Sanduku z'Idagano zabikwa mu Numba.
8
1 Ububo Solomono akundamanizie bakulu ba Israeli nu bakulu bansania ba bikanga nu bakota ba bikanga bya Israeli ku Yerusalema buno beeke Sanduku z'Idagano lya Yehowa kutuka ku mwino wa Davidi u Sayuni. 2 Nu bantu bansania ba Israeli bakundamenne na mukota Solomono mu busi bwa kisagulo ku mwezi wa Etanimu ukutenda wa mutubakamo. 3 Nu gabasile bakulu bansania ba Israeli, basankoga bekile Sanduku. 4 Bekile Sanduku za Yehowa nu Numba za Hema za musanganano nu bintu byasililila binsania byabezaga mo; byekilwe na basankoga nu baLawi. 5 Mukota Solomono nu musanganano unsania wamanagwa wa baIsraeli bavule nu bemenne lwabusio lwa Sanduku z'Idagano. Basesile bisansa bya mikoko nu ngombe zitanaganzwa aba kumenyininwa ku kabamba ka bwingi bwazo. 6 Basankoga bekile Sanduku z'Idagano lya Yehowa nu bazibikile ga kiziki kyazo mu Busio Bwasililila, munda mwa numba, kunsi kwa byupi bya makerubi. 7 Kubuno makerubi matakile byupi byamo gantata ga kiziki kya Sanduku nu makukide Sanduku nu mingolo zazo gantata. 8 Mingolo zezo zabezaga milazi nu ntonga zabezaga zikumoneka ko ga Kiziki Kyasililila mu Busio bwa munda Bwasililila; tondo tazamonekaga ko kumbuga kwa kikyo kiziki. Nuzo ziliko aaba nu lelo. 9 Mu sanduku tamwabezaga kango tugu mamo makozi mabili mabikilwe na Musa ku Horebu mu nkungu zakitile Yehowa idagano na baIsraeli gabatukile ku kisi kya Misri. 10 Nu gatukile basankoga ga kiziki kyasililila, kimpa kizazizie numba za Yehowa. 11 Basankoga tabavwamine kukita mulimo wabo ku kabamba ka kimpa kubuno lutanuno lwa Yehowa lwizazizie numba zage. Masego ma Solomono
12 Ububo Solomono atendile bunee: “Yehowa abwide buno aneikala mu kapilo kanene. 13 Nakobakide numba nnene za kutananina, u kiziki kyobe kiwalame mukyo ku milyalya.”
14 Nu musanganano unsania wa baIsraeli wabezaga wemana gago; mukota abagalukide nu kubakasa mponga. 15 Nu abwide bunee: “Aganunwe Yehowa, Kalaga wa Israeli, watendile na kanua ku tatane Davidi nu kuzindilizia na magala mage bwatendile bunee: 16 ‘Kutukila busi bubo bunatikizye bantu bane baIsraeli ku Misri, nsisombolaga mwino umozi munkatini mwa bikanga bya Israeli, mobakwe numba buno izina lyane libe mo; tondo nasombwede Davidi abe mukota wa bantu bane baIsraeli.’ 17 Tatane Davidi akengede mu mutima wage kobaka numba ku izina lya Yehowa, Kalaga wa Israeli. 18 Tondo Yehowa abwide tatane Davidi bunee: ‘Kubuno wakengede mu mutima wobe kobaka numba ku izina lyane wakitile busoga kuba na kikyo kilemanizio. 19 Tondo ta uwe u wobake zezo numba tondo mwana wobe ukatuka mu kibunda kyobe, we u kobaka numba ku izina lyane.’ 20 Yehowa azindilizia idagano lyage lyatendile, kubuno nemana mu kiziki kya tatane Davidi nu kwikala mu kisumbi kya bukota bwa Israeli anga bwalagile Mukota. Nu nobakile numba zeno ku izina lya Yehowa, Kalaga wa Israeli. 21 Nu mumo, nalongekile kiziki kya kubika Sanduku muli Idagano lya Yehowa, u Idagano lyakitile na batateiswe gaabatikizye ku kisi kya Misri.”
