Mugomio wa Solomono nu mukota Hiramu
5
1 Hiramu, mukota wa Tiro, asingile bakiti bage ku Solomono, gongule buno bamubongia mwambo kuba mu kiziki ky'isi. Kubuno Hiramu atundaga Davidi bindi binsania. 2 Nu Solomono asingide Hiramu musagu bunee: 3 “Wizi buno tatane Davidi ntavwamine kobaka numba ku izina lya Yehowa, Kalaga wage, kubuno bita byamutimbile ku ndenge insania, aaba nu gabikile Yehowa bantu kunsi kwa magulu mage. 4 Tondo kano kaluma Yehowa, Kalaga wane, ankasa bubobelelo ku ndenge insania. Takuli mwiti aba kitondo kibi. 5 Ububo nkutunda kobaka numba ku izina lya Yehowa, Kalaga wane, anga bwabwide Yehowa kuli tatane Davidi bunee: ‘Mwana wobe u nkabika mu kiziki kyobe, ga kisumbi kyobe kya bukota, akobaka numba ku izina lyane.’ 6 Kano kaluma kakizia buno bankalile miti za mierezi za Lebanoni; bakiti bane babe gamozi na bakiti bobe nu nakulige lukalilo lwa bakiti bobe anga buwambule. Kubuno wizi buno kweitu takuli muntu wizi kusinda miti anga baSidoni.” 7 Nu gongule Hiramu ku wozo musagu wa Solomono, abogilebogile nunse nu abwide bunee: “Yehowa asimwe lelo wakasile Davidi mwana wa menge buno abe mukota wa kilongo kikino kinene.” 8 Hiramu asingide Solomono musagu bunee: “Nungwa ku musagu u wansingide. Nakite buukutunda ku kitondo kya miti za mierezi nu miberoshi. 9 Bakiti bane bazigezye kutuka Lebanoni nu kubasa ku kitatenge. Nazikande mu bitangi nu nazisinge mu kitatenge ku kiziki kiwambule. Nazikandule gago nu wazitole. Lutundo lwane luli buno wakase idia ku numba zane.” 10 Hiramu akasile Solomono miti za mierezi nu za miberoshi anga zaatundile. 11 Nu Solomono akasile Hiramu nzi tununu makumi mabili (20.000) za ngano kulisia numba zage nu mbusu makumi mabili ma makiti makambutulwa. U byakasaga Solomono ku Hiramu mwaka na mwaka. 12 Yehowa akasile Solomono menge anga bwamulagile, nu gabezaga bubobelelo gasamba Hiramu nu Solomono, nu bakitile idagano lya mugomio gamozi.
13 Mukota Solomono akakizizie kusombola bakiti munkatini mwa baIsraeli bansania. Nu maganzo ma babo bansania mabezaga tununu makumi masatu (30.000). 14 Abasingile ku Lebanoni kibombo na kibombo kya tununu ikumi (10.000) ku mwezi umozi, nu bibyo bibombo bya tununu ikumi (10.000) byabezaga ku Lebanoni mwezi umozi nu myezi ibili kwabo. Abikile Adoniramu mwangati wa bibyo bibombo. 15 Solomono abezaga na bantu tununu makumi mutubakamo (70.000) ba kweka mizigo nu bantu tununu makumi kinana (80.000) babazaga makozi ku miduko. 16 Nu bemanizi balolaga milimo nu kusungula bantu, babezaga tununu tusatu nu nkama isatu (3.300). 17 Mukota akakizizie kutikya makozi manene mu ikozi isoga buno babike tulingilo twa numba. 18 Nu bakiti ba Solomono, nu ba Hiramu, nu ba Gebali, babazile nu babikile miti nu makozi kayikayika kobaka numba.