Lwimbo lwa Davidi.
22
1 Davidi eimbide Yehowa bitondo bya lwimbo luluno ku busi bwamonezie ku beiti bage bansania nu ku Saulo. 2 Atendile bunee: “Yehowa eli lwanda lwane, nu mukolo wane wa magala, nu Monia wane.
3 Kalaga wane eli lwanda lwane, nakulemanina;
Eli ngabo zane nu magala ma lonio lwane,
Kiziki kyane kyalanga, nu itinino lyane;
Monia wane wanonia kutuka mu lukuo.
4 Namane Yehowa watunganana kuganunwa,
Ububo nonibwe ku beiti bane.
5 Nabezaga bwigi na kukua nu babi babezaga anga maziba makunitia boba.
6 Mizigi za lukuo zankandile nu nakatilwe mu matega ma lukuo.
7 Mu mbabazio zane namanine Yehowa,
Ububo nalilide Kalaga wane.
Ongule iyuki lyane kutuka ku kiziki kyage,
Nu idilo lyane lyabasile ku matuzi mage.
8 Nu kisi kyatengatenga nu kugilimina, igulu lyasogonsile nu kutengatenga,
Kubuno ongilwe.
9 Muuki watukile ku mwembe wage, nu keiya ku kanua kage;
Nu kagisizie makangania mabangizibwe nako.
10 Akumbamizie igulu, nu agelile;
Nu kapilo kanene kabezaga kunsi kwa magulu mage.
11 Endile gantata ga kerubi. Alengile.
Ububo amonekile mu lumpumpu.
12 Akitile kapilo mu hema zage kumutimba,
U bimpa binene bya mbula nnene bya kwigulu.
13 Lwabusio lwage lwasanaga anga makangania meli na keiya.
14 Yehowa akitile mukenzi kutuka kwigulu.
Wozo Wasakama Nunse alalukile n'iyuki lyage.
15 Eisile misungu, azibalanganizie
Nu mikenzi zazangiziezangizie beiti bane nu kubatinia.
16 Matingilo mamonekile mu kitatenge
Nu kibanza kya kisi kyabiswidwe na kutonda kwa Yehowa,
Nu kwitila kukali kwa muuza wa myembe zage.
17 Agelile nu ankatile
Kuntikya mu maziba mazindu.
18 Anonezie ku magala ma beiti bane nu ku babo bansomba,
Kubuno babezaga na magala kuntinga.
19 Bavule kundi ku busi bwa kabebe kane;
Tondo Yehowa andemaninne.
20 Ambikile ku biziki binene lingo;
Anonezie, kubuno anelaminne.
21 Yehowa ankasile mugelo ku kwisanana kwane;
Andigile ku kwenga kwa maboko mane.
22 Nakokomezizie nzila za Yehowa,
Nu nsyendile bulazi na Kalaga wane ku bwagi.
23 Nsungio zage insania zabezaga lwabusio lwane;
Nsyasigile milembe zage.
24 Nsyagile ku meiso mage,
Nidangile bubibu ku bwagi bwane.
25 Ububo Yehowa andigile ku kwisanana kwane,
Nu ku kwenga kwane ku meiso mage.
26 Ku mukatizia nti widolesia Wisanana,
Nu ku wasililila nti widolesia Wasililila.
27 Ku wozo wenga nti widolesia wenga,
Nu ku mwagi nti widolesia musombi.
28 Nu wonie bantu bakubabazibwa;
Tondo ukumona ku beiya lwikotio nu kubakegia.
29 Uli kasuku kane, ee Yehowa,
Nu kyengi mu kapilo kane.
30 Ububo nkukinda iyombo,
Nu nkubakama gantata kitutu ku magala ma Kalaga wane.
31 Nzila za Kalaga zili zasililila,
Idagi lya Yehowa lili lyasililila,
We eli ngabo ku bansania bamukatizia.
32 Nazi uli Kalaga ndi ta Yehowa?
Nu nazi uli lwanda ndi ta Kalaga weitu?
33 Kalaga eli mukolo wane wa magala,
Nu We akusililizia nzila zane.
34 Ankasa magala ma kusasia anga kilinkumbi,
Akunemania gantata kiziki kyasakama.
35 Akwigisia maboko mane kwitana bita,
Nu kugonda bunkanda bwa nsubi.
36 Wankasile ngabo zobe za lonio,
Nu kola kobe kwankuzia.
37 Watanwine masomoneno mane,
Nu magulu mane tamaselemuka.
38 Nayangile beiti bane nu kubazikya,
Nsyagalukile lingo aaba nu gabazikizibwe.
39 Nabasilile nu kubalibula nunse,
Nu tabavwamine kuzanzuka lingo,
Bagoa kunsi kwa magulu mane.
40 Wamvwalikizie na magala ma kwitana bita,
Wababikile kunsi kwane babo bemana kunitania.
41 Wakitile beiti bane kunida mugongo,
Nisile babo bansomba bulazi.
42 Balilile, tondo takuli wakubonia,
Aba nu ku Yehowa tondo ntabakwide.
43 Nababungwide nunsania anga mukungu wa kisi,
Nabanyantile anga bisogo bya mu nzila.
44 Uwe wanonezie ku myango za bantu bane,
Wandangile kuba mukota wa bilongo
Nu bantu banteizi bankitide.
45 Bageni beibotye lwabusio lwane,
Nkungu zibannungwilile, bannanze.
46 Bageni batamba,
Nu bo bavwa bagilimina kutuka ku kiziki kyabo kyalanga.
47 Yehowa akulama! Lwanda lwane lusimwe!
Kalaga wa lwanda lwa lonio lwane aganunwe.
48 Kalaga ukunkasaga musubo,
Nu kugezia bantu kunsi kwane.
49 Wanonezie ku beiti bane,
Ee, wanzanzula kubeli bemana kunsakya,
Wanonia ku muntu mukali.
50 Ee Yehowa, ku kabamba kako nakubogelabogela mu bilongo,
Nu nne nimbile luganuno ku izina lyobe.
51 Akonia mukota wage mambizi mengi,
Alolesie busoga ku mubongibwa wage,
Ku Davidi nu ku ibuta lyage ku milyalya.”