Kutenda kwa Kalaga lingo na Solomono
9
1 Gasilile Solomono kobaka zeno numba ibili, u numba za Yehowa, nu numba nnene za mukota, nu binsania byatundile kukita, 2 Yehowa abaside Solomono limbizi lya mabili anga bwamubaside ku Gibeoni. 3 Nu Yehowa amubwide bunee: “Nungwa ku masego mobe nu idilo lyobe liwalilile lwabusio lwane. Nabika mponga ku numba zeno ziwobakile buno nibike izina lyane kuko ku milyalya nu meiso mane nu mutima wane byabe kuko bindi binsania. 4 Nu uwe ndi ukwenda lwabusio lwane anga bwendile so Davidi na mutima wasililila nu mu bulili, nu kukita binsania binakukakizizie nu kukokomezia milembe nu nsungio zane, 5 nti nalindie bindi binsania kisumbi kyobe kya bukota bwa baIsraeli anga bunalagile ku so Davidi bunee: ‘Ntukeida muntu wa kwikala ga kisumbi kya bukota bwa baIsraeli.’ 6 Tondo ndi mwangalukila, inyuwe nu bana beinyu, nu tamwakokomezia milembe zane, nu makakizio mane manamukasile, nu kwenda kukitila tungo tulaga nu kutukumbamina, 7 nti nazikye baIsraeli mu kisi kikino kinabakasile, nu nise bulazi na nne numba zeno zinakasile mponga ku izina lyane, nu baIsraeli babe nsumo nu kitondo kya kubengwa munkatini mwa bantu bansania. 8 Aba numba zeno zasakama, unsania watingage bwigi nazo angame nu kwida kagunzu nu we atende bunee: ‘Kubuni kwakitide Yehowa kisi kikino nu numba zeno anga bubuno?’ 9 Nu bantu bakule bunee: ‘Kubuno basigile Yehowa, Kalaga wabo, wozo watikizye beisibo ku kisi kya Misri, nu bayangile tungo tulaga nu kutukumbamina nu kutukitila. Ku kabamba kako, Yehowa alusia bubi bubuno bunsania kubeli.’” Hiramu akaswa miino
10 Solomono obakile zezo numba, u numba za Yehowa, nu numba nnene zage mu myaka makumi mabili. 11 Kubuno Hiramu, mukota wa Tiro, avwilide Solomono na mbavu za mierezi nu miberoshi nu olo anga meiyanino mage mansania, ububo mukota Solomono amukasile miino makumi mabili mu kisi kya Galilaya. 12 Nu Hiramu atukile ku Tiro kulola miino zamukasile Solomono, tondo tazamutananizizie, 13 nu amubuzizie bunee: “Mubuto wane, miino mikizi zeno ziwankasile?” Azinikile Kisi kili Kabuli, bwisulilwa u kisi kili buliabulia, aaba nu lelo. 14 Hiramu asingide mukota Solomono talanta lukama nu makumi mabili za olo.
Milimo za Solomono
15 Nu bubuno u buli bwisulilwa bwa musanganano wakundamanizie mukota Solomono buno bobake numba za Yehowa nu numba nnene zage wenyene, nu Milo, nu kitutu kya Yerusalema, nu miino za Hazori, nu Megido nu Gezeri. 16 Farao, mukota wa Misri, akatile Gezeri nu agugisizie na keiya nu kwita baKanana beikalaga mugo. Agukasile ku mukinga wage, mukazi wa Solomono, anga lukaso. 17 Nu Solomono obakile Gezeri nu Beti-Horoni wa kunsi, 18 nu Balati, nu Tamari mu kisi kya kalula, 19 nu miino insania zabezaga na masuku ma Solomono, nu miino za bantu bendaga gantata ga farasi, nu bibyo binsania byatundaga Solomono kobaka kuko ku Yerusalema, nu ku Lebanoni, nu ku kisi kinsania kya bukota bwage. 20 Bantu bansania basigede mu baAmori, nu mu baHiti, nu mu baPerizi, nu mu baHivi, nu mu baYebusi, tababezaga bana ba baIsraeli, 21 nu babo bana basigede kumbusa kwabo mu kisi batazikizibwe na Solomono, abakatile kuba bakobe nu ababikile ku milimo mbibu u bubeli aaba nu lelo. 22 Tondo Solomono ntakatile baIsraeli anga bakobe; kubuno babezaga bantu ba bita, nu bakiti bage, nu bangati bage, nu bakota ba bakoloboyo, nu bakota ba tuyanga twage nu ba babo bendaga ga farasi. 23 Ububo bangati basombwedwe na Solomono kusondelezia mulimo babezaga nkama itano nu makumi matano, u bakakizagia bantu kukita mulimo. 24 Nu mukinga wa Farao atukile ku mwino wa Davidi nu endile ku numba zamobakide Solomono. Kumbusa obakile Milo. 25 Mwaka na mwaka, Solomono akitaga bisansa mambizi masatu, bya kugisia nu bya bubobelelo gantata ga kayulo kaanzide Yehowa, nu agisizie bulago ga kako kabezaga lwabusio lwa Yehowa. Nu atozizie numba. 26 Lingo mukota Solomono abazile maato ku Ezioni-Geberi, guli bwigi na Eloti mu kakulu ka Kitatenge Kyakisimana mu kisi kya Edomu. 27 Hiramu asingile bakiti bage mu mamo maato, babo beizi mazi gamozi na bakiti ba Solomono. 28 Nu bo bendile ku Ofiri, nu batolile ko talanta nkama inazi nu makumi mabili za olo nu bavule nazo kuli mukota Solomono.