Bakikulu ba Solomono
11
1 Mukota Solomono atundile bakikulu beingi bageni gamozi na mukinga wa Farao, bakinga baMoabu nu baAmori, nu baEdomu, nu baSidoni, nu baHiti. 2 Babezaga ba bilongo byatendile Yehowa ku baIsraeli bunee: “Tamwingile kubeli, aba tabeingile kumuli. Lebelebe banavwama kugalukya mitima zeinyu kuyanga tulaga twabo.” Tondo Solomono alandenne nabo nu kubatunda. 3 Nu abezaga na bakikulu nkama mutubakamo, bana ba bakota, nu tulemba nkama isatu. Nu babo bakikulu bagalukizye mutima wage. 4 Gabede Solomono ese mukungu, bakikulu bage bagalukizye mutima wage kuyanga tungo tulaga. Ububo mutima wage tawabezaga wasililila ku Yehowa, Kalaga wage, anga bwabezaga w'isi Davidi. 5 Kubuno Solomono ayangile Astoreti, u kalaga keli mukikulu ka baSidoni, nu Moleki, u kalaga ka baAmoni kakusombwa. 6 Solomono akitide Yehowa mibi, nu ntayangile lebelebe Yehowa na mutima unsania anga isi Davidi. 7 Ububo Solomono obakile ga nkangamo za mwiduko guli butunganana na Yerusalema kayulo ka Kemosi, u kalaga ka baMoabu kakusombwa, nu ka Moleki, u kalaga ka baAmoni kakusombwa. 8 Bubo u bwakitile ku bakikulu bage bansania bakasanaga bulago nu kukitila tulaga twabo tuyulo. 9 Yehowa ongedwe Solomono kubuno mutima wage wagalukile kutuka ku Yehowa, Kalaga wa Israeli, wamubaside mambizi mabili. 10 Nu amukakizizie bibino bitondo buno ntayange tungo tulaga, tondo ntazigile makakizio ma Yehowa. 11 Ububo Yehowa abwide Solomono bunee: “Kubuno wakita bibino bitondo, ntwakokomezizie malagano mane nu milembe zane zinakukakizizie, lebelebe nkutikya bukota kuguli nu nabukase ku mukiti wobe. 12 Tugu nsyabukite mu bindi bya kalamo kobe ku kabamba ka so, Davidi; tondo nabutikye ku maboko ma mwana wobe. 13 Nu nsyatikye bukota bunsania. Nakase mwana wobe kikanga kimozi ku kabamba ka Davidi, mukiti wane nu ku kabamba ka Yerusalema u nasombwede.” Beiti ba Solomono
14 Yehowa azanzwide mwiti wa Solomono, u Hadadi muEdomu; abezaga wa kikanga kya bukota bwa Edomu. 15 Nkungu zakindile Davidi Edomu, Yoabu mukota w'iyombo, gaabakamine kuyika babo bakule, eitile bamulume bansania ba Edomu. 16 Yoabu eikede gago myezi mutuba gamozi na ba Israeli bansania aaba nu gaasilile kuzikya bamulume bansania ba baEdomu. 17 Hadadi atinine abezaga eikili musikila, Hadadi gamozi na baEdomu bamozi bakitide isi nu endile nabo ku Misri. 18 Batukile Midiani nu babasile ku Parani; batolile baParani bamozi nu kwenda nabo ku Misri kwa Farao, mukota wa Misri. Farao akasile Hadadi numba nu amukungile nu kumukasa masoa. 19 Hadadi abede na lutanuno ku Farao, ububo amukasile mutokali wage kuba mukikulu wage, u muto wa Tapenesi, mukikulu wa mukota. 20 Nu muto wa Tapenesi amubutide Genubati mwana wage, nu Tapenesi amukuzizie mu numba za Farao; nu Genubati abede mu numba za Farao munkatini mwa bana ba Farao.
21 Nu gongule Hadadi ku Misri buno Davidi akua, nu Yoabu, mukota w'iyombo, Hadadi atendile Farao bunee: “Nzige nisubye ku kisi kyane.”
