Bwagi bwa Davidi.
11
1 Nu kulinga kwa mwaka muto, gendaga bakota nu bakoloboyo ku bita, Davidi asingile Yoabu nu bakiti bage bansania. Bazikizye baAmoni, nu batimbile Raba na bita. Tondo Davidi eikede ku Yerusalema. 2 Gabede gese mwigolo, Davidi atukile ga mugu, atabangile gantata ga numba zage nu amonine ku mukikulu akoga ku kingo kiziki; nu wozo mukikulu abezaga mbangilwa nunse. 3 Davidi asingile nu kubuzia musagu wa wozo mukikulu. Umozi atendile bunee: “Ndi wono ta Bati-Seba mukinga wa Eliamu, mukazi wa Uria muHiti?” 4 Davidi asingile migenzi kumutola. Avule kweli nu eiyombekile gamozi nage kubuno abezaga asila kwiyengia ku nsese zage; nu asubizie ku numba zage.
5 Mukikulu asingile mugenzi kusambalila Davidi bunee: “Nili n'iyimi.” 6 Davidi asingile mugenzi ku Yoabu bunee: “Nsingile Uria muHiti.” Nu amusingile. 7 Nu gavule Uria kweli, Davidi amubuzizie misagu za Yoabu, nu misagu za bantu, nu misagu za bita. 8 Davidi abwide Uria bunee: “Kumba kwobe, nu woge ku magulu mobe.” Uria atukile mu numba za mukota, nu lukaso lw'idia lwamuyangile kutuka ku mukota. 9 Tondo Uria eiyombekile ga mwingilo wa numba za mukota gamozi na bakiti bage bansania. Ntakumbile ku numba zage. 10 Gabasambalide Davidi buno Uria ntagelile ku numba zage, Davidi amubuzizie bunee: “Ndi uwe ntwakutilwe na lugendo? Kubuni ntwendile kwobe ku numba?”
11 Uria amwakwide bunee: “Sanduku za Kalaga nu baIsraeli nu baYuda bakwikala mu bitanda, nu mukota wane Yoabu nu bakiti ba mukota wane beli mu ido bwasi bwasi mu isoa. Ndi nikumbe mu numba zane nu kulia nu kunua nu kwiyombeka gamozi na mukazi wane? Lebelebe nsyakite kitondo kikino.”
12 Davidi abwide Uria bunee: “Lindila gano lelo nu lubi wende.” Ububo Uria eiyombekile ku Yerusalema bindi bibili. 13 Kumbusa Davidi amumanine kulia nu kunua nage nu akatilwe na maku. Mwigolo endile kwiyombeka na bakiti ba mukota wage, tondo ntendile ku numba zage.
14 Gakede busi, Davidi asanzide Yoabu mukanda. Agusingile na Uria. 15 Asanzile mu mukanda bunee: “Bika Uria ku mulindi wa lwabusio lwa bita bikali nunse nu nti mwamusiga buno alibulwe nu kukua.” 16 Nu gabatimbikanizie mwino, abikile Uria gamozi na mapuka. 17 Bantu ba mu mwino bavule kwitana na Yoabu; bamozi ku bakoloboyo bakule nu bakiti bamozi ba Davidi, nu Uria muHiti akule nu we.
18 Ububo Yoabu asingile kusambalila Davidi bitondo binsania bya bita. 19 Akakizizie mugenzi kutenda bunee: “Gawasile kusambalila mukota misagu insania za bita, 20 ndi ongoa nu kubula bunee: ‘Kubuni kumwakundile mwino nunse ku bita? Tamwamenyine buno bise misungu ku bitutu? 21 Nazi witile Abimeleki mwana wa Yerubeseti? Ndi ta mukikulu u wamwisile ikozi lya ngogo ku kitutu ububo akule ku Tebesi? Kubuni mwikundile ku kitutu bubuno?’ Nti watenda bunee: ‘Mukiti wobe Uria muHiti akule nu we.’”
22 Ububo mugenzi endile, nu alolesizie Davidi bunsania bwamusingile Yoabu, 23 mugenzi asambalide Davidi bunee: “Bantu batukindile. Batubaside mu isoa, nu twabakindile aaba nu kwingila ku mukolo. 24 Nu balasi ba misungu beisile bakiti bobe misungu kutuka ku kitutu, nu bamozi ku bakiti bakule, nu mukiti wobe Uria, muHiti, akule nu we.” 25 Ububo Davidi abwide mugenzi bunee: “Tenda Yoabu bunee: ‘Kitondo kikino takibe kibi kuguli kubuno mwene uneita umozi anga ungo. Kita bita na magala kwitila ku mwino, nu kuguzikya.’ Mubule bubuno kukokomezia mutima wage.” 26 Gongule mukazi wa Uria buno iba wage akua, amulilide. 27 Nu gasilile bindi by'idilo, Davidi amutolile kwage ku numba nu abede mukazi wage. Amubutide mwana, tondo kitondo kyakitile Davidi takyatananizizie Yehowa.