Davidi akutunda kobakila Kalaga numba.
7
1 Geikede mukota mu numba zage, nu Yehowa amumuzizie ku beiti bage bansania ku ntungo insania, 2 mukota abwide Natana mulengania bunee: “Kano kaluma, nikala mu numba nnene nunse za mbavu za mierezi, tondo sanduku za Kalaga zili mu numba za hema.” 3 Natana akwide mukota bunee: “Enda, kita bunsania buli mu mutima wobe, kubuno Yehowa eli gamozi nobe.” 4 Mu kindi kikyo, Yehowa abwide Natana bunee: 5 “Enda nu tenda ku mukiti wane Davidi bunee: ‘Bubuno u bwatenda Yehowa bunee: “Ndi ukunobakila numba, nikale muzo? 6 Kubuno nsikede mu numba kutukila busi bunatikizye baIsraeli ku Misri aaba nu lelo, tondo nikede mu hema. 7 Kiziki kinsania kinendaga na baIsraeli ndi natendile ku ngatu emozi za baIsraeli bunee: ‘Kubuni tamwanobakide numba nsoga?’” 8 Kano kaluma nti wabula mukiti wane Davidi bunee: “Yehowa Mwiya Mayombo atenda bunee: ‘Nakutikizye ku kulanga mikoko buno ube mwangati wa baIsraeli. 9 Nu Nne nabezaga gamozi nobe kunsania kuwendaga, nu nakulekanukizye bulazi na beiti bobe banse. Nu Nne nakite izina lyobe kuba inene, anga izina lya banene beli mu kisi. 10 Nkabika bantu bane baIsraeli ku kiziki kyabo nu nabalindie buno beikale mu kiziki kyabo; tabeige lingo mu kingo kisi buno bantu babi tabakabasungia lingo anga mu kulinga 11 nu kutukila busi bunakakizizie ngatu zangate bantu bane baIsraeli. Nu nkukumuzia ku beiti bobe bansania. Ububo Yehowa akukubula lingo buno akukitile numba. 12 Gasile bindi byobe wayikwe gamozi na baso, nazanzule ibuta lya kibunda kyobe kumbusa kwobe, kulyimika mu bukota bwobe. 13 Akobaka numba ku izina lyane, nu nkeimika kisumbi kya bukota bwage butanakusila. 14 Nkaba isi nu we akaba mwana wane. Ndi akita bubi, nti namusungie na kasusula ka bantu, nu kulibula kwa bantu. 15 Tondo mponga zane tazikamutuka anga bunazitikizye ku Saulo, lwabusio lwobe. 16 Nu numba zobe nu bukota bwobe bukemana ku milyalya. Kisumbi kya bukota bwobe nkakyimika ku milyalya.’”’” 17 Natana asambede bitondo bibino binsania by'iyano lilino ku Davidi.
18 Ububo mukota Davidi eingide nu eikede lwabusio lwa Yehowa; atendile bunee: “Ee Yehowa, Mwiya Bwangato Bunsania, nne nili nazi, nu numba zane zili kikizi buno wandusizie kuno? 19 Ee Yehowa, Mwiya Bwangato Bunsania, tondo kikyo takyabezaga kyakuka ku meiso mobe. Ububo ukutenda mukiti wobe buno akaba na numba zage ku myaka mingi. 20 Buni bungo bunavwamine kukubula Davidi? Ee Yehowa, Mwiya Bwangato Bunsania, Uwe wizi mukiti wobe. 21 Ku kabamba k'idagano lyobe, nu kusombola kobe uwenyene, wakitile bitondo bibino binene nu kubimenyesia ku mukiti wobe. 22 Ee Yehowa, Mwiya Bwangato Bunsania, Uwe uli munene, kubuno takuli ungo anga Uwe. Aba takuli kango Kalaga, tugu Uwe, anga buli binsania bitungule ko. 23 Nu kilongo kikizi mu kisi kili anga bantu bobe baIsraeli. Kalaga endile kubakulula wenyene buno babe bantu bage, nu kumenyesia izina lyage; nu wakitile miganogano minene ku kabamba kobe gawapumbizie bantu nu tulaga twabo ku kabamba ka bantu bobe, u babo bawakulwide kutuka mu Misri. 24 Wazanzwide bantu bobe baIsraeli buno babe bantu bobe ku milyalya, nu Uwe, ee Yehowa, wabede Kalaga wabo. 25 Kano kaluma, ee Kalaga Yehowa, kitondo kiwatendile ku mukambi wobe, nu ku numba zage, kyemanukye ku milyalya nu kukita anga buwatendile. 26 Nu izina lyobe liganunwe kutanakuzinda bunee: ‘Yehowa Mwiya Mayombo eli Kalaga wa baIsraeli.’ Numba za mukambi wobe Davidi zikemana lwabusio lwobe.
27 Ee Yehowa Mwiya Mayombo, Kalaga wa Israeli, mukiti wobe akusega isego lilino, kubuno uwenyene walagile mukiti wobe bunee: ‘Nkakobakila numba.’ 28 Ee Yehowa Mwiya Bwangato Bunsania, uwe uli Kalaga wa lebelebe nu bitondo byobe bili bulili nu walagile mukiti wobe kikyo kisoga. 29 Ndi bwakutananizia, nti wakasa mponga ku numba za mukiti wobe buno zikale ku milyalya, kubuno Uwe, ee Yehowa, Mwiya Bwangato Bunsania, watendile bunee: ‘Numba za mukambi wobe zikaswe mponga zobe ku milyalya.’”