22 Farao amwakwide bunee: “Wida kiziki kundi buukutunda wasubya ku kisi kyobe?” Amwakwide bunee: “Takuli kanida tondo nzige nisubye tugu.” 23 Kumbusa Kalaga azanzwide ungo mwiti wa Solomono, u Rezoni mwana wa Eliada, watinine mukota wage Hadadezeri, u mwangati wa Zoba. Babo baguni bendile ku Damasiki. 24 Nu we akundamanizie bantu bage nu abede musondelezia w'iyombo lya baguni nkungu zitile Davidi babo ba Zoba. Babo baguni bendile ku Damasiki. 25 Rezoni abezaga mwiti ku baIsraeli bindi binsania bya Solomono. Amukitide bubi kutinga Hadadi musombi wa baIsraeli. Angatile baAramu. 26 Yeroboamu nu we, mukiti wa Solomono, abede mwiti wa Solomono. Abezaga mwana wa Nebati, muEfuraimu wa Zereda; izina lya nina lyamanagwa Zerua, musigala. 27 Kakano keli kazeni bwagunine Yeroboamu mukota Solomono, gobakile Solomono Milo nu kulongeka kitutu kyagwede ku mwino w'isi Davidi, 28 Yeroboamu abezaga na magala nu ipuka; nu gamonine Solomono buno mutoka wozo eli muntu wa kukita mulimo, amubikile gantata ga bakiti bansania ba numba za Yosefu. 29 Mu bindi bibyo, gatukaga Yeroboamu ku Yerusalema, akulumenne mu nzila na mulengania Ahiya, wa ku Sihoni. Ahiya abezaga na nsulu ndazi zikili nto. Nu bobabili babezaga bobenyene mu isoa. 30 Ahiya akatile zezo nsulu nto zaabezaga nazo nu azatile bibe ikumi nu bibili, 31 nu abwide Yeroboamu bunee: “Tola bibe ikumi, kubuno bubuno u bwatenda Yehowa, Kalaga wa Israeli, bunee: ‘Lola, natikye bukota mu kuboko kwa Solomono, nu nakukase bikanga ikumi, 32 tondo asigale na kikanga kimozi ku kabamba ka Davidi, mukiti wane, nu ku kabamba ka Yerusalema, mwino u nasombwede ku bikanga binsania bya baIsraeli, 33 kubuno bansigile nu kukumbamina Asteroti, kalaga keli mukikulu ka baSidoni, nu Kemosi, kalaga ka baMoabu, nu Moleki, kalaga ka baAmoni, nu kubuno tabendile mu nzila zane, kukita bwisanana ku meiso mane nu kukokomezia makakizio mane nu nsungio zane, anga bwakitile Davidi, isi wa Solomono. 34 Nsyatikye bukota bunsania ku maboko ma Solomono, kubuno namubike mwangati bindi binsania bya kalamo kage, ku kabamba ka mukiti wane Davidi u nasombwede, kubuno akokomezizie makakizio mane nu milembe zane. 35 Tugu natikye bukota ku kuboko kwa mwana wage nu nakukase bikanga ikumi. 36 Nakase mwana wage kikanga kimozi buno mukiti wane Davidi abe na kasuku lwabusio lwane mu Yerusalema, mwino u nasombwede buno nibike izina lyane mo. 37 Nu Nne nakukate, wangate anga bukutunda mutima wobe. Wangate baIsraeli. 38 Ndi wungwilila binsania binkukukakizia nu kwenda mu nzila zane, nu kukita buli busoga ku meiso mane, kukokomezia milembe zane nu makakizio mane, anga bwakitile mukiti wane Davidi, nabe gamozi nobe. Nakobakile numba nnene anga zinobakide Davidi; nakukase Israeli. 39 Nasungie ibuta lya Davidi ku kabamba kakano, tondo ta bindi binsania.’”
40 Solomono alondile kwita Yeroboamu, tondo Yeroboamu atinine ku Misri, kwa Sisaki mukota wa Misri, eikede ko aaba nu gakule Solomono.
Lukuo lwa Solomono