Kobakwa kwa numba za mukota Solomono
7
1 Solomono obakile numba zage nu azizindilizizie mu myaka ikumi nu isatu. 2 Numba zage zamanagwa Numba za Lubanda lwa Lebanoni. Bulazi bwazo bwabezaga mabusu lukama nu bungulu bwazo mabusu makumi matano nu kima kyazo mabusu makumi masatu. Akomine mu mpilili inazi mango ma mwerezi. 3 Zakukidwe na mbavu za mwerezi ku masio malindibwa na mango makumi manazi nu matano, ikumi nu matano ku mulindi na mulindi. 4 Kwabezaga mpilili isatu za madilisa malandana. 5 Nu nibi zabezaga mu mpilili isatu zalolana nu miima zazo zabezaga zisa. 6 Obakile lusu lwa mango, bulazi bwa mabusu makumi matano nu bungulu mabusu makumi masatu; akitile kabelabela lwabusio lwalo na mango. 7 Obakile lusu lwa kisumbi kya bukota lwa kwatulila milondo, u lusu lwa milondo; nu lwakukidwe na mbavu za mwerezi kutukila gansi nu kubasa kuntata. 8 Nu numba zage za kwiyombeka zobakilwe anga bubo g'ungo mulungu kumbusa kwa lusu lwa milondo. Lingo, Solomono obakile numba anga zezo ku mukinga wa Farao wozo waasongile. 9 Obakile zeno numba insania na makozi masoga nunse masungwa bulingilingi nu masesilwe na musumeno munda nu kumbuga, kutukila gansi nu kuntata nu kutukila ga mukolo wa numba aaba nu kubasa ku mukolo wa mulungu munene. 10 Makozi ma tulingilo mabezaga masoga nunse, nu manene. Bunene bwamo bwabezaga mamozi mabusu ikumi nu mango mabusu kinana. 11 Gantata gamo gabezaga makozi masoga nunse maseswa bulingilingi nu miti za mwerezi. 12 Nu mukolo munene wakitilwe na mpilili isatu za makozi masesilwe bulingilingi ku ndenge insania nu mpilili emozi za miti za mwerezi anga bwabezaga mukolo wa numba za Yehowa nu kabelabela kazo.
13 Mukota Solomono asingile kumana Huramu kutuka ku Tiro. 14 Abezaga mwana wa mukikulu musigala wa kikanga kya Nafutali nu isi abezaga muntu wa Tiro, mutumbi wa nsubi. Abezaga eiyala na menge nu bumenyinino bwa milimo insania za nsubi. Abaside mukota Solomono nu amukitide milimo insania. 15 Anyengwide nsubi nu akitile mango mabili. Bulazi bwa na lyo bwabezaga mabusu ikumi nu kinana, nu mubilingano wa na lyo wigezye na musinge wa mabusu ikumi nu mabili. 16 Akitile nkumbu ibili za nsubi zanyengulwa nu azibikile ga ntonga za mango. Musakamo wa nkumbu na nkumbu wabezaga mabusu matano. 17 Nkumbu zatimbilwe na malebo ku kisusania kya kakila. Akitile tukila twa nsubi nu twabikilwe ga nkumbu zabezaga gantata ga mango, mutubakamo ku zeno nkumbu nu mutubakamo ku zeno engo nkumbu. 18 Nu gantata ga tukila abikile milindi ibili za malebo ku kisusania kya makomamanga, u nu bwakitile ku nkumbu z'ibili. 19 Atimbizie nkumbu za mango ma kabelabela na malebo ma mabusu manazi ku kisusania kya maluba. 20 Nkumbu zabezaga gantata ga mango mabili mu ntungo mwa kisusania ky'idega, zatimbwa kunsi nu kuntata na bisusania bya makomamanga, nkama ibili mu mpilili. 21 Eimikile mango mu kabelabela ka numba za Yehowa; eimikile iyango lya ku lulenge lwa kwidume nu alimanine Yakini, nu eimikile iyango lya ku lulenge lwa kwikazi nu alimanine Boazi. 22 Gantata ga mango gabezaga bisusania bya maluba masoga; bubo u bwasilile mulimo wa mango.
23 Akitile kibungulu kinene kya kyuma kyanyengulwa kya mabusu ikumi kutukila ku wono mulomo nu kubasa ku ungo; kinsania kyabezaga kyabilingana. Musakamo wakyo wabezaga wigezye na musinge wa mabusu makumi masatu. 24 Nu kunsi kwa milomo kwabezaga kwatimbwa na malebo ma kisusania kya masola ikumi mu ibusu limozi. Mamo malebo ma mpilili ibili manyengulwa na kibungulu mu muzonga. 25 Akibikile gantata ga bisusania bya ngombe ikumi nu ibili. Nu zalolede isatu ku lulenge lwa kwikazi nu isatu ku lwa kuntata nu isatu ku lwa kunsi nu isatu ku lwa kwidume. Kyabikilwe gantata gazo nu makuma mazo mabezaga munda. 26 Nu ititilimba lyakyo lyabezaga anga ikasa limozi nu milomo zakyo zabezaga anga kituma aba iduba. Mwabezaga mukwenda malega tununu tubili (2.000) ma mazi.
