Nango za Ahitofeli nu Husayi.
17
1 Ahitofeli abwide Abusaloma bunee: “Nisombole kano kaluma bantu tununu ikumi nu tubili (12.000). Nu nne nende lubilo kuyanga Davidi mu kindi kikino. 2 Namukate gabe es'akutwa nu maboko mage matamba. Namwitie boba nu bantu bansania beli gamozi nage batine nu nite mukota tugu. 3 Kumbusa nasubye bantu bansania kuguli. Ukulonda muntu umozi tugu; tondo bango babe bulonge bukata.” 4 Lwango luluno lwatananizizie Abusaloma nunse, nu bakulu bansania ba Israeli. 5 Abusaloma atendile bunee: “Manazi kano kaluma Husai muArki lingo; tungwe ku bwatende.” 6 Gavule Husai ku Abusaloma amubwide bunee: “Ahitofeli atendile bubuno. Ndi tukite anga bwatendile? Ndi ta bubo, nti watenda.”
7 Husai abwide Abusaloma bunee: “Lwango lwakasa Ahitofeli limbizi lilino ta lusoga.” 8 Husai atendile lingo bunee: “Wizi so nu bantu bage buno beli mapuka, nu mitima zabo zikwina anga dubu zanyagwa byana byage. So eli muntu wa bita, nu nteiyombeke gamozi na bantu bage. 9 Abiswa mu kalimba aba mu kingo kiziki. Nu mu kulinga kwa bita, gabe bamozi kutuli bakindwa, nu unsania wungwage asasie kutenda bunee: ‘Babo bayangaga Abusaloma beitwa,’ 10 nu nti ipuka uli na mutima anga mutima wa kimbwe, atambe kubuno baIsraeli banse beizi buno so eli muntu wa bita, nu babo beli gamozi nage beli mapuka. 11 Tondo lwango lwane luli luluno: BaIsraeli bansania bakundamane kuguli kutuka ku Dani aaba nu ku Beri-Seba, anga misege za kitatenge ku bwingi; nu wende uwenyene ku bita. 12 Bubo twamubasile ku kiziki na kiziki kyamoneke ko, nu twabe kweli anga bususuli bukukoloka ga kisi. Tatwasige umozi kubeli, aba we, aba bantu bansania beli nage. 13 Lingo, ndi eingila mu mwino, nti baIsraeli bansania balusie mizigi ku mwino wozo, nu twagubulute ku luuzi, nu takwamoneke ikozi limozi ikeke ”
14 Abusaloma nu baIsraeli bansania batendile bunee: “Lwango lwa Husai muArki, luli lusoga kutinga lwango lwa Ahitofeli.” Kubuno Yehowa atundile kwita lwango lusoga lwa Ahitofeli buno alusie bubi ku Abusaloma. 15 Kumbusa Husai abwide Zadoki nu Abiatari basankoga bunee: “Ahitofeli akasa Abusaloma nu bakulu ba Israeli lwango bubo nu bubo. Nu nne nakasile lwango bubo. 16 Kano kaluma singazi yiliyili ku Davidi kutenda bunee: ‘Ntwiyombeke mu kindi kikino ku masokelo ma kalula, tondo bwatunganana usoke, buno mukota nu bansania beli nage tabakatwe.’” 17 Yonatani nu Ahimasi beiyombekile bwigi na Eni-Rogeli. Mukiti mukinga umozi endile kubasambalila, nu bo bendile nu kubula Davidi, kubuno tabakulungenne kwingila mu mwino nu kumoneka ko. 18 Tondo musikila umozi abamonineko nu asambalide Abusaloma. Batukile yiliyili bobabili nu bendile ku numba za muntu umozi muBahurimu. Abezaga na kanuabalongo mu mulungu wage, nu babisamine muko. 19 Mukikulu atolile kyuki nu kukibika gantata ga kanuabalongo. Akubwide ngano zatutwa gantata, nu bantu tabamenyine bwakitile. 20 Bakiti ba Abusaloma babaside mukikulu mu numba, bamubuzizie bunee: “Ahimasi nu Yonatani beli kuni?” Mukikulu ababwide bunee: “Basokile luuzi.” Kumbusa babalondile nu tababamonine, kusila basubizie ku Yerusalema. 21 Gabendile, Ahimasi nu Yonatana batukile mu kanuabalongo nu bendile kusambalila mukota Davidi bunee: “Tukazi. Musoke luuzi lubilo, kubuno lulo u lwango lwakasile Ahitofeli ku kabamba keinyu.” 22 Ububo Davidi nu bantu bansania babezaga gamozi nage basokile Yordani mu kukya kwa busi; takwidile umozi kutasoka Yordani.
23 Gamonine Ahitofeli buno lwango lwage talwayangilwe, anzile mpunda zage nu kwenda kwage. Alongekile numba zage nu eikamine wenyene. Ayikilwe mu nsinda z'isi.
24 Davidi abasile ku Mahanaimu. Abusaloma asokile Yordani, we nu bantu bansania ba Israeli gamozi nage. 25 Abusaloma abikile Amasa mukota w'iyombo ku kiziki kya Yoabu. Amasa abezaga mwana wa muntu umozi izina lyage Yeteri, muIsraeli, wasongile Abigaili mukinga wa Nahasi, muto wa Zeruya nina wa Yoabu. 26 BaIsraeli nu Abusaloma bakitile ido mu kisi kya Gileadi. 27 Gavule Davidi ku Mahanaimu akulumenne na Sobi muAmoni, mwana wa Nahasi wa Raba, nu Makiri mwana wa Amieli wa Lo-Debari, nu Barzilayi muGileadi wa ku Rogelimu. 28 Balusizie, migu nu bibungulu, nu nyungu zabumbwa, nu ngano, nu shayiri, nu bunga bwa ngano, nu mbuto zokibwa, nu tusimbo, nu nkunde, 29 nu buuki, nu manteka, nu mikoko, nu ngombe zanona. Babilusizie kuli Davidi nu bantu babezaga gamozi nage, buno bamone kulia, kubuno batendile bunee: “Bantu bakua na nzala nu bakutwa nu beli na mpusia mu kalula.”