Kwigonga kwa Davidi.
12
1 Yehowa asingile Natana kuli Davidi. Amutendile bunee: “Bantu babili babezaga mu mwino umozi; umozi mugumi, nu ungo muzambi. 2 Mugumi abezaga na mikoko nu ngombe ningi, 3 tondo muzambi ntabezaga na kena, tugu kyana kya mukoko kyakunzile nu kukilela. Akilisagia gamozi na bana bage nu kukinusia na kituma kyage, nu kukiyombekya ku bukuba bwage anga mukinga wage. 4 Nu mugeni abaside mugumi. Ntalolile ku mikoko zage, nu ngombe zage kuyikila mugeni idia, tondo atolile kyana kya mukoko kya muzambi wozo nu kuyikila mugeni wamuvwilide.”
5 Davidi ongilwe bubibu ku muntu wozo. Abwide Natana bunee: “Lebelebe muntu wakitile kitondo kikino atunganana kukua. 6 Nu we asubye kyana kya mukoko mambizi manazi, kubuno akitile bubo nu kutakwila muzambi kyombo.”
7 Natana abwide Davidi bunee: “Uwe u wozo muntu. Yehowa, Kalaga wa baIsraeli, atendile bunee: ‘Nakubongezie mwambo buno ube mukota wa baIsraeli nu kukwonia mu kuboko kwa Saulo. 8 Nakukasile numba za mukota wobe, nu bakikulu bage ku bukuba bwobe. Nakukasile kilongo kya baIsraeli nu baYuda; songo bitondo bibino byabezaga bikeke songo nakutalikide bingo gantata. 9 Kubuni wanyegile ikakizio lya Yehowa nu kukita bili bibi kweli? Witile Uria muHiti na mwene nu kutola mukazi wage buno abe mukazi wobe. Wamwitile na mwene wa baAmoni. 10 Ububo mwene tagukatuka ku numba zobe kubuno wambenga nu watolile mukazi wa Uria muHiti kuba mukazi wobe.’ 11 Yehowa atendile bunee: ‘Milondo zabase munkatini mwa kikanga kyobe; natikye bakikulu bobe lwabusio lwa meiso mobe nu kubakasa ku munyobe. Eiyombeke nabo gano musi ukukaka. 12 Wakitile kikyo mu lumbisombiso, tondo nakite kitondo kikino mu musi ukukaka lwabusio lwa baIsraeli bansania.’” 13 Davidi abwide Natana bunee: “Nagile.” Amwakwide bunee: “Yehowa asigilila bwagi bwobe; ntwakue. 14 Tondo, ku kabamba ka bwagi bubuno wakasa kiziki ku beiti ba Yehowa kulingana, lebelebe mwana u wabutile akue.”
15 Natana endile ku numba zage. Nu Yehowa asambizie mwana wa mukazi wa Uria u waabutile ku Davidi. Abede na lusambo lunene. 16 Davidi asegede mwana ku Kalaga; agilile idia, nu kwiyombeka kindi kigimagima gansi. 17 Bakulu ba numba zage bemenne muntungo nage, kumuzanzula, tondo ananine aba nu ntalide idia gamozi nabo. 18 Ku busi bwa mutubakamo, mwana akule. Bakiti ba Davidi bakule boba kumusambalila buno mwana alekana, kubuno batendile bunee: “Gabezaga mwana eikili na kalamo, twatendile nage nu ntungule ku iyuki lyeitu. Ndi ntanitila kwisungia ndi twamubula buno mwana alekana?” 19 Tondo gamonine Davidi buno bakiti bage bakutenda mu manungunungu, Davidi amenyine buno mwana alekana; abuzizie bunee: “Ndi mwana akua?” Bamwakwide bunee: “Alekana.” 20 Ububo Davidi azanzukile gansi, ogile nu eibongezie mwambo nu agalukizye nsulu nu eingide ku numba za Yehowa kumukumbamina. Kumbusa asubizie ku numba zage; asegile idia nu alide. 21 Bakiti bage bamubuzizie bunee: “Kitondo kikizi kikino kiwakita? Wagilile idia nu kulila ku kabamba ka mwana, gaabezaga eikili na kalamo, tondo gaalekana, wazanzuka nu kulia.” 22 Abakwide bunee: “Gabezaga mwana eikili na kalamo, nagilile idia nu kulila, kubuno natendaga bunee: ‘Nazi wizi ndi Yehowa anankwila kyombo buno mwana ntakue?’ 23 Tondo kano kaluma alekana, kubuni ninagila idia? Ndi ninavwama kumusubya lingo? Nende kweli, tondo we ntasubye lingo kundi.”
24 Davidi abibizie Bati-Seba, mukazi wage, nu eiyombekile nage. Abutile mwana nu amwinikile izina lyage Solomono; nu Yehowa amutundile. 25 Asingile Natana mulengania, kulolesia kitondo kikino nu kwinika mwana izina lya Yedidia anga bwakakizizie Yehowa ku Natana.
26 Nu Yoabu eitenne na Raba wa baAmoni, nu akindile mwino wa bukota bwabo. 27 Yoabu asingile migenzi ku Davidi kutenda bunee: “Nitenne na Raba nu nakindile tunuabalongo twago. 28 Kano kaluma kundamania bantu basigede, nu bika ido ku ntungo kwa mwino nu kugukinda. Ndi nagukinda, nti wamanwa mu izina lyane.” 29 Ububo Davidi akundamanizie bantu bansania nu bendile ku Raba. Eitenne nago, nu agukindile. 30 Atikizye mukota wabo nkumbu za bukota ku itoe lyage. Buzitu bwazo bwabezaga talanta emozi za olo nu makozi ma bukunza bubibu. Bazibikile ku itoe lya Davidi. Atolile bintu binsania byabezaga mu mwino. 31 Atolile bantu bansania ba mwino nu ababikile kukita mulimo wa kwata mbavu nu wa byuma bya kumba nu masaga ma kusinda nu ku mulimo wa kubumba mabiliki. Akitile bubo ku miino insania za baAmoni. Kumbusa Davidi nu bantu bansania basubizie ku Yerusalema.