Kuguna kwa Seba.
20
1 Gago gabezaga muntu wa lugwagwa; izina lyage Seba, mwana wa Bikiri, muBenjamina. Idile monze nu kutenda bunee: “Tatuli na kena mu Davidi. Tatuli na bwiyani mu mwana wa Yese. BaIsraeli, muntu na muntu ende ku numba zage.” 2 Bubo baIsraeli bansania batukile kuyanga Davidi. Bayangile Seba mwana wa Bikiri, tondo baYuda balandenne na mukota wabo kutukila Yordani nu kubasa ku Yerusalema. 3 Davidi avule ku numba zage ku Yerusalema, nu amanine tuto tulemba ikumi twasigile kulanga numba zage, nu ababikile mu numba kulangwa. Abakasile idia, tondo nteiyombekile lingo nabo; nu bakandilwe aaba nu ku busi bwabo bwa kukua. Babezaga anga misigala mu kalamo kabo. Yoabu eita Amasa.
4 Mukota abwide Amasa bunee: “Kundamania baYuda kundi ku bindi bisatu, nu uwe ube gano.” 5 Nu Amasa endile kukundamania baYuda, tondo eizizizie kutinga bindi byakakizizibwe. 6 Davidi abwide Abisayi bunee: “Kano kaluma Seba mwana wa Bikiri atubabazia kutinga Abusaloma. Tola bakiti ba mukota wobe, mumuyange anavwa kwingila mu mwino guli na mukolo, nu kwiyonia.” 7 Bantu ba Yoabu nu baKereti nu baPereti nu mapuka mansania bendile na Abisayi. Batukile Yerusalema kuyanga Seba mwana wa Bikiri. 8 Babezaga bwigi na lwanda lunene luli mu Gibeoni. Amasa avule kukulumana nabo, nu avwalikibwa nsulu zage za bita nu abezaga na mukoma nu bupanga bwabezaga mu musagi mu kibunda kyage. Mwene watukile mu musagi nu kukoloka gansi. 9 Yoabu abuzizie Amasa bunee: “Mubuto wane, ndi uli busoga?” Yoabu akatile Amasa ku luzelu na kuboko kwage kwa seidume buno amumume. 10 Tondo Amasa ntalolile mwene wabezaga mu kuboko kwa Yoabu, nu amulibwidego munda, nu byamunda binsania byakolokile gansi; akule nu ntamulibwide lingo. Yoabu, nu Abisayi mubuto wage bayangile Seba mwana wa Bikiri. 11 Mukoloboyo umozi wa Yoabu emenne bwigi na Amasa, nu atendile bunee: “Wozo ukutunda Yoabu nu eli ku lulenge lwa Davidi ayange Yoabu.” 12 Kitumba kya Amasa kyasigede kikwibulubutia mu mikila zage mu nzila nnene. Gamonine wozo muntu buno bantu bansania bemana gago, atikizye kitumba mu nzila nnene nu kukitunda mu isoa; nu akikukide na nsulu. 13 Gatikizibwe Amasa mu nzila, bantu bansania bendile kumbusa kwa Yoabu, kuyanga Seba, mwana wa Bikiri.
14 Yoabu atingile mu bikanga binsania bya baIsraeli aaba nu ku Abeli wa Beti-Maka, nu ku baBeri, u bakundamenne nu kwenda nage. 15 BaYuda bavule kumutimba na bita, mu Abeli wa Beti-Maka. Nu bantu babezaga gamozi na Yoabu batumbizie mwiduko wa bisogo nu balingile kwendula kitutu kya mwino.
Kukua kwa Seba.
16 Mukikulu wa menge wa ku mwino emenne gantata kitutu nu kulaluka bunee: “Ungwililazi, nkumusega buno mubule Yoabu bunee: ‘Kunda gano nitendane nobe.’” 17 Amukundile, nu mukikulu amubuzizie bunee: “Uwe uli Yoabu?”
Akwide bunee: “Nili we.”
Nu amubwide bunee: “Ungwilila bitondo bya mukiti wobe.”
Akwide bunee: “Nkungwa.”
18 Atendile bunee: “Batendaga wakalazi buno, sega lwango ku Abeli! Nu binsania byazindilaga gago. 19 Nne nili umozi wa mwino wa bubobelelo nu bakatizia ba bukota bwa baIsraeli. Kubuni ukulonda kuzikya mwino wono guli anga nina ukulanga baIsraeli? Kubuni ukwita bwiyani bwa Yehowa?”
20 Yoabu akwide bunee: “Bube bulazi kundi kutikya aba kuzikya mwino. 21 Kitondo kikino takili bubo. Tondo muntu wa miduko za Efuraimu, izina lyage Seba, mwana wa Bikiri abengile mukota weitu Davidi. Ndi wamubasia, nti natuka mu mwino.” Mukikulu abwide Yoabu bunee: “Busoga; itoe lyage liswe kuguli kutukila kitutu.” 22 Mukikulu ku menge mage endile kusambalila bantu bansania. Basesile itoe lya Seba, mwana wa Bikiri, nu balisile ku Yoabu. Idile monze, nu babalangenne mu mwino. Muntu na muntu asubizie kwage, nu Yoabu asubizie ku Yerusalema ku mukota. 23 Yoabu abezaga munene w'iyombo linsania lya baIsraeli nu Benaya, mwana wa Yehoyada, abezaga munene wa baKereti nu wa baPereti. 24 Adoramu abezaga muligia wa kodi, nu Yosafati mwana wa Ahiludi, abezaga musanzi; 25 nu Sewa abezaga musanzi, nu Zadoki nu Abiatari babezaga basankoga; 26 nu Ira, muYairi, abezaga sankoga wa Davidi.