Mukikulu mukota wa ku Seba atabangila Solomono.
10
1 Nu mukikulu mukota wa ku Seba ongule ku lukumu lwa mukota Solomono ku kabamba k'izina lya Yehowa, nu avule kumugeleka na mbuzio mbibu. 2 Avule ku Yerusalema na bakiti beingi nunse nu na ngamia zekile bulago nu olo ningi nunse nu makozi masoga nunse. Avule kuli Solomono nu atendile nage bitondo binsania byabezaga mu mutima wage. 3 Solomono akwide mbuzio zage insania. Takwasigede lubuzio lumozi lutakwide mukota. 4 Nu mukikulu mukota wa Seba gaamonine ku menge ma Solomono nu numba zoobakile, 5 nu idia lya meza mage, nu kiziki kya bakiti bage nu milimo nu nsulu za babo bamukambilaga nu banusia bage nu bisansa bya kugisibwa ku numba za Yehowa, mutima wage wakutilwe. 6 Nu we abwide mukota bunee: “Misagu za bitondo byobe nu menge mobe binungule kubyo mu kisi kyane zabezagile za bulili. 7 Tondo nsyakatizizie aaba nu ganavwa kumona na meiso mane. Nu lola, nsyasambalidwe kyindi; uli na menge mitilila kutinga misagu zinungule kuzo. 8 Ee mbogimbogi ku bantu bobe nu bakiti bobe bakwemana bindi binse lwabusio lwobe nu kungwa ku menge mobe. 9 Yehowa, Kalaga wobe, asimwe, wozo wakutananizizie nu kukubika ga kisumbi kya bukota bwa baIsraeli; kubuno Yehowa atundile baIsraeli ku milyalya. Ububo akubikile kuba mukota buno usungie nu kwatula bwisanana.” 10 Nu akasile mukota talanta lukama nu makumi mabili za olo, nu bulago bwingi nunse nu makozi masoga nunse. Takwavule bulago bwingi anga bubo bwavwilide mukikulu mukota wa Seba avwila na mukota Solomono.
11 Lingo, maato ma Hiramu mekile olo kutuka ku Ofiri nu mavule na miti ningi za musandali nu makozi masoga nunse. 12 Nu mukota akitile mango ma numba za Yehowa na miti za musandali nu ma numba zage, nu binumbi nu bindanda bya beimbi. Nu miti za lukita luluno tazimonekaga lingo ko aaba nu lelo. 13 Nu mukota Solomono akasile mukikulu mukota wa Seba kinsania kyatundile nu kyasegile, nu amukasile engo nkaso nsoga za mukota kutukila bikulo bya Solomono. Kumbusa mwangati mukikulu asubizie ku kisi kyage, we nu bakiti bage.
14 Buzitu bwa olo zabasaga ku Solomono mwaka na mwaka bwabezaga talanta nkama mutuba, makumi mutuba nu mutuba. 15 Akatile ungo mutali wa gantata ku bakunzia nu ku bakota bansania ba Arabia, nu ku bangati ba kisi. 16 Nu mukota Solomono atulile nazo ngabo nnene nkama ibili za olo, nu zakukile beka nkama mutuba za olo ku ngabo na ngabo. 17 Nu atulile engo ngabo nkeke za olo nkama isatu; na zo na zatulilwe na makozi masatu ma olo, nu mukota azibikile mu numba za lubanda lwa Lebanoni. 18 Lingo mukota akitile kisumbi kinene kya bukota na milamba nu akikukide na olo nsoga. 19 Kisumbi kikyo kyabezaga na kyindo kya mpilili mutuba nu kuntata kwakyo kwabezaga kwabilingana ga kwegamina nu biziki bya kubikila maboko muntungo na ntungo; bisusania bya bimbwe byabezaga byemana mu lulenge na lulenge lwakyo. 20 Nu ku mpilili na mpilili za kyindo kwabezaga bisusania bya bimbwe ikumi nu ibili ku ntungo ibili zazo. Takwabezaga kisumbi anga kikino ku makota mansania. 21 Bibangala binsania bya mukota Solomono ku numba za lubanda lwa Lebanoni byabezaga bya olo. Takwabezaga bya feza kubuno feza tazamonekaga buno zili kena mu bindi bya Solomono. 22 Mukota abezaga na maato ma Tarsisi mu kitatenge gamozi na maato ma Hiramu. Limbizi limozi mu myaka isatu, maato ma Tarsisi mavwaga miyala na olo nu feza nu milamba nu nsoko nu tuzoni tunene.
+ \fr 10:22 \ft Engo traductions zikubula buno, nsoko nu bikosu.
23 Mukota Solomono atingile bakota bansania ba kisi ku bikulo nu ku menge. 24 Nu bantu bansania ba kisi bavule kuli Solomono, buno bongwe ku menge mabikile Kalaga mu mutima wage. 25 Nawe na wavwaga na nkaso zage, u bintu bya feza nu bya olo, nu nsulu, nu bya bita, nu bulago, nu farasi nu nyumbu; u bwakitagwa mwaka na mwaka. 26 Solomono akundamanizie tuyanga nu bendaga ga farasi. Kwabede tuyanga kanunu nu nkama inazi (1.400) nu bendaga ga farasi tununu ikumi nu tubili (12.000). Ababikile mu miino za tuyanga nu ku Yerusalema bwigi na mukota. 27 Mukota akitile feza kuba anga makozi mu Yerusalema ku bwingi, nu mierezi kuba anga bwingi bwa miti za mbavu zikwasa mu kibitabita. 28 Nu farasi zabezaga na mukota Solomono zatukaga ku kisi kya Misri. Bakunzia ba mukota bazikatile ku bukunza bwalongekilwe. 29 Bukunza bwa kayanga kamozi katukile ku Misri bwabezaga byindi nkama mutuba bya feza, nu bwa farasi emozi bwabezaga byindi lukama nu makumi matano. Kumbusa bazikunzisizie nu bo ku bakota ba baHiti nu ba baAramu.