27 Akitile tusenga ikumi twa nsubi. Bulazi bwato bwabezaga mabusu manazi nu bungulu mabusu manazi nu kima mabusu masatu. 28 Bubuno u bwakitilwe tusenga; ku lulenge na lulenge kwabezaga mwima nu munkatini mwago mwingizizibwe mbavu. 29 Akitile malebo ma bisusania bya kimbwe nu balume ba ngombe nu makerubi ku mbavu nu ku miima. Kunsi nu kuntata kwa mwima akitile malebo ma bisusania bya kulukwa nu kugondwa. 30 Na ko na kabezaga na mipila inazi za nsubi nu byuma bya nsubi bya kukulumania kibungulu byabezaga byekwa ku tupindapinda. Byimikilo binazi byatulilwe na malebo ma lukilakila. 31 Nu kuntata kwabikilwe itengu lyabilingana mu engo mpilili nu buzindu bwalo bwabezaga ibusu limozi nu kyindi nu itengu lyabezaga na buzindu bw'ibusu limozi; byatulilwe na malebo nu byabezaga na ndenge inazi zabilingana. 32 Mbigiko za kukulumania mipila zangilwe gamozi na kasenga mu muzonga. 33 Mipila zakyo zabezaga anga za kayanga ka bita; mbigiko nu nsambo nu bingo byuma binsania byakyo byanyengwidwe nu kwangoa mu muzonga. 34 Na kyo na kyabezaga na miima inazi mu tupindapinda twa kasenga. Nu miima inazi zangilwe na kasenga mu muzonga. 35 Kyindi kya kuntata kyabezaga na lukungo lwabilingana, nu musakamo walo wabezaga kyindi ky'ibusu; byimikilo mu ndenge zakyo byakatenne ku kasenga. 36 Mu ndenge nu ku byimikilo atulile bisusania bya makerubi nu kimbwe nu bibila nu mu ntungo insania kulukwa kwa maluba. 37 Bubo u bwakitile tuto tusenga ikumi. Twabezaga twatulwa mu muzonga; bunene bumozi nu lukita lumozi.
38 Akitile bibungulu ikumi bya nsubi; na kyo na kyendaga mu malega makumi manazi nu bunene bwa mabusu manazi, kimozi ku kasenga na kasenga. 39 Abikile tusenga tutano ku lulenge lwa kwidume kwa numba nu tutano ku lulenge lwa kwikazi kwa numba, nu abikile kibungulu kinene kyamanagwa Kitatenge ga mulungu, ku kapindapinda ka ku lulenge lwa kwidume ka numba. 40 Hiramu atulile nyungu nu mpagu nu bituma. Bubo u bwazindilizizie Huramu mulimo unsania wakitide mukota Solomono ku numba za Yehowa: 41 Mango mabili nu nkumbu ibili zamo zabezaga gantata ga mamo mango nu tukila tubili kukukila zezo nkumbu; asusanizie malega gantata ga mamo mango mabili; 42 nu biguma nkama inazi za tuto tukila tubili; nu mpilili ibili za biguma ku kakila na kakila za kukukila nkumbu ibili za gantata ga mamo mango; 43 nu tusenga ikumi gamozi na bibungulu ikumi gantata gabyo; 44 nu kitatenge nu ngombe ikumi kunsi kwakyo; 45 nu nyungu nu mpagu nu bituma.
Bibyo binsania byakitile Huramu ku mukota Solomono ku numba za Yehowa byabezaga bya nsubi zelwa busoga. 46 Mukota abitulizie mu muzonga ku kibitabita kya kabumba kili ku Yordani gasamba Sukoti nu Zaretani. 47 Solomono ntalindikile buzitu bwa bibyo bintu binsania kubuno byabezaga bingi nunse; nu buzitu bwa nsubi tabwamenyininwe.
48 Lingo Solomono akitile bintu binsania bya numba za Yehowa: u kasenga ka kayulo ka olo nu meza ma olo mabikagwa ga tumpampa twa kayulo; 49 nu byanikilo bya olo nsoga bya tusuku, bitano ku seidume nu bitano ku seikazi ga mwingilo wa busio bwa munda bwasililila, nu maluba nu tusuku nu nenya za olo; 50 nu mpepe nu tulaso twa kukalakasa natmbi za tusuku nu mpepe za kusandila nu nkili nu mpepe za kweka keiya, binsania byabezaga bya olo nsoga, nu matengu matimbaga mu bikatilo bya nibi za munda mwa numba mu kiziki kyasililila nu ma nibi za mwingilo munene wa numba za Yehowa mabezaga ma olo.
51 Ububo Solomono azindilizizie milimo insania za numba za Yehowa. Alusizie feza nu olo nu kasenga kakasenne isi Davidi ku Yehowa, nu abibikile mu isuku lya numba za Yehowa.