Kusonga kwa Solomono
3
1 Solomono akitile bwida na Farao, mukota wa Misri. Asongile mukinga wage; avule nage mu mwino wa Davidi aaba nu gaasilile kobaka numba zage nu numba za Yehowa nu kitutu kya kutimba Yerusalema. 2 Tondo bantu bakitaga bisansa ga nkangamo kubuno kwabezaga takobakwa numba ku izina lya Yehowa mu bibyo bindi. 3 Solomono elamine Yehowa nu ayangile milembe z'isi Davidi, tondo akasanaga bisansa nu kugisia bulago ga biziki byalanga. Bisansa nu masego ma Solomono
4 Nu mukota endile ku Gibeoni buno akasane tuyulo kuko; kubuno ukwabezaga nkangamo nnene. Solomono akasenne kanunu ka tuyulo ga kako kasenga. 5 Nu ku Gibeoni, Yehowa abaside Solomono mu ndozi mu kindi, nu Kalaga amubwide bunee: “Sega kyukutunda nakukasa.”
6 Nu Solomono akwide bunee: “Wakitide mukiti wobe tatane Davidi mponga nnene kubuno endile mu bulili lwabusio lwobe nu kwisanana kwa mutima musoga kuguli; wamulangide bubo busoga bunene kubuno wamukasile mwana wamulume wikala ga kisumbi kyage kya bukota anga buli lelo. 7 Ee, Yehowa, Kalaga wane, kano kaluma wabikile mukiti wobe abe mukota ga kiziki kya tatane Davidi, nu nne nili mwana mukeke tugu. Nsili na menge ma kutuka nu kwingila. 8 Nu mukiti wobe eli munkatini mwa bantu bobe bawasombwede, u bantu beingi batanavwama kuganzwa aba kumenyininwa maganzo mabo ku kabamba ka bwingi bwabo. 9 Ububo, nkase mutima wa menge buno niatulile bantu bobe, kumenyinina busoga nu bubi bwabo. Kubuno nazi unavwama kwangata kikino kilongo kyobe kinene?”
10 Nu bubo bwasegile Solomono bwatananizizie Yehowa. 11 Nu Kalaga abwide bunee: “Kubuno wasega kitondo kikino aba ntwasega kalamo ka bindi bingi aba kutunda bugumi bwingi aba kutasega kukua kwa beiti bobe, tondo wisegela menge buno umenye kwangata na bulili, 12 nakukasa mutima wa menge nu wa bumenyinino. Ububo, takukaba aba lwabusio lwobe aba kumbusa kwobe, muntu anga uwe. 13 Lingo, nkukukasa bigutasegile: bikulo nu lwanzo, nu mu bindi byobe binsania takwabe muntu munkatini mwa bakota bansania anga uwe. 14 Ndi watabanga mu nzila zane, nu kukokomezia milembe zane, nu makakizio mane anga bwakitile so Davidi, nti natalikile ku bindi byobe.”
15 Solomono ayukile, nu kasi zabezaga ndozi. Asubizie ku Yerusalema, nu emenne lwabusio lwa Sanduku z'Idagano lya Yehowa. Akitile bisansa bya kugisia nu kayulo ka bubobelelo, kumbusa akitide bakiti bage bansania kisagulo.
Menge ma Solomono kwatula mulondo.
16 Kumbusa, bakikulu babili bitazi, bavule ku mukota nu bemenne lwabusio lwage. 17 Umozi ku babo atendile bunee: “Ee, mukota wane, nne nu mukikulu wono twikalaga mu numba emozi, nu nne nabutile mwana ganabezagile gamozi nage mu numba. 18 Kumbusa kwa bindi bisatu bya ganibutila, mukikulu wono abutile nu we, nu takwabezagile ungo gamozi n'iswe mu numba, twabezagile tubabili tugu. 19 Nu mwana wa wono mukikulu akule mu kindi, kubuno amulimbile. 20 Ayukile munkatini mwa kindi, atolile mwana wane u nabezagile nage, gabezagile mukiti wobe eiyombeka, nu amubikile ku bukuba bwage, nu wozo wage wabezagile wakua amubikile ga bukuba bwane. 21 Ganayukile mu nindunindu kumomia mwana wane, kasi akua. Tondo gakede busi, namulolile nunse kumusongolola, nu kasi ta mwana wane u nabutile.”
22 Nu wozo ungo mukikulu atendile bunee: “Ta bubo, mwana wane u wozo uli na kalamo, nu mwana wobe u wozo wakule.”
Nu munyage atendile bunee: “Ta bubo, mwana wobe u wakule nu mwana wane u guli na kalamo.” Ububo bendile myango lwabusio lwa mukota.
23 Mukota atendile bunee: “Umozi akutenda buno mwana wono uli na kalamo eli wane nu wozo wakule eli wobe. Nu ungo akutenda buno ta bubo, tondo mwana wakua eli wobe nu mwana uli na kalamo eli wane.” 24 Nu mukota atendile bunee: “Mumvwile na mwene.” Bavule na mwene ku mukota. 25 Mukota atendile bunee: “Atazi mwana uli na kalamo byindi bibili, mukase wono kyindi nu wono ungo kyindi.”
26 Bubo mukikulu wabezaga nyene mwana uli na kalamo abede na kabebe ku kabamba ka mwana wage nu abwide mukota bunee: “Ee, mukota wane, mukase wozo mwana uli na kalamo, ntwite mwana nunse.” Tondo ungo atendile bunee: “Ntabe wane aba wobe, atwe tugu.”