Bukongolo bwa Rehoboamu
12
1 Rehoboamu endile ku Sekemu, kubuno baIsraeli bansania bendile ku Sekemu buno bamubike mukota. 2 Gongule Yeroboamu, mwana wa Nebati, kubo, kubuno abezaga eikili ku Misri kwatinine mukota Solomono, asubizie kutuka ku Misri. 3 Basingile kumumana. Yeroboamu nu musanganano unsania wa Israeli wavule kuli Rehoboamu nu wamubwide bunee: 4 “So atukitizie mulimo mubibu. Kano kaluma kokola bukobe nu milimo mibibu zatukitizie so, nu iswe twakukitile.” 5 Ababwide bunee: “Endazi tanga bindi bisatu, kumbusa subyazi lingo.” Ububo bendile. 6 Nu mukota Rehoboamu abaside bakulu babezaga n'isi Solomono mu kalamo kage. Ababuzizie bunee: “Lwango lukizi lumwankase buno nakule babano bantu?”
7 Bamwakwide bunee: “Ndi ukutunda kuba mukiti wa bantu babano lelo, nu kubakitila nu kubakula na bitondo bisoga, babe bakiti bobe nunse bindi binsania.”
8 Tondo Rehoboamu asigile lwango lwa bakulu nu kubasila mitoka zabezaga za lugi lwage. 9 Ababuzizie bunee: “Lwango lukizi lumwankase buno nakule bantu babano bambwide bunee: ‘Kokola muzigo wabikile so kutuli’?”
10 Nu mitoka zezo za lugi lwage zamubwide bunee: “Bubuno u buwabule babo bantu bakubwide bunee: ‘So akitile muzigo muzitu kutuli, tondo uwe tukokolele kugo,’ babule bunee: ‘Kansingwa kane keli kanene kutinga kibunda kya tatane. 11 Tatane amukasile mulimo mubibu, nu nne namutalikile go kutinga. Tatane amususwide na kasusu, nu nne namususule na nkutu.’”
Kubeganibwa kwa bukota bwa Davidi
12 Yeroboamu nu bantu bansania basubizie busi bw'isatu anga bwabakakizizie mukota bunee: “Vwazi kundi busi bw'isatu.” 13 Mukota abwide bantu na bukali; asigile lwango lwa bakulu lubamwanine, 14 nu ayangile lwango lwa mitoka. Ababwide bunee: “Tatane amukasile mulimo mubibu, nu nne nkutalikila mulimo weinyu. Tatane amususwide na tususu, tondo nne namususule na nkutu.”
15 Mukota ntongwilide babo bantu, kubuno kitondo kikino kyatukile ku Yehowa buno azindilizie bubo bwatendile Yehowa ku Yeroboamu, mwana wa Nebati, ku kanua ka Ahiya wa Sihoni. 16 Nu gamenyine baIsraeli bansania buno mukota ntabongwilide, bantu bakwide mukota bunee: “Iswe tuli na mutali mukizi mu Davidi? Tuli na kibe kikizi mu mwana wa Yese. BaIsraeli, endazi ku hema zeinyu. Kano kaluma Davidi, langa numba zobe!”
Nu baIsraeli bendile ku hema zabo. 17 Umpanga Rehoboamu angatile baIsraeli beikalaga mu miino za Yuda. 18 Ububo mukota Rehoboamu asingile Adoramu, wabezaga mwangati wa bakiti ba mulimo. Nu baIsraeli bansania bamulibwide makozi nu akule. Nu Rehoboamu ayangilide kwingila mu kayanga buno atinine ku Yerusalema. 19 Bubo u bubagunine numba za Davidi aaba nu lelo. 20 Nu gongule baIsraeli bansania buno Yeroboamu asubya, basingile bantu kumumana kuvwa ku musanganano. Bamubikile mukota wa baIsraeli bansania. Takwabezaga wangile kikanga kya Davidi, umpanga kikanga kya Yuda. 21 Nu gabasile Rehoboamu ku Yerusalema, akundamanizie kikanga kinsania kya Yuda nu kya Benjamina lingo, bamulume tununu lukama nu makumi kinana (180.000) mapuka masombwedwe kwitana bita na bikanga bya baIsraeli buno basubye bukota lingo ku Rehoboamu, mwana wa Solomono. 22 Tondo iyuki lya Kalaga lyabaside Semaya, muntu wa Kalaga bunee: 23 “Tenda Rehoboamu mwana wa Solomono, mukota wa Yuda, nu bansania ba numba za Yuda nu za Benjamina, nu ku babo basigede, bunee: 24 ‘Bubuno u bukutenda Yehowa bunee: “Tamwende kwitana na mibuto zeinyu, u bana ba Israeli. Nawe na usubya ku hema zage; kubuno kitondo kikino kyatuka kundi.”’” Banzile iyuki lya Yehowa nu basubizie anga bwakakizizie Yehowa.
Yeroboamu akita nkisi
25 Kusila Yeroboamu obakile Sekemu ga mwiduko wa Efuraimu; eikede kuko. Atukile ko nu obakile Penueli. 26 Yeroboamu atendile mu mutima wage bunee: “Kano kaluma bukota bunasubya ku numba za Davidi: 27 Ndi babano bantu benda kukita kayulo mu numba za Yehowa kuko ku Yerusalema, nti mitima zabo zagalukile mukota wabo, u Rehoboamu, mukota wa Yuda; banite nu kusubya ku Rehoboamu, mukota wa Yuda.”
28 Ububo mukota akalile lwango nu akitile bisusania bibili bya byana bya ngombe na olo nu ababwide bunee: “Ee Israeli, buli bubibu kumuli kwenda ku Yerusalema. Lolazi tulaga tweinyu twamutikizye ku Misri.” 29 Abikile kamozi ku Beteli nu ka tubili ku Dani. 30 Nu kitondo kikino kyabede bwagi, kubuno bantu bendile aaba nu ku Dani kukumbamina kamozi.
31 Nu Yeroboamu obakile numba za kukumbamina ku biziki bya nkangamo, nu asombwede basankoga ku bantu batabezaga ba kikanga kya kuba basankoga, beteli baLawi. 32 Nu Yeroboamu abikile kisagulo ku kindi ky'ikumi nu bitano kya mwezi wa kinana anga kisagulo kyakitagwa ku Yuda; akasenne bisansa bya kugisia ga kayulo. Bubo u bwakitile ku Beteli buno akasane bisansa ku ngombe zaakitile. Abikile basankoga ga nkangamo zaakitile mu Beteli. 33 Ububo endile ku kayulo ku Beteli mu kindi ky'ikumi nu bitano kya mwezi wa kinana, mwezi waasombwede ku lutundo lwage wenyene. Akakizizie kisagulo ku busi bubo ku baIsraeli, nu abakamine ku kayulo, kugisia bulago.