Yoabu akuzugila Davidi.
19
1 Yoabu abwidwe bunee: “Mukota akulilila Abusaloma nu kwizuzuma.” 2 Kukinda kwa busi bubo kwagalukizibwe kuba kwizuzuma ku bantu bansania; kubuno bongule bunee: “Mukota eli na kabebe ku kabamba ka mwana wage.” 3 Bantu beingide ku mwino busi bubo kubisama, anga bantu beli na nsoni bakutina bita. 4 Mukota eizibile meiso nu alilile n'iyuki inene bunee: “Ee mwana wane, Abusaloma, mwana wane, mwana wane Abusaloma!” 5 Yoabu eingide mu numba ku mukota nu amutendile bunee: “Lelo ukwitia na nsoni babo bonezie kalamo kobe nu kalamo ka basikila nu bakinga bobe nu ka bakikulu bobe nu tulemba twobe. 6 Ukusomba babo bakukutunda, nu ukutunda babo bakukusomba, kubuno walolesia lelo buno bakota nu bakiti bobe tabeli kena kuguli. Nkumenya lelo, songo Abusaloma alamaga, nu beiswe bansania twakua lelo, songo bunabede busoga kuguli. 7 Kasi zanzuka kano kaluma, nu kubasa kubibya bakiti bobe; nakulumbilila mu Yehowa, ndi ntwazanzuka, takwikale umozi gamozi nobe mu busi bubuno. Kitondo kikino kyabe kibi kuguli kutinga bitondo binsania bibi, kutukila busikila bwobe aaba nu kano kaluma.” 8 Ububo emenne nu eikede ku lwibi. Gasambalidwe bakoloboyo bansania bunee: “Mukota akwikala ku lwibi,” bavule lwabusio lwa mukota.
Davidi asubya ku Yerusalema.
9 BaIsraeli batinine na muntu na muntu ku numba zage. Bantu bansania mu bikanga binsania bya baIsraeli batendile bunee: “Mukota Davidi atwonezie ku beiti beitu, nu ku baFilistini; nu kano kaluma atina Abusaloma. 10 Nu Abusaloma u twabongezie mwambo buno atwangate, akua mu bita. Nu kubuni mwalindila tamwasubya mukota?”
11 Mukota Davidi asingile ku Zadoki nu Abiatari, basankoga, atendile bunee: “Tendazi ku bakulu ba Yuda bunee: ‘Kubuni inyuwe munaba ba kumbusa kusubya mukota ku numba zage? Kutenda kwa baIsraeli bansania kwabaside mukota buno asubye ku numba zage. 12 Inyuwe muli mibuto zane, ikwa lyane nu misuna zane nu kubuni inyuwe munaba bazinda kusubya mukota?’ 13 Nu mubule Amasa bunee: ‘Ndi ntuli ikwa lyane nu misuna zane? Nakulumbilila ku Kalaga buno wabe mukota w'iyombo lyane ku kiziki kya Yoabu.’” 14 Alutile mitima za bamulume bansania ba Yuda, buno babede na mutima umozi ku mukota, nu bamubwide bunee: “Subya, uwe nu bakiti bobe bansania.” 15 Ububo mukota asubizie. Avule ku Yordani. Nu baYuda bavule ku Gilgali kukulumana na mukota nu kumusokya Yordani.
16 Simei mwana wa Gera, muBenjamina, wabezaga wa ku Bahurimu, asasizie kugela gamozi na baYuda kukulumana na mukota Davidi. 17 Bantu kanunu kamozi (1.000) ba Benjamina, nu Ziba, mukiti wa numba za Saulo nu bana bage ikumi nu batano nu bakiti bage makumi mabili babezaga gamozi nage. Babasile ku Yordani kwabezaga mukota. 18 Ububo asokezie kikanga kya mukota nu kumukitila binsania byatundile. Simei mwana wa Gera agwede lwabusio lwa mukota mu nkungu zasilile kusoka Yordani. 19 Abwide mukota bunee: “Mukota wane, ntukengele bwagi bwa mukiti wobe gawatukile ku Yerusalema, ntulange bubo mu mutima wobe. 20 Kubuno mukiti wobe eigonga buno agile, ububo, lelo nili mutangi wa numba insania za Yosefu, kugela nu kukulumana na mukota wane.”
21 Tondo Abisayi mwana wa Zeruya abwide bunee: “Ndi Simei ntanakua ku kitondo kikino, kubuno alingile mubongibwa wa Yehowa?”
