Kobakwa kwa numba za Yehowa.
6
1 Mu mwaka wa nkama inazi nu makumi kinana kumbusa kwa kutuka kwa baIsraeli ku kisi kya Misri, mu mwaka w'inazi wa kwangata kwage mu Israeli, Solomono alingile kobaka numba za Yehowa mu mwezi wa Zivu, guli w'ibili. 2 Nu bulazi bwa numba zezo zobakile mukota Solomono ku Yehowa bwabezaga mabusu makumi mutuba nu bungulu bwabezaga mabusu makumi mabili nu kima kyabezaga mabusu makumi masatu, 3 nu bulazi bwa kabelabela lwabusio lwa numba bwabezaga mabusu makumi mabili geigezye bungulu bwa numba nu kima kyabezaga mabusu ikumi. 4 Mukota akitile numba na madilisa makeke masakama mu bitutu. 5 Nu obakile tutoto ku bitutu binsania bya numba nu kubika masio mu ntungo. 6 Katoto ka kunsi kabezaga na bungulu bwa mabusu matano, nu ka munkatini mabusu mutuba, nu ka tusatu mabusu mutubakamo, kubuno bakomine kitutu kya katoto ku kikyo kitutu kya numba nnene, buno buzitu bwa bisusu bwegamine kukyo tondo takingile mu kitutu kya numba nnene. 7 Gobakagwa numba, makozi masangilwe matwa ku miduko buno takungubwe muzumio wa nondo aba isaga aba kingo kyuma bwigi na numba gazobakagwa. 8 Lwibi lwa katoto ka kunsi lwabezaga ku lulenge lwa kwidume lwa numba. Babakamaga ku katoto ka munkatini mu kyindo aaba nu kubasa ku katoto ka tusatu. 9 U bubobakile nu kuzindilizia kobaka numba. Azikukide na miti nu mbavu za mierezi. 10 Obakile tutoto ku ntungo insania za numba nu kima kyato kyabezaga mabusu matano. Nu bitutu byato byabezaga byalandanibwa ku numba na miti za mierezi.
11 Iyuki lya Yehowa lyabaside Solomono kutenda bunee: 12 “Ku kabamba ka numba zeno ziwobaka, ndi wenda mu milembe zane nu nsungio zane nu kukokomezia makakizio mane mansania nu kumayanga, nti nazindilizie muguli idagano lyane linalagile ku so Davidi. 13 Nu nti nikale munkatini mwa Israeli nu nsyasige bantu bane baIsraeli.”
14 Ububo Solomono asilile kobaka zezo numba. 15 Abikile mbavu za mierezi munda mwa numba ku bitutu kutukila gansi nu kubasa ku itala. Akukide gansi na mbavu za miberoshi. 16 Abeganizie busio bwa mabusu makumi mabili ku ntonga kwa numba na mbavu za mierezi. Abulangile kuba busio bwa munda bwasililila mu Kiziki Kyasililila. 17 Kyage kya numba za Yehowa kyabezaga mabusu makumi manazi. 18 Bitutu bya kyage kya numba byakukidwe na mbavu zabazilwe na malebo kisusania kya masola nu maluba masanuka. Binsania byakukidwe na mbavu za mierezi, takwamonekaga ikozi aba limozi. 19 Busio bwa kuzinda kwa numba bwalongekilwe buno mubikwe Sanduku z'Idagano lya Yehowa. 20 Bubo busio bwasililila bwabezaga na bulazi bwa mabusu makumi mabili nu bungulu makumi mabili nu kima makumi mabili. Solomono akukide kunsania na olo nu miti za mierezi za kasenga ka kayulo. 21 Solomono akukide munda mwa numba na olo nu aswikile miyololo za olo lwabusio lwa busio bwasililila bwakukidwe na olo. 22 Akukide munda mwa numba insania na olo. Lingo, akukide kasenga ka busio bwasililila na olo. 23 Mu busio bwasililila abikile makerubi mabili ma muti wa makiti, nu musakamo wa na ko wabezaga mabusu bwigi ku mabusu ikumi. 24 Bulazi bwa kyupe kimozi kya kerubi bwabezaga mabusu matano nu kingo kyupe mabusu matano u mabusu ikumi, ntonga na ntonga. 25 Nu kerubi ka mabili kabezaga mabusu ikumi. Ku bunene nu ku lukita, makerubi mabezaga masusanania. 26 Kima kya kerubi na kerubi kyabezaga mabusu ikumi. 27 Abikile makerubi mu busio bwa munda, nu byupi bya makerubi byatakilwe; kyupe kya kimozi kitubagia ku kitutu, nu ntonga za kyupe kya kingo kitubagia ku kikyo kingo kitutu, nu byupi byamo byakulumenne munkatini mwa numba. 28 Solomono akukide ma kerubi na olo.
29 Abazile ku bitutu binsania bya masio ma munda nu kumbuga bisusania bya makerubi nu bibila nu maluba masanuka. 30 Mu masio ma munda nu kumbuga akukide gansi na olo. 31 Abikile nibi za muti wa makiti ga mwingilo wa busio bwa munda bwasililila, miima nu bungulu bwabezaga bwigezye na kyindi kimozi kya bitano kya kitutu. 32 Nu ku mbavu za nibi za muti wa makiti abazile bisusania bya makerubi nu bibila nu maluba masanuka nu abikukide na olo. Akukide makerubi nu bibila na olo. 33 Bubo u bwakitile tondo ga mwingilo wa numba, miima za muti wa makiti zabezaga na bulazi bwa kyindi kimozi kya binazi kya kitutu. 34 Nu nibi ibili za muti wa muberoshi zabezaga za kukumboa. Lumozi ku luno lulenge lwabezaga lwa kukumba mu ibili ga masalinye nu lulo lungo bubo tondo. 35 Abazile kuzo bisusania bya makerubi nu bya bibila nu bya maluba masanuka nu abikukide na olo zatulilwe bwa nsamba.
36 Nu mukolo watimbile numba wakitilwe na makozi masungwa matalikana mu mpilili isatu nu mpilili emozi za miti zabazwa za mwerezi.