Kuzinda kwa bwangato bwa Yeroboamu
14
1 Mu nkungu zezo, Abiya, mwana wa Yeroboamu, abede musambi. 2 Nu Yeroboamu abwide mukazi wage bunee: “Nkukusega kuzanzuka nu kwigalukya buno tabakumenye buno uli mukazi wa Yeroboamu, nu enda ku Silo. Kuko kuli mulengania Ahiya, u wambwide buno nabe mukota wa bantu babano. 3 Eka tumpampa ikumi nu binkwanga nu idega lya buuki. Ingila kwage. Akubule buni bwabe mwana.” 4 Ububo mukazi wa Yeroboamu akitile bubo. Azanzukile nu endile ku Silo nu eingide mu numba za Ahiya. Ahiya abezaga kyuku kubuno meiso mage tamavwamaga lingo kumona na bukungu. 5 Nu Yehowa abwide Ahiya bunee: “Mukazi wa Yeroboamu akuvwa kukubuzia ku kitondo kya mwana wage kubuno akusamba. Gaakubasa, mubule bubo nu bubuno: eigalukizye anga ungo mukikulu.”
6 Gongule Ahiya ku nkindo zage geingilaga ga lwibi, atendile bunee: “Ingila, mukazi wa Yeroboamu. Kubuni wigalukya anga ungo? Nakasilwe bitondo bibibu kukutenda. 7 Enda, ubule Yeroboamu buno Yehowa, Kalaga wa baIsraeli, atenda bunee: ‘Nakusasikile munkatini mwa bantu, nu kukubika mwangati wa bantu bane baIsraeli. 8 Nanyagile bukota ku numba za Davidi nu kukukasabo, tondo ntwakitile anga mukiti wane Davidi, walangile makakizio mane nu kunyanga na mutima wage unsania, nu kukita binsania bisoga ku meiso mane. 9 Wakita bubi kutinga bango bansania babezaga lwabusio lwobe, nu wakitile tungo tulaga nu nkisi za kunyengula buno unnongie nu kunsomba. 10 Ku kabamba kakano, nkulusia bubi ku numba za Yeroboamu. Nazikye kikanga kya Yeroboamu, uli mukiti aba uteli mukiti; nayagile numba zage anga bukuyagilagwa busasa aaba nu gazasile kuzika. 11 Wozo wa numba za Yeroboamu wakwile mu mwino alibwe na mboa, nu wakwile mu isoa alibwe na tuzoni twa mpelela, kubuno Yehowa atenda. 12 Nu uwe, zanzuka usubye ku numba zobe; nu gawingizie magulu mobe mu mwino, mwana akue. 13 BaIsraeli bansania bamulilile, nu kumuyika kubuno wenyene u wayikwe mu nsinda mu kikanga kya Yeroboamu, kubuno mu we wenyene wa numba za Yeroboamu mwamonekile busoga ku meiso ma Yehowa, uli Kalaga wa Israeli.
14 Yehowa abike mukota ku baIsraeli wazikye kikanga kya Yeroboamu mu zezo nkungu. Akita bubo tanga, buni bwabe kumbusa? 15 Yehowa alibule baIsraeli, nu babe anga nsolu zikutambatamba mu mazi. Atikye baIsraeli ku kisi kikino kisoga kyakasile beisi nu ababalanganie ku ungo mutili wa Luuzi Furati, kubuno bakita nkisi zongia Yehowa. 16 Eite baIsraeli ku kabamba ka bwagi bwagile Yeroboamu, bwagizie baIsraeli nabo.’”
17 Mukazi wa Yeroboamu endile nu abasile ku Tirza; gaabasile ga kitiko kya numba, mwana akule. 18 BaIsraeli bansania bamulilide nu bamuyikile anga bwatendile Yehowa mu kanua ka mukiti wage Ahiya mulengania. 19 Nu bingo bitondo bya Yeroboamu, lukita lweitenne bita, nu kwangata kwage, binsania byasanzilwe mu mukanda wa byawakalazi bya bakota ba Israeli.
20 Nu Yeroboamu angatile myaka makumi mabili nu ibili. Alekenne anga beisi, nu Nadabu, mwana wage, angatile mu kiziki kyage.
21 Nu Rehoboamu, mwana wa Solomono, angatile mu Yuda. Abezaga na myaka makumi manazi nu umozi gaalingile kwangata. Nu angatile myaka ikumi nu mutubakamo mu Yerusalema, mwino wasombwede Yehowa mu bikanga binsania bya baIsraeli buno abike izina lyage mo. Izina lya nina u Nama; abezaga muAmoni. 22 Nu baYuda bakitile bwagi ku meiso ma Yehowa; bamwitizie na lugi ku mibi zabo zibakitile kutinga insania zakitile beisibo. 23 Kubuno beiyobakide nu bo biziki byasakama gamozi na tulimu, nu nkisi gantata ga kiziki kinsania kyasakama, nu gansina muti unsania mubisi. 24 Nu bitazi bya lukita lwa baSodoma byabezaga mu kisi. Balindikile mibi insania za ba bilongo byapumbizie Yehowa lwabusio lwa baIsraeli.
25 Mu mwaka w'itano wa kwangata kwa mukota Rehoboamu, Sisaki, mukota wa Misri, abakamine kwitania Yerusalema. 26 Atolile masuku ma numba za Yehowa nu ma numba za mukota; atolile mansania. Ekile ngabo insania za olo zakitile mukota Solomono. 27 Nu mukota Rehoboamu akitile ngabo za nsubi ku kiziki kyazo, azibikile mu maboko ma bakota ba balangi balangaga nibi za numba za Yehowa. 28 Gendaga mukota ku Numba za Yehowa, balangi bazekaga, kumbusa bazisubagia lingo mu busio bwa balangi.
29 Nu bingo bitondo bya Rehoboamu nu binsania byakitile, ndi tabyasanzilwe mu mukanda wa byawakalazi bya bakota ba Yuda? 30 Bita byabede bindi binse gasamba Rehoboamu nu Yeroboamu. 31 Rehoboamu akule nu ayikilwe gamozi na beisi mu mwino wa Davidi. Nina amanagwa Nama, muAmoni. Nu Abiya, mwana wage, angatile mu kiziki kyage.