Myaka isatu za nzala.
21
1 Kwabede nzala ku bindi bya Davidi, mwaka na mwaka ku myaka isatu. Ububo Davidi asegile ku Yehowa. Yehowa atendile bunee: “Nzala zili ku kabamba ka Saulo nu ku kabamba ka kikanga kyage kubuno kikubasia mikila, beitile baGibeoni.” 2 Davidi amanine baGibeoni. (BaGibeoni tababezaga baIsraeli, tondo basigede ku baAmoni nu baIsraeli bakitile nabo idagano. Saulo alondile kubeita, kubuno abezaga n'iyilili ku baIsraeli nu baYuda.) 3 Davidi abuzizie baGibeoni bunee: “Nimukitile buni? Nu nikite malonga na kikizi buno nivwame kukasa mponga ku bwiyani bwa Yehowa.” 4 BaGibeoni bamubwide bunee: “Takili kitondo kya feza nu olo gatusamba na Saulo nu kikanga kyage, nu takili kitondo kyeitu kwita muntu mu Israeli.”
Davidi ababwide bunee: “Kimwatendage nti namukitile kyo.”
5 Bakwide mukota bunee: “Muntu watwitile nu kutukitila lwango buno tuzikibwe nu kutikibwa mu myaga insania za baIsraeli, 6 batugabulile bana bage mutubakamo, twabakame lwabusio lwa Yehowa ku Gibea wa Saulo, wasombwedwe na Yehowa.”
Mukota abakwide bunee: “Nabagabule.” 7 Tondo asigile Mefibosete, mwana wa Yonatana, mwana wa Saulo, ku kabamba ka kilumbilo kyalumbilenne ba Davidi na Yonatana lwabusio lwa Yehowa. 8 Tondo atolile bana babili ba Risipa, mukinga wa Aya, wababutide Saulo, nu bana batano ba Mikali mukinga wa Saulo, baabutide Adrieli mwana wa Barzilayi muMehola. 9 Abagabwide ku maboko ma baGibeoni, nu babakamine ku mwiduko lwabusio lwa Yehowa, nu bakule bansania mutubakamo gamozi. Babeitile mu bindi bya matubulo, ku kindi kitangi kya matubulo ma shayiri. 10 Kumbusa Risipa, mukinga wa Aya, atolile ikunino, alyanzile ga lwanda, kutukila kulinga kwa matubulo aaba nu kuloka kwa mbula, ntazigile tuzoni twa kwigulu, aba nyama za mu lubanda kubasa ku bitumba bibyo aba mu musi aba mu kindi. 11 Basambalide Davidi bwakitile Risipa, mukinga wa Aya, kalemba ka Saulo. 12 Davidi atolile makwa ma Saulo nu ma Yonatana mwana wage ku bantu ba Yabesi-Gileadi, mabeibile ku Beti-Sani, kiziki kyabakamine baFilistini, bindi bibeitile Saulo mu Gilboa. 13 Atikizye makwa ma Saulo kuko nu ma Yonatana mwana wage nu bakundamanizie makwa ma babo bakaminwe. 14 Bayikile makwa ma Saulo nu Yonatana mwana wage mu kisi kya Benjamina, ku Zela, ku nsinda z'isi Kisi; bakitile bunsania bwakakizizie Davidi, kumbusa kwa bubo Kalaga ongule masego masegedwe kisi.
15 BaFilistini beitenne bita na baIsraeli. Davidi endile na bakiti bage nu beitenne na baFilistini, tondo Davidi akutilwe. 16 Nu Isibi-Benobi abezaga wa bana ba muntu mulazi nunse. Buzitu bw'isumo lyage bwabezaga shekeli nkama isatu za nsubi. Eiyanikile mwene muto mu kibunda kyage, nu akengede kwita Davidi. 17 Tondo Abisayi mwana wa Zeruya amukasizie. Eitile muFilistini wozo. Nu bantu ba Davidi bamubwide bunee: “Ntwende ku bita gamozi n'iswe, unavwa kuzimia kasuku ka Israeli.” 18 Kumbusa kwa bubo, beitenne lingo na baFilistini ku Gobu. Kuko Sibekayi, muHusa, eitile Safu, mwana wa muntu mulazi nunse. 19 Kwabezaga lingo bita na baFilistini ku Gobu; Elihanani, mwana wa Yare-Oregimu, muBetelehemu, eitile Goliati muGiti, mwiya w'isumo lyage wabezaga munene nu mubibu.
20 Kwabezaga bita lingo ku Gadi na muntu mulazi nunse. Abezaga na minwe mutuba ku kuboko na kuboko, nu mpanda mutuba ku kugulu na kugulu. Insania zabezaga makumi mabili nu inazi. Abutilwe na muntu mulazi nunse. 21 Eitilwe na Yonatani, mwana wa Simei, mubuto wa Davidi. 22 Babano banazi babutilwe ku muntu mulazi nunse mu Gati, nu beitilwe na Davidi nu bakiti bage.