Bita na baAramu nu baAmoni.
10
1 Nu kumbusa kwa bibyo, mukota wa baAmoni akule. Hanuni mwana wage, angatile mu kiziki kyage. 2 Davidi atendile bunee: “Nakitile Hanuni, mwana wa Nahasi, busoga, anga bwankitide isi busoga.” Ububo Davidi asingile bakiti bage kumubibya ku kabamba k'isi, nu bendile mu kisi kya baAmoni. 3 Tondo bakulu ba baAmoni babwide Hanuni mukota wabo bunee: “Ndi ukukengela buno Davidi akwanza so, u bwakusingila bakukubibya? Ndi takulola mwino nu kugutitika nu kuguzikya u kwakusingila Davidi bakiti bage?” 4 Ububo Hanuni akatile bakiti ba Davidi nu ababegile byindi bya nzelu zabo nu atile nsulu zabo, kutukila kunsi aaba nu ku ntungi, nu abasingile kwabo. 5 Gasambalidwe Davidi, asingile bantu kukulumana nabo, kubuno bantu babo babezaga na nsoni nunse. Mukota atendile bunee: “Mwizizie ku Yeriko aaba nu gasile kwasa nzelu zeinyu, kumbusa mwasubye.” 6 BaAmoni gabamonine buno basombwa na Davidi, basingile bantu kukita mululo; tununu makumi mabili (20.000), twa bantu ku baAramu ba Beti-Rehobu nu ba Zoba, nu kanunu kamozi (1.000) ka bantu ku mukota wa Maka, nu tununu ikumi nu tubili (12.000) ku bantu ba Tobu. 7 Gongule Davidi ku bubo, asingile Yoabu n'iyombo linsania lya bantu ba magala. 8 BaAmoni batukile mu mwino nu beidongekile ku bita ku isula lya mwino. BaAramu ba ku Zoba nu ba ku Rehobu nu bantu ba Tobu nu Maka, babezaga mu isoa. 9 Gamonine Yoabu buno bita byamutimba lwabusio nu kumbusa kwage, asombwede bamozi ku basombolwa ba Israeli. Ababikile kayikayika ku baAramu. 10 Abikile bantu basigede mu maboko ma Abisayi, muto wage, kuba kayikayika ku baAmoni. 11 Atendile bunee: “Ndi baAramu bese bankinda, nti wavwa kunkasia; ndi baAmoni bese bakukinda, nti navwe kukukasia. 12 Ube na magala, tukite anga bamulume ku kabamba ka bantu beitu, nu miino za Kalaga weitu, nu Yehowa atukitile anga buli busoga.”
13 Ububo Yoabu nu bantu bage beitenne na baAramu nu batinine lwabusio lwage. 14 Gamonine baAmoni buno baAramu batina, batinine nu bo lwabusio lwa Abisayi, nu beingide mu mwino. Ububo Yoabu asubizie ku Yerusalema. 15 Gamonine baAramu buno bakindwa na baIsraeli, bakundamenne. 16 Hadadezeri asingile mugenzi kukundamania baAramu babezaga lisilya lya Luuzi Furati. Bavule ku Helamu na Sobaki mukota w'iyombo lya Hadadezeri nu abasondelezizie. 17 Davidi asambalidwe nu akundamanizie baIsraeli bansania. Asokile Yordani kwenda ku Helamu. BaAramu beibikile kayikayika kwitana na Davidi. 18 BaAramu batinine lwabusio lwa baIsraeli, nu Davidi eitile baAramu, bantu ba tuyanga nkama mutubakamo, nu bakoloboyo ba magulu tununu makumi manazi (40.000). Eitile Sobaki, mukota w'iyombo lyabo gago. 19 Gamonine bakiti ba Hadadezeri buno bakindwa lwabusio lwa baIsraeli, bakitile bubobelelo na baIsraeli, nu babede bakiti babo. Ububo baAramu bakule boba kukasia baAmoni lingo.