Davidi mukota wa Yuda.
2
1 Kusila kwa bubo, Davidi abuzizie Yehowa bunee: “Ndi nibakame ku mwino umozi wa miino za baYuda?” Yehowa amubwide bunee: “Bakama.”
Davidi abuzizie lingo bunee: “Nende ku mwino mukizi?”
Amwakwide bunee: “Ku Hebroni.”
2 Ububo Davidi endile kuko, gamozi na bakikulu bage babili, Ahinoamu muYezereheli, nu Abigaili musigala wa Nabali muKarmeli. 3 Davidi endile na bantu bansania baabezaga nabo, na muntu na muntu na kikanga kyage. Beikede ku mwino wa Hebroni. 4 Nu bantu ba Yuda bavule nu babongezie Davidi mwambo gago buno abe mukota wa kikanga kya Yuda. Basambalide Davidi bunee: “Bantu ba Yabesi-Gileadi u bayikile Saulo mu nsinda.” 5 Davidi asingile migenzi ku bantu ba Yabesi-Gileadi, nu ababwide bunee: “Yehowa amukase mponga, kubuno mwalolesizie mponga zeno ku mukota weinyu Saulo nu kumuyika. 6 Kano kaluma Yehowa amulolesie mponga nu bulili; nu nne namukwile kyombo kubuno mwabukitile. 7 Kano kaluma mube na magala; nu inyuwe mube mapuka, kubuno Saulo mukota weinyu akule nu ku bubo kikanga kya Yuda kyambongezie mwambo buno nibe mukota wabo.”
8 Abeneri, mwana wa Neri, akatile Isiboseti, mwana wa Saulo, kumulusia ku Mahanaimu. 9 Amubongezie kuba mukota wa baGileadi nu baAseri nu baYezereheli, nu lingo baEfuraimu nu Benjamina nu Israeli unsania. 10 Isiboseti, mwana wa Saulo, abezaga na myaka makumi manazi gaalingile kwangata baIsraeli. Angatile myaka ibili, tondo baYuda bayangile Davidi. 11 Nu Davidi abezaga mukota wa baYuda ku Hebroni myaka mutubakamo nu myezi mutuba.
Bita gasamba baYuda nu baIsraeli.
12 Nu Abeneri, mwana wa Neri, nu bakiti ba Isiboseti, mwana wa Saulo, batukile ku Mahanaimu kwenda ku Gibeoni. 13 Yoabu, mwana wa Zeruya, nu bakiti ba Davidi bavule, nu bakulumenne nabo ku kiziba kya Gibeoni. Beikede, bango ku lulenge lumozi lwa kiziba, nu bango ku lungo lulenge lwa kiziba. 14 Abeneri abwide Yoabu bunee: “Basikila bemane nu balwane lwabusio lweitu.”
Yoabu amwakwide bunee: “Bemane.”
15 Ububo bemenne nu basokile ku maganzo mabo, ikumi nu babili ba Benjamina wa Isiboseti, mwana wa Saulo, nu ikumi nu babili ba bakiti ba Davidi. 16 Bakatenne na muntu na muntu g'ikosi lya munyage nu kwingizia mwene wage mu mpege za munyage, nu nti bagwela gamozi. Ububo izina lya kiziki kikyo lyamaninwe Helkati-Hazurimu; kili bwigi na Gibeoni. 17 Bita byabede bibibu nunse mu bubo busi. Abeneri nu baIsraeli bakindilwe na bakiti ba Davidi. 18 Bana basatu ba Zeruya babezaga gago, Yoabu nu Abisayi nu Asaheli. Nu Asaheli abezaga musasia anga kilinkumbi. 19 Asaheli ayangile Abeneri, nu mu kwenda kwage ntalolile ku seidume aba ku seikazi; tugu ayangile Abeneri. 20 Nu Abeneri akebetukile kumbusa kwage, abuzizie bunee: “Ndi uwe u Asaheli?”
Akwide bunee: “Ee, nne wono.”
21 Abeneri amubwide bunee: “Galuka ku seidume aba ku seikazi buno ukate ngabo za musikila umozi.” Asaheli ntazigile kugaluka aba kusiga kumuyanga.
22 Abeneri abwide Asaheli lingo bunee: “Ntunyange. Buni buninakwita nu kulola meiso ma Yoabu, solonzi?”
23 Tondo Asaheli asombile kugaluka; nu Abeneri amusumitile munda na kasengwa k'isumo lumbusambusa; kasengwa kabasenne ku mugongo wage nu akule gago. Gabede bantu bansania babasa ku kiziki kyakule Asaheli bemenne.
24 Tondo Yoabu nu Abisayi bayangile Abeneri. Musi wagobile gababasile ku mwiduko wa Ama guli mu kalula bwigi na Gibeoni. 25 BaBenjamina bakundile kumbusa kwa Abeneri. Bakundile kibombo kimozi, nu bemenne gantata mwiduko.
26 Nu Abeneri amanine Yoabu bunee: “Ndi myene zikeita ku milyalya? Ntwizi buno kuzinda kwabe kwinia mutima? Aaba nu ku nkungu nkizi ntukumana buno balekele kuyanga mibuto zabo?”
27 Yoabu amwakwide bunee: “Anga bukulamaga Kalaga, songo ntwatendile bubo, songo bantu tabanalekede kuyanga mibuto zabo aaba nu mu nindunindu.” 28 Ububo Yoabu idile monze, nu bantu bansania bemenne, nu tabayangile lingo baIsraeli aba kwitana nabo. 29 Abeneri nu bantu bage bendile mu kikyo kindi kinsania nu kutinga Araba. Basokile Yordani nu kutinga mu Bitironi unsania aaba nu bavule ku Mahanaimu. 30 Yoabu asubizie mu kuyanga Abeneri, nu gaakundamanizie bakoloboyo bansania, amonine mu bantu ba Davidi, kwida bantu ikumi nu mubula gamozi na Asaheli. 31 Bakiti ba Davidi beitile bantu ba Benjamina babezaga na Abeneri nkama isatu nu makumi mutuba. 32 Batolile kitumba kya Asaheli nu bakiyikile mu nsinda z'isi ku Betelehemu. Kumbusa Yoabu nu bantu bage bendile kindi kinsania. Bakeledwe na busi ku Hebroni