Bitondo bizinda bya Davidi.
23
1 Bibino u bitondo bizinda byatendile Davidi: “Davidi mwana wa Yese, muntu wasakikwa na Wozo Wasakama Nunse;
Mubongibwa wa Kalaga wa Yakobo;
Kalongo kasoga ka baIsraeli.
2 Muuza wa Yehowa akutenda mundi,
Nu moki mage meli mu kanua kane.
3 Kalaga wa Israeli atendile, Lwanda lwa Israeli ambwide bunee:
‘Wozo angata bantu na kwisanana, angata na kukua Kalaga boba.
4 Wozo abe anga kyengi kya nindunindu nkungu za kusanuka kwa busi
Bwa nindunindu ziteli na lutundutundu,
Nu anga musi kumbusa kwa mbula gukwasia nsamba nto mu kisi.’
5 Lebelebe numba zane zalindibwa na Kalaga,
Ankitide idagano lya milyalya.
Lyalongekilwe na magala, kubuno bili lonio lwane lunsania,
Nu lutundo lwane lunsania.
6 Tondo bagi bansania babe anga mikele za kwiswa,
Kubuno tabunakulungana kubakata na maboko.
7 Tondo muntu witubya kubo,
Ngabo zage zatunganana kuba za byuma, aba mulanga w'isumo;
Nu bo bamuzikye na keiya mu kikyo kiziki.”
Mapuka ma Davidi.
8 Mamano meli meina ma mapuka ma Davidi: Yosebu-Basebeti muTakemoni, mukota wa basatu; amaninwe Adino muEsini, witile nkama kinana n'isumo lyage lya bita mu busi bumozi. 9 Kumbusa kwage kwabezaga Eleazari, mwana wa Dodayi, wa ku Ahoa, umozi wa mapuka masatu gamozi na Davidi nkungu zakindile baFilistini. Bakundamenne ku bita, nu bantu ba Israeli batinine. 10 Emenne nu kulibula baFilistini nu kuboko kwage kwakutilwe, nu mwene walandile mu kuboko kwage. Yehowa akitile lonio lunene busi bubo, kumbusa bantu basubizie kukata ntiko. 11 Kumbusa kwage kwabezaga Sema, mwana wa Age muHarari. BaFilistini babezaga bakundamana kibombo ku kiziki kyabezaga isoa lya kasimbo, nu baIsraeli batinine lwabusio lwa baFilistini. 12 Tondo emenne mu isoa, alilwanine nu eitile baFilistini, nu Yehowa akitile lonio lunene. 13 Mapuka masatu ma babo makumi masatu bagelile ku Davidi nkungu za matubulo nu ku tulimba twa Adulamu; iyombo lya baFilistini liyombekile ido mu mpinga za Refaimu. 14 Nu mu nkungu zezo, Davidi abezaga mu kiziki kyalanga kya magala, nu bakoloboyo ba baFilstini babezaga mu Betelehemu. 15 Davidi abede na lutundo nunse, abuzizie bunee: “Songo muntu anannusia mazi ma kanuabalongo ku Betelehemu, keli ku isula lya mwino buno ninue.” 16 Mamo mapuka masatu matingile mu iyombo lya baFilistini. Batagile mazi mu kanuabalongo ka Betelehemu kabezaga ku isula lya mwino. Bamatagile nu kumalusia ku Davidi, tondo ntazigile kunua. Amakubwide lwabusio lwa Yehowa. 17 Nu atendile bunee: “Ee Yehowa, bube bulazi kundi kukita kitondo kikino. Ndi nanue mikila za bantu bagabula tulamo twabo?” Ku bubo ntatundile kunua mazi mamo. Mapuka masatu makitile bitondo bibino.
18 Abisayi, mubuto wa Yoabu, mwana wa Zeruya, abezaga mukota ku babo basatu. Eitile bantu nkama isatu n'isumo lyage. Abede na lukumu lunene bumozi na babo basatu. 19 Ndi ntabezaga mwiya lwanzo kutinga babo basatu? Ububo abikilwe mukota wabo, tondo ntagelamine na babo basatu batangi. 20 Benaya mwana wa Yehoyada abezaga ipuka lya Kabuseli, wakitile bitondo binene; eitile bana babili ba Arieli wa Moabu; agelile lingo nu eitile kimbwe mu muzinga nkungu za mpego. 21 Nu eitile muMisri muntu mulazi wabezaga n'isumo mu kuboko kwage, tondo agelile kweli na kati. Atikizye isumo mu kuboko kwa muMisri nu amwitile nalyo. 22 Benaya, mwana wa Yehoyada, akitile bitondo bibino, nu abede na lukumu anga mamo mapuka masatu. 23 Abezaga mwiya lwanzo kutinga babo makumi masatu, tondo ntaganzilwe na babo basatu ba kulinga. Davidi amubikile gantata balangi bage.
24 Munkatini mwa makumi masatu: Asaheli, mubuto wa Yoabu, nu Elihanani, mwana wa Dodo wa ku Betelehemu, 25 nu Sama nu Elika baHarodi, 26 nu Helesi muPalti nu Ira mwana wa Ikesi muTekoa, 27 nu Abiezeri muAnatoti, nu Mebunayi muHusa, 28 nu Zalmoni muAhoa, nu Maharai muNetofati, 29 nu Heledi, mwana wa Bana muNetofati, nu Itai, mwana wa Ribai wa ku Gibea wa baBenjamina, 30 nu Benaya muPiratoni, nu Hidayi wa mpinga za Gaasi, 31 nu Abi-Alboni muArabati, nu Azimaweti muBarihumu, 32 nu Eliabu muSalaboni wa baYaseni, nu Yonatani, 33 mwana wa Sama muHarari, nu Ahiamu, mwana wa Sarari muHarari, 34 nu Elifeleti, mwana wa Ahasibayi muMakati, nu Eliamu, mwana wa Ahitofeli muGilo, 35 nu Hesiro muKarmeli, nu Parayi muAraba, 36 nu Igali, mwana wa Natani wa ku Zoba, nu Bani muGadi, 37 nu Zeleki muAmoni, nu Naharai muBeroti, u mweki wa ngabo za Yoabu mwana wa Zeruya, 38 nu Ira nu Garebu baItiri, 39 nu Uria muHiti. Babezaga bansania makumi masatu nu mutubakamo.