Kwanoa kwa Yeroboamu
13
1 Muntu umozi wa Kalaga atukile ku Yuda mu iyuki lya Yehowa, nu kubasa ku Beteli, gabezaga Yeroboamu emana ga kayulo kugisia bulago. 2 Alalukile ku kasenga mu iyuki lya Yehowa bunee: “Ee kasenga, ee kasenga, bubuno u bukutenda Yehowa bunee: ‘Mwana akabutwa mu numba za Davidi, izina lyage Yosia. Akabika basankoga ba biziki byalanga kuba bisansa byakugisia bulago gantata gobe nu bakagisia makwa ma bantu go.’” 3 Mu bubo busi, akasenne kalolesio kutenda bunee: “Kakano u kalolesio katendile Yehowa bunee: ‘Lola, kasenga ka kayulo katike, nu lwito luli gantata gako lwabalangane.’” 4 Gongule mukota Yeroboamu ku bitondo byatendile wozo muntu wa Kalaga ku kabamba ka kasenga ka Beteli, alambizie kuboko kwage gantata ga kasenga kutenda bunee: “Mukatazi!” Nu kuboko kwage kwalambagia kuomine nu kwatintimenne, nu ntavwamine kukusubya. 5 Kasenga katikile, lwito lwabezaga gantata ga ko lwabalangenne anga bwalenganizie wozo muntu wa Kalaga mu iyuki lya Yehowa.
6 Nu mukota asegile muntu wa Kalaga bunee: “Nsegele nu buzia ku Yehowa, Kalaga wobe, buno ankitile mponga buno kuboko kwane kuvwame kusubya.” Nu muntu wa Kalaga asegile Yehowa, nu kuboko kwa mukota kwasubizie, nu kwabede anga bukwabezaga. 7 Mukota abwide wozo muntu wa Kalaga bunee: “Vwa gamozi na nne ku numba zane, walie nu nakukase lukaso.”
8 Nu muntu wa Kalaga abwide mukota bunee: “Ndi ukutunda kunkasa kyindi kya numba zobe, nsyende gamozi nobe, aba nsyalie idia, aba nsyanue mazi mu kiziki kikino. 9 Kubuno nakakizizibwe na Yehowa bunee: ‘Ntulie kampampa nu ntunue mazi aba ntusubye mu nzila ziwendile muzo.’”
10 Nu asubizie mu engo nzila, ntasubizie mu nzila zaabaside muzo ku Beteli.
Kwaga kwa wozo muntu wa Kalaga
11 Kwabezaga mukungu umozi mulengania wikalaga ku Beteli. Basikila bage bavule kumubula binsania byakitile wozo muntu wa Kalaga kuko ku Beteli mu bubo busi nu bitondo byatendile mukota. Nu gaabasilile kusambalila isibo, 12 ababuzizie bunee: “Kuni kuli wozo muntu; endile ku nzila nkizi?” Basikila bage bamonine ku nzila zendile wozo muntu wa Kalaga watukile ku Yuda. 13 Atendile basikila bage bunee: “Nnanzilazi mpunda.” Bamwanzide mpunda, nu abakamine gazo. 14 Ayangile muntu wa Kalaga, nu amusangile eikala gansina muti wa mwalo. Amubuzizie bunee: “Ndi uwe u wozo muntu wa Kalaga watukile ku Yuda?”
Amwakwide bunee: “U nne wono.”
15 Amubwide bunee: “Vwa gamozi na nne ku numba nu ulie.”
16 Tondo amwakwide bunee: “Nsikuvwama kusubya nobe, aba kwingila kwobe. Nsyalie kampampa aba nsyanue mazi nobe ga kiziki kikino. 17 Kubuno natendilwe mu iyuki lya Yehowa bunee: ‘Ntulie idia aba ntunue mazi kuko, aba ntusubye mu nzila ziwavule muzo.’”
18 Nu mulengania mukulu amubwide bunee: “Aba nne nili mulengania anga uwe; nu mugenzi wantendile mu iyuki lya Yehowa bunee: ‘Subya nage ku numba zobe, alie kampampa nu kunua mazi.’” Tondo amwekaga buza. 19 Ububo muntu wa Kalaga asubizie gamozi nage nu alide kampampa mu numba zage nu anune mazi. 20 Nu nkungu zibeikalaga ga meza, iyuki lya Yehowa lyabaside wozo mulengania wamulusizie, 21 nu alalukile ku wozo muntu wa Kalaga watukaga ku Yuda bunee: “Yehowa akutenda bunee: ‘Kubuno wananine makakizio ma Yehowa nu ntwanzile milembe zakukasile Yehowa, Kalaga wobe, 22 tondo wasubizie nu kulia kampampa nu kunua mazi ku kiziki kikyo kinakubwide bunee: “Ntwalie kampampa aba kunua mazi,” kitumba kyobe takikeingila mu nsinda za baso.’” 23 Gaasilile kulia nu kunua, mulengania wamusubagia amwanzide mpunda. 24 Gendile muntu wa Kalaga, akulumenne na kimbwe mu nzila nu kyamwitile. Kitumba kyage kyasigede mu nzila, mpunda mu lulenge lwakyo nu kimbwe kyemana bwigi nakyo. 25 Gatingile bantu bamonine ku kitumba kyabezaga mu nzila, nu kimbwe kyemana bwigi nakyo. Bendile na musagu ku mwino wikalaga wozo mukungu wa mulengania. 26 Gongule ku musagu, mulengania wasubizie wozo muntu wa Kalaga mu nzila, atendile bunee: “Eli wozo muntu wa Kalaga wasombile ikakizio lya Yehowa; ku bubo Yehowa amugabula ku kimbwe, kyamwata nu kumwita anga bwamutondile Yehowa.”
27 Kusila abwide bana bage bunee: “Nnanzilazi mpunda!” Nu bazanzile. 28 Nu endile. Asangile kitumba kili mu nzila, mpunda nu kimbwe byemana bwigi na kitumba. Kimbwe takyalide kitumba aba kwata mpunda. 29 Mulengania azanzwide kitumba kya muntu wa Kalaga nu akibikile ga mpunda zage; asubizie nakyo ku mwino buno amulilile nu kumuyika. 30 Abikile kitumba kyage mu nsinda zage wenyene. Amulilide bunee: “Ee mubuto wane.” 31 Kumbusa kwa kumuyika, abwide bana bage bunee: “Nkungu zinkakua, mukayika kitumba kyane mu nsinda zeno zayikwa mu muntu wa Kalaga. Bikazi makwa mane mu ntungo na makwa mage. 32 Kubuno iyuki lyatendile Yehowa ku kabamba ka kasenga mu Beteli nu ku numba insania za biziki byalanga zili mu miino za Samaria, lebelebe lyazindilile.”