22 Solomono emenne lwabusio lwa kasenga ka kayulo ka Yehowa, lwabusio lwa musanganano wa Israeli. Alambizie maboko mage kwigulu, 23 nu atendile bunee: “Ee Yehowa, Kalaga wa Israeli, takuli Kalaga anga uwe, aba kwigulu aba gansi ga kisi; ukulanga idagano nu mponga ku bakiti bobe bakuyanga nzila zobe na mitima zabo insania. 24 Wazindilizia idagano liwalagile mukiti wobe Davidi. Wabulagile na kanua kobe nu wabuzindilizia lelo na kuboko kwobe. 25 Kano kaluma, Yehowa, Kalaga wa Israeli, kokomezia idagano liwatendile ku tatane Davidi bunee: ‘Ntukeida mwiyani lwabusio lwane wa kwikala mu kisumbi kya bukota bwa Israeli ndi bana bobe beidanga mu nzila zabo nu kwenda lwabusio lwane anga buwendile.’ 26 Ee Kalaga wa Israeli, kano kaluma zindilizia kitondo kyobe kiwatendile na mukiti wobe tatane Davidi. 27 Tondo ndi buligo buno Kalaga anikala ga kisi? Lola, meigulu mo menyene tamakuka kuguli; ndi zeno numba zinobakile u zakuswagila. 28 Tondo ungwilila ntundo nu masego ma mukiti wobe, u mibila nu masego, ee Yehowa, Kalaga wane, mankusega lwabusio lwobe lelo. 29 Lola numba zeno musi nu kindi ku kiziki kikino kiwatendile bunee: ‘Izina lyane likaba gago.’ 30 Ungwilila isego lya mukiti wobe nu lya bantu bobe baIsraeli gabasege mu kiziki kikino. Ungwilila mu kiziki kyukulamaga mukyo kwigulu, ungwilila nu sigilila bwagi. 31 Kungwa muntu agila munyage, nu kilumbilo kyabikwa kweli buno avwe kulumbila gano lwabusio lwa kasenga ka kayulo kobe mu numba zeno, 32 nti ungwilila kuko kwigulu; kita nu atulila bakiti bobe, nu suba wozo wisanana geigezye kwisanana kwage. 33 Kungwa bantu bobe baIsraeli bakindwa na beiti babo ku kabamba ka kukwagila, nu ndi basubya lingo kuguli nu kwitabizia izina lyobe kukusega nu kukuganuna mu numba zeno, 34 ungwilila kwigulu nu kusigilila bwagi bwa bantu bobe baIsraeli, nu kubalusia lingo mu kisi kiwakasile ku beisibo. 35 Mu nkungu ziwakande igulu buno takuloke mbula ku kabamba ka bwagi bwabo kuguli, ndi basega ku kiziki kikino nu kukita lutanuno ku izina lyobe, nu kusiga bwagi bwabo ukubasungia, 36 nti ungwilila mu meigulu; sigilila bwagi bwa bakiti bobe nu bwa bantu bobe baIsraeli bawigisie nzila nsoga zibatananina kutabanga muzo nu lokya mbula mu kisi kiwakasile kuba ntiko ku bantu bobe.
37 Kungwa nzala zaba mu kisi, aba nsambo aba nkisa aba kibozia kya biyikanwa, aba nzige za lukita na lukita aba lusambo lwa lukita lukizi; 38 ntundo nu masego makitwe na muntu unsania mu bantu bobe baIsraeli nu unsania wamenya kabebe ka mutima wage wenyene nu kulambya maboko mage ku numba zeno, 39 nti ungwilila kuko kwigulu ku kiziki kyukwikalaga, nu usigilile; kita nu subya ku muntu na muntu anga makitilo mage. Uwe wizi mutima wa muntu na muntu, kubuno uwe tugu u wizi mitima za bantu bansania, 40 buno bakukue boba bindi binsania bibakalama mu kisi kiwakasile batateiswe.
