Bukota bwa Davidi bwalindibwa.
8
1 Kumbusa kwa bitondo bibyo, Davidi akindile baFilistini. Atikizye Metegama ku maboko ma baFilistini. 2 Akindile baMoabu, nu abalindikile bibombo na mizigi beiyombekibwa gansi, alindikile mizigi ibili za kwitwa nu muzigi umozi wa kulanga ku kalamo. BaMoabu babede bakiti ba Davidi; bamuvwilide na mitulo. 3 Gendile Davidi kwangata babo ba ku luuzi lunene lwa Furati eitile Hadadezeri mwana wa Rehobu, mukota wa Zoba. 4 Davidi atolile kweli tuyanga kanunu kamozi (1.000), nu babo bendaga ga farasi tununu mutubakamo (7.000) nu bakoloboyo bendaga na magulu tununu makumi mabili (20.000); Davidi asesile miki za farasi insania za tuyanga, tondo alangile farasi lukama. 5 Gavule baAramu ba Damasiki kukasia Hadadezeri mukota wa Zoba, Davidi eitile baAramu bantu tununu makumi mabili nu tubili (22.000). 6 Davidi abikile bakoloboyo mu kisi kya BaAramu ku Damasiki. BaAramu babede bakobe ba Davidi, bamusingide mitulo. Yehowa akasile Davidi kukinda kunsania kwendaga. 7 Davidi atolile ngabo za olo zabezaga ku bakiti ba Hadadezeri nu kuzilusia ku Yerusalema. 8 Mukota Davidi atolile nsubi ningi nunse ku Beta nu ku Berotayi, miino za Hadadezeri. 9 Toi, mukota wa Hamati, ongule buno Davidi asila kwita iyombo linsania lya Hadadezeri. 10 Ububo asingile Yoramu mwana wage ku mukota Davidi kumusekela nu kumukasa mponga buno eitenne na Hadadezeri nu kumukinda; kubuno Hadadezeri abezaga na bita na Toi. Yoramu alusizie bikagi bya feza, nu bya olo, nu bya nsubi ku Davidi. 11 Mukota Davidi abibikile ku Yehowa gamozi n'ingo feza nu olo zaatikizye ku bilongo binsania byakindile. 12 Azitikizye ku baAramu nu baMoabu, nu baAmoni nu baFilistini nu baAmaleki, nu iyombo lya Hadadezeri, mwana wa Rehobu, mukota wa Zoba. 13 Izina lya Davidi lyabede na lukumu lunene gaasubizie ku kukinda baAramu mu Kibitabita kya Munkange geitile bantu tununu ikumi nu kinana (18.000). 14 Abikile bakoloboyo bage mu kisi kya Edomu; baEdomu bansania babede bakiti ba Davidi. Yehowa akasile Davidi kukinda kunsania kwendaga.
15 Davidi angatile baIsraeli bansania. Akitide bantu bage bansania mu bulili nu mu kwisanana. 16 Yoabu, mwana wa Zeruya, abezaga mukota w'iyombo; Yosafati, mwana wa Ahiludi, abezaga musanzi wage. 17 Zadoki, mwana wa Ahitubu, nu Ahimeleki, mwana wa Abiatari, babezaga basankoga, nu Seraya abezaga musanzi; 18 Benaya, mwana wa Yehoyada, abezaga mwangati gantata ga baKereti nu baPereti, nu bana ba Davidi babede basankoga.