22 Davidi atendile bunee: “Nili na kikizi n'inyuwe, bana ba Zeruya, kubuno mukwidolesia beiti bane! Lelo muntu wampa ntakue mu Israeli. Ndi nsizi buno nili mukota mu baIsraeli?” 23 Kumbusa mukota alumbide Simei bunee: “Ntwakue.”
24 Mefibosete, mwana wa Saulo, agelile kukulumana na mukota. Ntogile ku magulu mage, nu kubega nzwili zage, aba kugalukya nsulu zage kutukila busi bwatukile mukota aaba nu busi bwasubizie na bubobelelo. 25 Gaatukile mu Yerusalema nu kukulumana na mukota, mukota amubuzizie bunee: “Mefibosete, ku kabamba kakizi ntwendile gamozi na nne?” 26 Amwakwide bunee: “Mukota wane, kubuno nili kitunga, nitendile bunee: ‘Niyanzile mpunda buno nimone kubakama gazo nu kwenda gamozi na mukota.’ Tondo Ziba, u mukiti wane, anengelede, 27 nu akandikile mukiti wobe ku mukota wane munene. Tondo mukota wane eli anga mwanzelo wa Kalaga, ububo kita anga buukukengela buli busoga. 28 Kubuno bansania ba numba za tatane babezaga bakuzi, tondo wabikile mukiti wobe munkatini mwa babo bakulia ku meza mobe. Busoga bukizi bunkulilila lingo ku mukota?”
29 Mukota amubwide bunee: “Buwatenda bwakuka. Nkutenda bunee: ‘Uwe nu Ziba mubegane kikyo kisi.’” 30 Mefibosete abwide mukota bunee: “Ee, atole binsania kubuno mukota wane avwa na bubobelelo ku numba zage.”
31 Nu Barzilayi muGileadi atukile ku Rogelimu ku Yordani kusokya mukota nu kumusindikizia. 32 Barzilayi abezaga mukulu nunse wa myaka makumi kinana. Abezaga akukasa mukota idia nkungu zabezaga ku Mahanaimu, kubuno abezaga mugumi. 33 Mukota abwide Barzilayi bunee: “Soka gamozi na nne, nu nti walia na nne mu Yerusalema.”
34 Tondo Barzilayi akwide mukota bunee: “Myaka zane za kulama ziseli inga buno nibakame gamozi na mukota ku Yerusalema? 35 Nili na myaka makumi kinana lelo. Ndi ninavwama kumenya lingo busoga nu bubi? Ndi navwama kusonda lingo kininalia nu kininanua? Ndi ninavwama kungwa iyuki lya bamulume nu bakikulu bakwimba? Kubuni mukiti wobe abe muzigo ku mukota wane munene? 36 Mukiti wobe akutunda kusoka Yordani tugu gamozi na mukota. Kubuni mukota andige mugelo anga wono? 37 Ziga mukiti wobe kusubya, nkukusega, buno nikue mu mwino wane, bwigi na nsinda za tatane nu mmane. Tondo mukiti wobe Kimuhamu anasoka gamozi na mukota wane, nu kumukitila anga buukukengela buli busoga.”
38 Mukota abwide bunee: “Kimuhamu asoke gamozi na nne, nu namukitile bukukutananizia. Nu kinsania kiwasege kundi nti nakukitile kyo.” 39 Bantu bansania basokile Yordani nu mukota asokile kumbusa kwabo. Mukota amumine Barzilayi ku matama, nu amukasile mponga. Barzilayi asubizie ku numba zage wenyene. 40 Nu mukota endile ku Gilgali nu Kimuhamu endile nage. Bantu bansania ba baYuda nu kyindi kya bibili kya baIsraeli bendile gamozi nage. 41 Bantu bansania ba Israeli bavule ku mukota, nu babwide mukota bunee: “Kubuni mibuto zeitu baYuda bakwibile, nu kusokya mukota nu kikanga kyage Yordani, gamozi na bantu bansania ba Davidi?” 42 BaYuda bansania bakwide baIsraeli bunee: “Kubuno mukota eli wa kikanga kyeitu. Kubuni mukongoa na kitondo kikino? Ndi twalia idia lya mukota aba atukasa mugelo?” 43 BaIsraeli bakwide baYuda bunee: “Tuli na byindi ikumi bya mukota, tuli beingi ku Davidi kutinga inyuwe. Kubuni mukutubenga. Lwango lweitu talwabede lutangi kusubya mukota weitu?” Moki ma baYuda mabezaga makali kutinga moki ma baIsraeli.