41 Aba ndi mugeni uteli umozi wa bantu bobe baIsraeli, gaakavwa kutuka ku kisi kya bulazi ku kabamba k'izina lyobe, 42 kubuno bakungwa ku izina lyobe inene nu ku kuboko kwobe kwa magala mabibu nu kwalambibwa, gaakavwa kusega ku numba zeno, 43 nti wungwilile kuko kwigulu kiziki kyukwikalaga nu kasa wozo mugeni kinsania kyasege buno bantu bansania ba kisi bamenye izina lyobe nu ku kukua boba anga bantu bobe baIsraeli nu bamenye buno numba zeno zinobakile zikumenywa ku izina lyobe. 44 Kungwa bantu bobe benda kwitana na beiti babo ku nzila ziukubalolesia, ndi basega Yehowa nu kulolela ku mwino u wasombwede, nu ku numba zinobakile ku izina lyobe, 45 nti ubongwilile kuko ku meigulu masego mabo nu ntundo zabo, nu longeka bitondo byabo. 46 Kungwa bakwagila, kubuno takuli muntu utakwagaga, nu gawabongelwe nu kubakasana ku maboko ma beiti babo, babeke kuba bakobe ku kisi kya beiti babo kya bulazi aba kya bwigi. 47 Ndi bakengela bwagi bwabo mu kisi kibabe bakobe, nu ndi basubya kuguli kusega mu kisi kya babo babakatile bunee: ‘Twakwagide, twakukitide kabenga nu mibi,’ 48 kungwa bagaluka kwobe na mutima wabo unsania nu kalenganio kabo kansania mu kisi kya beiti babo, ndi bakukusega nu kulola ku kisi kiwakasile ku beiti ba beisibo nu ku mwino u wasombwede nu ku numba zinobakile ku izina lyobe, 49 nti ungwilila masego mabo nu idilo lyabo kuko ku meigulu, ku kiziki kyukwikalaga, nu longeka bitondo byabo, 50 nu sigilila bantu bobe bwagi nu mibi insania zibakukitide. Luta lutundo lwa babo babekile kuba bakobe buno bavwame kubakwila kyombo. 51 Kubuno beli bantu bobe nu bupieni bwobe, buwatikizye mu Misri mu ndembelela za keiya k'iyambi.
52 Ungwilila ku idilo lya mukiti wobe nu lya bantu bobe baIsraeli buno ubakule mu binsania bibakusega. 53 Kubuno wabalekanukizye na bantu ba kisi, babe bwiyani bwobe. Bubo buwatendile mu kanua ka Musa, mukiti wobe nkungu ziwatikizye batateiswe ku Misri, ee Yehowa, Mwiya Bwangato Bunsania.”
54 Gasilile Solomono kusega masego mamano nu idilo lilino linsania, azanzukile lwabusio lwa kasenga ka Yehowa gaabezaga akoma mazu nu kulambya maboko mage kwigulu. 55 Azanzukile nu kukasa mponga n'iyuki inene ku musanganano wa baIsraeli nu kutenda bunee: 56 “Yehowa aganunwe, wozo wakasile kyumuno ku bantu bage ba Israeli anga bwabalagile mu idagano lyage. Mu bitondo bisoga binsania byatendile mu kanua ka Musa, mukiti wage, takwidile aba kitondo kimozi. 57 Yehowa, Kalaga weitu, abe gamozi n'iswe anga bwabezaga gamozi na batateiswe; ntatusige aba kutusomba, 58 tondo egamizie mitima zeitu kweli, buno twende mu nzila zage insania, nu kukokomezia makakizio mage, nu milembe zage nu nsungio zage, zaakakizizie batateiswe. 59 Nu moki mamano manene manasegile lwabusio lwa Yehowa, mabe kayikayika musi nu kindi ku Yehowa, Kalaga weitu, buno alongeke nkungu insania bitondo bya mukiti wage nu bya bantu bage baIsraeli, 60 buno bantu bansania ba kisi bamenye buno Yehowa eli Kalaga, nu takuli ungo. 61 Mitima zeinyu zibikwe insania ku Yehowa, Kalaga weitu, kuyanga milembe zage nu kukokomezia makakizio mage anga buli lelo.”
62 Mukota nu baIsraeli bansania gamozi nage bakasile kisansa ku Yehowa. 63 Solomono akasile bisansa bya bubobelelo ku Yehowa: ngombe tununu makumi mabili nu tubili (22.000) nu mikoko tununu lukama nu makumi mabili (120.000). Bubo mukota nu baIsraeli bansania bakasenne numba ku Yehowa. 64 Nu mu busi bubo mukota engezie mulungu wabezaga lwabusio lwa numba za Yehowa, nu gago akasile bisansa bya kugisia nu bya bunga bwa ngano nu tumpampa twa bisansa bya bubobelelo, kubuno kayulo ka nsubi kabezaga kakeke nu takakukile bisansa bya bibyo binsania.
65 Ububo Solomono akitile kisagulo kinene mu bubo busi nu baIsraeli bansania baabezaga nabo. Musanganano munene wavule kutukila Hamati aaba nu ku luuzi lwa Misri. Bakundamenne lwabusio lwa Yehowa, Kalaga weitu, bindi mutubakamo nu bingo bindi mutubakamo u bindi ikumi nu binazi. 66 Mu kindi kya kinana alagenne na bantu, nu bo bakasenne mponga ku mukota nu bendile ku hema zabo na mbogimbogi nu mitima zabo zalangamenne na busoga bunsania bwakitile Yehowa ku Davidi, mukiti wage, nu ku bantu bage baIsraeli.