” 2 Nu Davidi akwide sankoga Ahimeleki bunee: “Mukota ankakizizie kitondo kimozi nu ambwide bunee: ‘Ntusolele wampa ku kikino kitondo kinkukusinga kukyo nu kinakutendile.’ Nu nalagenne na basikila ku kiziki kisiembe. 3 Kano kaluma kikizi kiguli nakyo mu kuboko? Nkase tumpampa tutano aba kinsania kinamoneka.”
4 Nu sankoga akwide Davidi bunee: “Nsili na tumpampa twa bindi binsania mu kuboko kwane; kuli tugu tumpampa twasililila, ndi basikila beidangile na bakikulu.”
5 Nu Davidi abwide sankoga bunee: “Lebelebe mukikulu ntabasile bwigi na kutuli bibino bindi bisatu. Anga ku ngendo zane insania za bita, nu byabo, nu byakukanina, byasililila mu ngendo za bindi binsania, embe lelo!”
6 Ububo sankoga amukasile tumpampa twasililila kubuno takwabezaga kango kampampa umpanga tumpampa twa kalolesio twatukibwa ku meiso ma Yehowa buno tugalukibwe na tumpampa tuki twasika mu busi bwa kututikya.
7 Kwabezaga muntu wa bakiti ba Saulo kuko mu bubo busi akatwa lwabusio lwa Yehowa, izina lyage Doegi muEdomu, mukota wa balangi ba mikoko za Saulo. 8 Nu Davidi abuzizie Ahimeleki bunee: “Ndi ntuli n'isumo aba mwene gano mu kuboko kwobe? Nsyavule na mwene wane aba ngabo zane, kubuno kitondo kya mukota kyabezaga kya kusasia.”
9 Nu sankoga akwide bunee: “Mwene wa Goliati muFilistini u witile mu kibitabita kya Ela wagondwa mu nsulu kumbusa kwa efodi. Ndi watunda, gutole, kubuno takuli ungo gano umpanga wozo.” Nu Davidi abwide bunee: “Takuli ungo wigezye na wozo. Mpe go.”
Davidi lwabusio lwa mukota Akisi.
10 Ububo Davidi atinine bulazi na Saulo mu bubo busi nu abasile ku Akisi mukota wa ku Gati. 11 Bakiti ba Akisi bamubwide bunee: “Ndi wono ta Davidi, mukota wa kisi? Ndi ta wono u gubeimbile mu mamina bunee: ‘Saulo eitile twage tununu nu Davidi twage tutanaganzwa?’” 12 Nu Davidi alangile mamo moki ku mutima nu akule Akisi mukota wa ku Gati boba nunse. 13 Eigalukizye mwendezi wage ku meiso mabo nu eikitile anga musile kubeli nu kukulusakulusa ku nibi za mwingilo wa mwino nu kwigezia matazi ku luzelu. 14 Nu Akisi abwide bakiti bage bunee: “Lolazi, tamukumona buno wono muntu eli musile. Kubuni kumwamulusizie kundi? 15 Ndi nkwiyanina basile kumwamvwila na wono buno alolesie busile bwigi na nne? Ndi wono eingile mwane mu numba?”