Kwaga kwa Davidi mu kuganza bantu.
24
1 Bongoa bwa Yehowa bwabede bukali ku baIsraeli. Asindikile Davidi kuganza baIsraeli nu baYuda. 2 Ububo mukota abwide Yoabu, mukota w'iyombo wabezaga gamozi nage bunee: “Timba kano kaluma munkatini mwa bikanga binsania bya baIsraeli, kutukila Dani nu kuzindila ku Beri-Seba. Ganza bantu buno nimone gabegezie.” 3 Yoabu akwide mukota bunee: “Yehowa, Kalaga wobe, atalikile bantu mambizi lukama, buno mukota wane abamoneko, tondo buni buukubogaboga mu kitondo kikino?”
4 Tondo mukota akindile Yoabu nu basondelezia ba bakoloboyo, nu bendile kuganza bantu ba Israeli. 5 Basokile Yordani nu balingile kuganza mu Aroeri, kutukila ku mwino guli munkatini mwa mpinga za baGadi aaba nu ku Yazeri. 6 Bavule ku Gileadi, nu ku kisi kya Tatimu-Hodisi; bavule ku Dani-Yani, nu kutimba ku Sidoni. 7 Bavule ku mukolo wa magala wa Tiro, nu ku miino insania za baHivi, nu za baKanana, aaba nu ku Negevi wa Yuda, ku Beri-Seba. 8 Gabasilile kutimba mu kisi kinsania, basubizie ku Yerusalema kuzinda kwa myezi mubula nu bindi makumi mabili.
9 Yoabu akasile mukota maganzo ma bantu bansania. Kwabezaga baIsraeli mapuka, beiya magala tununu nkama kinana (800.000), nu bantu ba Yuda babezaga tununu nkama itano (500.000).
Davidi asombola lusungio.
10 Kumbusa kwa kuganza bantu Davidi abede na mpipi. Abwide Yehowa bunee: “Ee Yehowa, nagile ku kitondo kinakitile, tondo kano kaluma nkukusega kutikya bwagi bwa mukiti wobe, kubuno nakitile na bukongolo nunse.” 11 Gayukile Davidi nindunindu, iyuki lya Yehowa lyavule ku mulengania Gadi, mulaguzi wa Davidi, lyatendile bunee: 12 “Enda nu tenda ku Davidi, buno Yehowa atenda bunee: ‘Nabika bitondo bisatu lwabusio lwobe. Sombola kimozi kinikukitila.’” 13 Ububo Gadi avule kuli Davidi nu amubuzizie bunee: “Ndi myaka mutubakamo za nzala zibe mu kisi kyobe? Aba utine myezi isatu lwabusio lwa beiti ndi bakupumbia? Aba, bindi bisatu bya nsambo bibe mu kisi kyobe? Kala lwango kano kaluma, nu kengela iyakulo ikizi linasubye ku wozo wansingile.”
14 Davidi amwakwide bunee: “Nakatwa na tubebe nunse. Tukoloke mu kuboko kwa Yehowa, kubuno kyombo kyage kili kinene, nu nsikoloke mu kuboko kwa bantu.” 15 Ububo Yehowa asingile lusambo lukali munkatini mwa baIsraeli, kulinga mu nindunindu aaba nu ku nkungu zakakizizibwe. Bantu tununu makumi mutubakamo (70.000), bakule kutukila Dani aaba nu ku Beri-Seba. 16 Mwanzelo alambizie kuboko kwage ku lulenge lwa Yerusalema kuguzikya, tondo Yehowa eiyanizie ku bubi bubo, nu abwide mwanzelo wozo wazikagia bantu bunee: “Bwakuka! botya kuboko kwobe.” Nu mwanzelo wa Yehowa emenne ku mulungu wa kupepa wa Arauna muYebusi.
17 Gamonine Davidi ku mwanzelo witaga bantu, abwide Yehowa bunee: “Nagile, nne nakitile bubi, tondo mikoko zeno zakitile kikizi? Kuboko kwobe kube kundi, nu ku numba za tatane.”
18 Gadi avule kuli Davidi, nu amubwide bunee: “Zanzuka, kita kasenga ka kisansa ku Yehowa ga mulungu wa kupepa wa Arauna muYebusi.” 19 Davidi akitile anga bwatendile Gadi, anga bwakakizizie Yehowa. 20 Gamonine Arauna ku mukota nu bakiti bage bakuvwa kweli, akumbaminne lwabusio lwa mukota.
21 Arauna abuzizie bunee: “Kubuni mukota wane avwila mukiti wage?”
Davidi amwakwide bunee: “Kukunza mulungu wa kupepa wobe buno nobakile Yehowa kasenga ka kisansa, buno lusambo lukali lusile mu bantu.”
22 Arauna abwide Davidi bunee: “Mukota wane atole nu kukita anga bwakukengela buli busoga. Ntukumona, kuli ngombe za kayulo ka kugisia, nu bisanga nu byakututa ku nkuzi. 23 Ee mukota, bibino bintu binsania, Arauna abikasa ku mukota.” Arauna abwide lingo mukota bunee: “Yehowa, Kalaga wobe, akwitabizie.”
24 Mukota akwide Arauna bunee: “Kilo, lebelebe nabikunze kuguli. Nsyakase Yehowa, Kalaga wane, kisansa kya kugisia kinsyaliga.” Bubo Davidi akunzile mulungu wa kupepa nu ngombe ku byindi makumi matano bya feza. 25 Davidi obakide Yehowa kasenga ka kisansa gago. Akasile bisansa bya kugisia nu bisansa bya bubobelelo. Bubo Yehowa eitabizizie masego ku kabamba ka kisi. Lusambo lukali lwasilile munkatini mwa baIsraeli.