Bangati banene mu bukota bwa Solomono
4
1 Mukota Solomono abezaga mwangati wa Israeli unsania. 2 Nu babano u bangati babezaga kunsi kwage Azaria, mwana wa Zadoki sankoga; 3 nu Elihorefu nu Ahiya bana ba Sisa, babezaga basanzi; nu Yosafati, mwana wa Ahiludi, musanzi wa bibyo byakitilwe; 4 nu Benaya, mwana wa Yehoyada, mwangati w'iyombo; nu Zadoki nu Abiatari babezaga basankoga; 5 nu Azaria mwana wa Natana, abezaga mwangati wa basondelezia b'iyombo; nu Zabudi, mwana wa Natana, abezaga sankoga nu kilemba kya mukota; 6 nu Ahisari abezaga mwangati wa numba nnene za mukota; nu Adoniramu, mwana wa Abuda abezaga mulolezi wa bakiti ba mulimo. 7 Solomono abezaga na balolezi ikumi nu babili mu Israeli unsania; bavwaga n'idia lya mukota nu lya numba zage, nawe na mwezi umozi mu mwaka. 8 Nu meina mabo u mamano: Mwana wa Huri mu mwiduko wa Efuraimu; 9 nu Beni-Dekeri ku Makasi, nu ku Salabimu, nu ku Beti-Semesi, nu ku Eloni-Beti-Hanani; 10 nu Hesedi ku Aruboti abezaga na Soko nu kisi kinsania kya Heferi; 11 nu Abinadabu, abezaga na kisi kinsania kya Nafati Dori nu Tafati, (Mukinga wa Solomono) u wabezaga mukazi wage; 12 nu Bana mwana wa Ahiludi abezaga na Tanaki nu Megido nu Beti-Sani gunsania guli bwigi na Zaretani kunsi kwa Yezereheli, kutukila Beti-Seani ku mwaga wa Abeli-Mehola, nu kutinga Yokimeamu; 13 nu Beni-Geberi ku Ramoti mu Gileadi abezaga na miino za Yairi mwana wa Manase zili mu Gileadi, lingo abezaga na kisi kya Argobu kili mu Basani, miino minene makumi mutuba za bitutu nu bilimba bya byuma; 14 nu Ahinadabu, mwana wa Ido mu Mahanaimu; 15 nu Ahimasi mu Nafutali, (asongile Basemati, mukinga wa Solomono); 16 nu Bana, mwana wa Husayi mu Aseri nu Bealoti; 17 nu Yosafati, mwana wa Parua mu Isakari; 18 nu Simei mwana wa Ela, mu Benjamina; 19 nu Geberi, mwana wa Uri mu kisi kya Gileadi kyabezaga kisi kya Sihoni, mukota wa baAmori nu kya Ogi mukota wa Basani, nu we abezaga mulolezi wenyene tugu mu kikyo kisi. 20 BaYuda nu baIsraeli babezaga anga misege za mutili wa kitatenge; baliaga nu banuaga nu babogagabogaga.
Magala ma Solomono
21 Solomono angatile makota mansania kutukila ku luuzi lunene lwa Furati nu ku mwaga wa kisi kya baFilistini aaba nu ku mwaga wa Misri. Bavule na mitulo nu kukambila Solomono bindi binsania bya kalamo kage. 22 Busi na busi, Solomono aliaga nzi makumi masatu za bunga bwa ngano nu makumi mutuba za ngano, 23 nu ngombe ikumi zanona nu ngombe makumi mabili zatugwa nu mikoko nkama inazi nu makumi matano, nu tuseti nu mibale nu tungolo nu nkoko zanona. 24 Kubuno angatile kisi kinsania kya lisa lya luuzi, kutukila ku Tifusa aaba nu ku Gaza. Bakota banse ba bisi bibyo babezaga kunsi kwage, nu abezaga na bubobelelo ku ndenge insania. 25 Kutukila Dani nu kubasa ku Beri-Seba, baYuda nu baIsraeli beikede na bubobelelo bindi binsania bya Solomono, nawe nawe mu mpololo za muzabibu wage nu mutini wage.
26 Solomono abezaga na mikumba za farasi nu za tuyanga tununu makumi manazi (40.000) nu bakoloboyo ba farasi tununu ikumi nu tubili (12.000). 27 Balolezi bakungaga mukota Solomono nu bansania baliaga ku meza ma mukota, bavwaga n'idia nawe na mwezi wage. Tabeidile kena. 28 Shayiri, nu mpepa ku farasi za tuyanga nu ku engo farasi, bavule nazo ku kiziki kyabezaga mwangati, nawe anga makakizio maakasilwe.
Menge ma Solomono
29 Nu Kalaga akasile Solomono menge nu bumenyinino bunene nunse mu mutima, anga bwingi bwa misege zili ku mutili wa kitatenge. 30 Menge ma Solomono matingile menge ma bantu bansania ba bisi bya kukutukaga kisongo kya busi nu menge mansania ma Misri. 31 Kubuno abezaga na menge kutinga bango bantu bansania, kutinga Etani muEzera nu Hemani nu Kalkoli nu Darda, bana ba Maholi nu lukumu lwage lwakukile mu bilongo bya ndenge insania. 32 Nu atendile misumo tununu tusatu (3.000), nu nimbo zage zabezaga kanunu nu itano (1.005). 33 Asambede na menge mage bitondo bya lukita lwa bisugu, kutukila ku muti munene wa mwerezi guli ku Lebanoni nu kubasa ku hisopo, u iduba likwasaga mu kitutu; lingo alolesizie bitondo bya nyama, tuzoni nu bibyo bikugelegeta gansi nu byena. 34 Ku bilongo binsania, kwatukile bantu kuvwa kungwilila ku menge ma Solomono nu bantu basingilwe na bakota bansania ba kisi, bongwaga ku lukumu lwa menge mage.