Mukiti mubi wa Mefibosete.
16
1 Gatingile Davidi kuntata kwa mwiduko, Ziba mukiti wa Mefibosete akulumenne nage. Avule na mpunda ibili zanzwa na nsulu, nu gantata gazo gabezaga tumpampa nkama ibili twa ngano, nu bibombo lukama bya biguma, nu biguma lukama bya matubulo ma nkungu zezo, nu mbusu nnene za mazi ma biguma. 2 Mukota abuzizie Ziba bunee: “Bwisulilwa bukizi bwa bintu bibino?” Ziba amwakwide bunee: “Mpunda zili ku kikanga kya mukota buno babakame gazo. Tumpampa nu biguma nu matubulo ma nkungu zeno bili idia ku kabamba ka bana, nu maku ku babo beli basosu mu kalula buno banue.” 3 Mukota atendile bunee: “Mwana wa mukota wobe eli kuni?” Ziba abwide mukota bunee: “Akwikala mu Yerusalema, kubuno atenda bunee: ‘Lelo baIsraeli bansubizie bukota bwa tatane.’”
4 Mukota abwide Ziba bunee: “Binsania bili bya Mefibosete bili bikulo byobe.” Ziba atendile bunee: “Mukota wane, nakumbama, nimone mponga ku meiso mobe, ee mukota wane.”
Simei alinga Davidi.
5 Mu nkungu zabezaga Davidi es'abasa mu Bahurimu, muntu umozi atukile kuko, wa kikanga kinene kya Saulo, izina lyage Simei, mwana wa Gera. Abezaga akuvwa alingana. 6 Eisile Davidi makozi nu bakiti bansania, tondo bakoloboyo nu bantu bansania ba mukota Davidi babezaga ku kuboko kwage kwa seidume nu kwa seikazi. 7 Simei alingile Davidi bunee: “Tuka, tuka, uwe muntu wa mikila, nu lugwagwa. 8 Yehowa asila kusubya mikila insania za numba za Saulo kuguli, kubuno wangata mu kiziki kyage, nu Yehowa akasa bukota ku Abusaloma, mwana wobe. Watikibwa ku kabamba ka bubi bwobe kubuno uli mwiti.” 9 Abisayi, mwana wa Zeruya, abuzizie bunee: “Kubuni mboa zeno zikulinga mukota wane munene? Nsige, nisoke kwenda kusesa itoe lyage.”
10 Mukota atendile bunee: “Beinyuwe bana ba Zeruya, nili buni n'inyuwe? We akulingana kubuno Yehowa amubula bunee: ‘Linga Davidi.’ Nazi watende buno kubuni wakitile bubuno?” 11 Davidi abwide Abisayi nu bakiti bage bansania bunee: “Mwana wane u nabutile akulonda kalamo kane, embe wono muBenjamina? Musigazi alingane kubuno Yehowa u wamukakizizie. 12 Bubo Yehowa alole mibi zambasila nu andige busoga ku bubo bwandinga lelo.”
13 Davidi nu bantu bage bendile mu nzila nu Simei endile ku lungo lulenge lwa mwiduko kumulinga nu kumwisa makozi nu mukungu. 14 Mukota nu bantu bansania babezaga gamozi nage babasile kubendaga bakutwa bubibu nu bomuinue gago.
Abusaloma abasa ku Yerusalema.
15 Abusaloma nu bantu bansania ba Israeli bavule ku Yerusalema, nu Ahitofeli gamozi nage. 16 Gavule Husai muArki, mwida wa Davidi, kuli Abusaloma, abwide Abusaloma bunee: “Mukota alame, mukota alame.” 17 Abusaloma abuzizie Husai bunee: “Ndi bubuno buli busoga ku mwida wobe? Kubuni ntwatukile gamozi na mwida wobe?”
18 Husai abwide Abusaloma bunee: “Kilo; nikale gamozi na wozo wasombwedwe na Yehowa nu bantu babano nu baIsraeli, nu nabe wage. 19 Lingo, nazi u nakitile? Ndi nsyakitile mwana wage anga bunakitide so? U bubo bunakukitile.”
20 Abusaloma abwide Ahitofeli bunee: “Kasana lwango lwobe lutwakite.” 21 Ahitofeli akwide Abusaloma bunee: “Ingila ku tulemba twa so basigede kulanga numba, nu baIsraeli bansania bongwe buno wasombile so, nu maboko mabo mansania mabe na magala gamozi nobe.” 22 Ububo banzide Abusaloma hema gantata ga mutondo wa numba; Abusaloma eingide ku tulemba tw'isi lwabusio lwa baIsraeli bansania.
23 Lwango lwa Ahitofeli lwakasenne mu bindi bibyo lwabezaga anga muntu wabuzagia Kalaga. Ububo nango insania za Ahitofeli zitabizizibwe na Abusaloma anga buzitabizizibwe na Davidi.