Davidi akweka Sanduku z'Idagano ku Yerusalema.
6
1 Davidi akundamanizie lingo bakoloboyo bansania ba baIsraeli, tununu makumi masatu (30.000). 2 Davidi endile nabo ku Bali-Yuda buno atole Sanduku za Kalaga. Sanduku zamanagwa mu izina lya Yehowa Mwiya Mayombo ukwikalaga gasamba makerubi meli ga sanduku. 3 Babikile Sanduku za Kalaga gantata ga kayanga kato buno bazitikye ku numba za Abinadabu zabezaga gantata ga mwiduko. Uza nu Ahio, bana ba Abinadabu, bendezie kayanga kako kato. 4 Ahio endile lwabusio lwa Sanduku za Kalaga. 5 Davidi nu numba ngimangima za baIsraeli baminine lwabusio lwa Yehowa nu beimbile na nkita insania za bindanda; misunobari nu nzenze nu mankimbi nu bapili nu ngoma. 6 Nu gabendile ku mulungu wa kupepa wa Nakoni, Uza alambizie kuboko kwage ku Sanduku za Kalaga, nu azikatile ko, kubuno ngombe zikukile. 7 Bongoa bwa Yehowa bwabede bukali ku Uza, nu amwitile gago ku kwaga kwage. Akule gago, bwigi na Sanduku za Kalaga. 8 Davidi ntatananizibwe na bubo bwakitile Yehowa ku Uza; amanine kiziki kikyo Perezi-Uza, aaba nu lelo. 9 Davidi akule Yehowa boba busi bubo. Atendile bunee: “Buni bwavwa Sanduku za Yehowa kwane?” 10 Ububo Davidi nteingizizie Sanduku za Yehowa ku mwino wage, tondo azekile mu numba za Obedi-Edomu muGiti. 11 Sanduku za Yehowa zasigede myezi isatu mu numba za Obedi-Edomu muGiti, nu Yehowa akasile Obedi-Edomu mponga na numba zage insania.
12 Mukota Davidi asambalidwe bunee: “Yehowa akasa numba za Obedi-Edomu mponga, nu binsania byeli nabyo, ku kabamba ka Sanduku za Kalaga.” Davidi endile nu atolile Sanduku za Kalaga ku numba za Obedi-Edomu kuzibasia ku mwino wa Davidi na mbogimbogi. 13 Gabekile Sanduku za Mukota mukwenda masomoneno mutuba, Davidi asesile ngombe nu kyana kya ngombe anga bisansa. 14 Davidi aminine lwabusio lwa Yehowa na magala mage mansania. Avwalile nsulu za efodi za kitani. 15 Ububo Davidi nu numba ngimangima za baIsraeli batolile Sanduku za Yehowa na kyelele, nu iyuki lya monze. 16 Gabede Sanduku za Yehowa zabasa mu mwino wa Davidi, Mikali, mukinga wa Saulo, alolile g'idilisa. Amonine mukota Davidi akutumatuma na kumina lwabusio lwa Yehowa, amunyegile mu mutima wage.
17 Beingizizie Sanduku za Yehowa nu bazibikile ga kiziki kyazo, mu numba za hema zakomine Davidi; akasenne kayulo ka kugisibwa nu ka bubobelelo lwabusio lwa Yehowa. 18 Nkungu zasilile Davidi kukasana kayulo ka kugisibwa nu kayulo ka bubobelelo, akasile bantu mponga ku izina lya Yehowa Mwiya Mayombo. 19 Akasile bantu bansania ba Israeli, bamulume nu bakikulu, na muntu na muntu kampampa ka ngano nu musuna wa nyama nu kyindi kya biguma byakama. Kumbusa bantu bansania bendile ku numba zabo.
20 Nu Davidi asubizie kwage buno akase mponga ku ba numba zage. Nu Mikali, mukinga wa Saulo, avule kuli Davidi. Atendile bunee: “Lelo mukota wa baIsraeli abezaga na lutanuno nu kwikungula nsulu ku meiso ma tulemba twa bakiti bage, anga muntu bulia utakukua na nsoni.” 21 Davidi abwide Mikali bunee: “Nakitile lwabusio lwa Yehowa, wansombwede gantata ga so nu numba zage insania, kumbika munene ku bantu ba Yehowa, u baIsraeli. Ububo nkumina lwabusio lwa Yehowa. 22 Ku bubo nitile kuba mubi kutinga, aba nu ku meiso mane nnenyene, tondo tulemba tuto tunannanza.” 23 Nu Mikali mukinga wa Saulo ntabutile mwana bindi byage binsania aaba nu na bwakule.