Davidi nu Mefibosete.
9
1 Davidi abuzizie bunee: “Ndi kwasigede umozi ku numba za Saulo buno nimukwile kyombo ku kabamba ka Yonatana?” 2 Nu kwabezaga mukiti umozi wa numba za Saulo, izina lyage Ziba. Davidi amumanine nu kumubuzia bunee: “Ndi uli Ziba?” Ziba amwakwide bunee: “Nne wono mukiti wobe.” 3 Mukota amubuzizie bunee: “Ndi takuli ungo wa numba za Saulo buno nimukwile kyombo kya Kalaga?” Ziba amwakwide bunee: “Kuli mwana umozi wa Yonatana uli kitunga.” 4 Mukota amubuzizie bunee: “We eli kuni?” Ziba amwakwide bunee: “We eli mu numba za Makiri mwana wa Amieli, mu mwino wa Lo-Debari.” 5 Ububo mukota Davidi asingile bantu kumutola ku numba za Makiri, mwana wa Amieli, ku Lo-Debari. 6 Mefibosete, mwana wa Yonatana, mwana wa Saulo, avule ku Davidi. Agwede bukukama nu Davidi amutendile bunee: “Mefibosete.” Amwakwide bunee: “Mukiti wobe eli gano!” 7 Davidi amubwide bunee: “Ntukue boba kubuno lebelebe nkukukitila busoga ku kabamba ka Yonatana, so. Nakusubizie masoa mansania ma songulu Saulo, nu walie ku meza mane bindi binsania.”
8 Mefibosete akumbaminne nu kutenda bunee: “Mukiti wobe eli nazi buno ulolesie busoga ku wozo uli anga mboa zakua?”
9 Mukota amanine Ziba, mukiti wa Saulo, amubwide bunee: “Binsania byabezaga bya Saulo nu bya numba zage nasila kubikasa ku mwana wa mukota wobe. 10 Uwe nu bana bobe nu bakiti bobe mwatunganana kumulimina isoa nu kumulusizia matubulo buno mwana wa mukota wobe abe n'idia lya kulia. Tondo Mefibosete mwana wa mukota wobe, alie idia ku meza mane bindi binsania.” Ziba abezaga na bana ikumi nu batano nu bakiti makumi mabili. 11 Ziba abwide mukota bunee: “Mukiti wobe akite binsania byatenda mukota kundi.” Nu Mefibosete alide ku meza ma mukota, anga bana bage. 12 Nu Mefibosete abezaga na mwana mukeke, izina lyage lyamanagwa Mika. Nu bobansania ba numba za Ziba babezaga bakambi ba Mefibosete. 13 Ububo Mefibosete eikede ku Yerusalema, kubuno aliaga bindi binsania ku meza ma mukota. Abezaga kitunga ku magulu mage mabili.