Mugomio wa Abeneri nu Davidi.
3
1 Kwabezaga bita bindi bingi gasamba numba za Saulo nu numba za Davidi. Davidi itide kuba na magala tondo kikanga kya Saulo kyabede kisosu. 2 Bana babutilwe ku Davidi kuko ku Hebroni: Nkula zage zabezaga Amunoni wa Ahinoamu wa muYezereheli; 3 wa babili Kiliabu wa Abigaili musigala wa Nabali muKarmeli; nu wa basatu Abusaloma, mwana wa Maka mukinga wa Talmayi, mukota wa Gesuri; 4 wa banazi Adonia, mwana wa Hagiti; nu wa batano Sefatia, mwana wa Abitali; 5 wa mutuba Itiramu wa Egla, mukazi wa Davidi. Babano u babutile Davidi mu Hebroni. 6 Bita byabede gasamba kikanga kya Saulo nu kya Davidi kankanka. Abeneri abede na magala mu numba za Saulo. 7 Saulo abezaga na kalemba, izina lyage Risipa mukinga wa Aya. Isiboseti abuzizie Abeneri bunee: “Kubuni kuwayama na kalemba ka tatane?” 8 Ku bubo Abeneri ongilwe ku kabamba ka bitondo bya Isiboseti nu atendile bunee: “Ndi nili mboa ku lulenge lwa baYuda? Nasondelezizie numba za so, nu mibuto zage, nu bilemba byage busoga aaba nu lelo, nu nsyakukasile ku kuboko kwa Davidi, nu lelo wansongela ku bubi ku kabamba ka mukikulu wono. 9 Kalaga asungie Abeneri nu kwitila lingo ndi nsyakitila Davidi anga bwamulumbilide Yehowa, 10 u kutikya bukota bwa numba za Saulo nu kwimika kisumbi kya bukota ku Davidi buno angate baIsraeli bansania, kutukila Dani aaba nu ku Beri-Seba.” 11 Isiboseti ntavwamine kwakula Abeneri kampa, kubuno amukule boba. 12 Nu Abeneri asingile migenzi ku Davidi; atendile bunee: “Kisi kili kya nazi? Tugomanie nu nakite magala ma kugalukya Israeli unsania kuguli.”
13 Davidi amwakwide bunee: “Busoga. Nakite idagano nobe, tondo nakukakizia wankitila kimozi tanga; mu nkungu ziwavwe kundi, nti wamvwila na Mikali, mukinga wa Saulo.” 14 Davidi asingile migenzi ku Isiboseti mwana wa Saulo, atendile bunee: “Ndusizie mukazi wane Mikali, u nasongile na ntonga za bizwalilwa lukama bya baFilistini.”
15 Isiboseti asingile, nu amutikizye ku iba wage Paltieli, mwana wa Laisi. 16 Tondo iba wage amuyangile nu kulila aaba nu kubasa ku Bahurimu. Ububo Abeneri amubwide bunee: “Enda, subya kwobe!” Nu asubizie.
Yoabu eita Abeneri.
17 Abeneri akalile lwango na bakulu ba Israeli, atendile bunee: “Mu bingo bindi mwatundile Davidi abe mukota weinyu. 18 Kano kaluma kitazi kitondo kikino kubuno Yehowa atendile ku Davidi bunee: ‘Ku kuboko kwa mukiti wane Davidi nkonia bantu bane baIsraeli ku baFilistini, nu ku beiti babo bansania.’” 19 Abeneri atendile lingo anga bubo ku baBenjamina. Kumbusa endile kutenda ku Hebroni kusambalila Davidi lwango lunsania lwa baIsraeli, nu lwa kikanga kinsania kya Benjamina. 20 Abeneri avule kuli Davidi ku Hebroni gamozi na bantu bage makumi mabili. Davidi akitide Abeneri nu bantu bage kisagulo. 21 Abeneri abwide Davidi bunee: “Nkwenda kukundamania baIsraeli bansania ku mukota wane, buno bakite idagano nobe, nu wangate bansania anga bukutunda mutima wobe.” Davidi asingile Abeneri nu endile na bubobelelo.
22 Kumbusa bakiti ba Davidi nu Yoabu basubizie ku kunyaga na ntiko ningi tondo Abeneri ntasangilwe lingo ku Davidi ku Hebroni, kubuno Davidi abezaga amusingile na bubobelelo. 23 Gavule Yoabu nu iyombo lyage linsania, bamusambalide bunee: “Abeneri mwana wa Neri avule ku mukota, nu mukota amusubizie nu endile mu bubobelelo.” 24 Ububo Yoabu avule ku mukota, nu abuzizie bunee: “Buni buwakitile? Abeneri avule kuguli. Kubuni witabizia buno ende nunsania? Nu endile kalazi! 25 Wizi Abeneri, mwana wa Neri; avule kukwengelela nu kumenyinina nu kutitika binsania byukukita.”
26 Gatukile Yoabu ku Davidi asingile migenzi kumbusa kwa Abeneri, nu bamusubizie kutukila kanuabalongo ka Sira. 27 Gasubizie Abeneri ku Hebroni, Yoabu amusindikizizie ku isula lya mwino buno atende nage anga uli na kakungu. Amusumitile gago nu akule, kusuba mikila za muto wage Asaheli. 28 Gongule Davidi ku bubo atendile bunee: “Nne nu bukota bwane tatuli na katati ku Yehowa ku mikila za Abeneri, mwana wa Neri. 29 Yoabu nu kikanga kinsania ky'isi kyabe na katati ka lukuo lwa Abeneri. Takwide muntu mu numba za Yoabu ukubasa mikila, aba uli na bibali, aba mukungu ukwegamina ku musumbo, aba ukukua na mwene wa nganda, aba ukukua na nzala.” 30 Ububo Yoabu nu Abisayi muto wage beitile Abeneri kubuno eitile muto wabo Asaheli ku Gibeoni mu bita.
31 Davidi abwide Yoabu nu bantu bansania babezaga gamozi nage bunee: “Atazi nsulu zeinyu mwikande makunino nu mulile na kyombo lwabusio lwa Abeneri.” Mukota Davidi ayangile sanduku za kitumba. 32 Bayikile Abeneri ku Hebroni. Mukota alalukile nu alilile ku nsinda za Abeneri, nu bantu bansania balilile. 33 Mukota alilile na kyombo ku Abeneri, atendile bunee:
“Ndi bwakulungana Abeneri kukua anga kyoto?
34 Maboko mobe tamakandilwe,
Aba magulu mobe tamabikilwe mu bikando bya muyololo.
Anga bukukua muntu na bantu babi, ububo buwakule.”
Bantu bansania bamulilide. 35 Bantu bansania bavule ku Davidi kumusengezia kulia, tondo Davidi alumbide bunee: “Kalaga ansungie nunse ndi nasonda kampampa aba kingo kinsania, aaba nu gagobe busi.” 36 Bubo bwamenyinnwe na bantu bansania nu bwabatananizizie; anga bunsania bwakitile mukota bwabatananizizie. 37 Bantu bansania nu baIsraeli bansania bamenyininne busi bubo buno talwabezaga lwango lwa mukota kwita Abeneri, mwana wa Neri. 38 Mukota abwide bakiti bage bunee: “Tamwizi buno muntu munene, nu ipuka, akule lelo mu Israeli? 39 Nne aaba nu nabongibwa kuba mukota, lelo natamba, nu babano bana ba Zeruya beli bakali kuntinga; Yehowa asube beiya bubi anga buli bubi bwabo.”