Davidi imikwa mukota wa baIsraeli.
5
1 Bikanga binsania bya baIsraeli byavule kuli Davidi ku Hebroni; byatendile bunee: “Iswe tuli mibuto zobe. 2 Wakalazi, gabezaga Saulo mukota weitu, uwe u wasondelezizie baIsraeli mu kubasa nu mu kwingila; Yehowa akubwide bunee: ‘Ukalisia bantu bane baIsraeli, nu ukaba mwangati wa baIsraeli.’” 3 Gavule bakulu bansania ba Israeli ku mukota ku Hebroni, mukota Davidi akitile idagano nabo ku Hebroni lwabusio lwa Yehowa, nu babongezie Davidi mwambo kuba mukota wabo. 4 Davidi abezaga na myaka makumi masatu nkungu zalingile kwangata. Angatile myaka makumi manazi. 5 Angatile ku Yuda mu Hebroni myaka mutubakamo nu myezi mutuba, nu mu Yerusalema angatile baIsraeli nu Yuda gamozi myaka makumi masatu nu isatu. 6 Mukota nu bantu bage bendile ku Yerusalema ku baYebusi. BaYebusi babwide Davidi bunee: “Ntuneingila gano, aba byuku nu bitunga banakukandila nzila.” Bakengelaga buno Davidi ntaneingila gago. 7 Tondo Davidi akindile mwino na mukolo wa magala wa Siyoni, wozo u mwino wa Davidi. 8 Davidi atendile mu busi bubo bunee: “Muntu unsania walibulage baYebusi, abakame ku mwino nu kwingila mu nzila za kanuabalongo nu kwita bitunga nu byuku byasomba Davidi.” Ububo bakutenda mu nsumo bunee: “Byuku nu bitunga tabanavwama kwingila mu numba nnene za mukota.” 9 Davidi eikede mu mukolo wa magala wamanagwa mwino wa Davidi. Davidi obakile mukolo ku ntungo insania, kutukila Milo nu munda. 10 Davidi itide kuba munene kubuno Yehowa, Kalaga Mwiya Mayombo, abezaga gamozi nage.
11 Hiramu, mukota wa Tiro, asingile migenzi ku Davidi, na miti misoga nu bobaki bakulumina na miti nu bobaki ba makozi buno bobakile Davidi numba. 12 Davidi amenyine buno Yehowa amwimika kuba mukota ku baIsraeli, nu atanwine bukota bwage ku kabamba ka bantu ba Israeli.
Bana ba Davidi ku Yerusalema.
13 Gatukile Davidi ku Hebroni, atolile tungo tulemba nu bango bakikulu mu Yerusalema, nu abutile bango basikila nu bakinga. 14 Nu meina ma babo babutilwe kweli ku Yerusalema mabezaga: Samua nu Sobabu nu Natana nu Solomono 15 nu Ibuhari nu Elisua nu Nefegi nu Yafia 16 nu Elisamu nu Eliada nu Elifeleti.
17 Gongule baFilistini buno Davidi abongibwa mwambo kuba mukota wa baIsraeli, bansania babakamine kulonda Davidi. Nu gongule Davidi, agelile ku kiziki kyalanga. 18 BaFilistini bavule nu kwizazia mu mpinga za Refaimu. 19 Davidi abuzizie Yehowa bunee: “Ndi nibakame ku baFilistini? Ndi wabagabule mu maboko mane?” Yehowa amwakwide bunee: “Bakama, kubuno lebelebe nagabule baFilistini mu maboko mobe.” 20 Davidi avule ku Baali-Perazimu, nu abalibwide gago; atendile bunee: “Yehowa ankindide beiti bane anga magala ma mwiyalo wa mazi.” Ububo amanine kiziki kikyo Baali-Perazimu. 21 BaFilistini basigile nkisi zabo gago nu Davidi nu bantu bage bazitikizye.
22 BaFilistini bavule lingo nu beizazizie mpinga za Refaimu. 23 Nu gabuzizie Davidi ku Yehowa; atendile bunee: “Ntwende ku isa lya kubeli. Timba kumbusa kwabo ku lubanda lwa miti za miforosadi. 24 Nu gagungwe ku nkindo za nsamba za miforosadi zikupupa, nti walinga bita, kubuno mu nkungu zezo nti Yehowa enda lwabusio lwobe kulibula iyombo lya baFilistini.” 25 Davidi akitile anga bwamukakizizie Yehowa; alibwide baFilistini kutukila Geba aaba nu ku Gezeri.