Lutundo lwa Yonatana ku Davidi.
19
1 Saulo atendile ku Yonatana mwana wage nu ku bakiti bage bansania buno beite Davidi. 2 Tondo Yonatana mwana wa Saulo atundile Davidi nunsania, ububo abwide Davidi bunee: “Tatane Saulo akulonda kukwita. Kasi idange lubi mu nindunindu, ikala mu kiziki kyitunda nu wibise. 3 Nu nne nabase kwemana gamozi na tatane ku isoa gaguli. Nakutekule ku tatane, nalole bwatende nu nakusambalile.” 4 Yonatana atekwide bitondo bisoga bya Davidi ku isi Saulo. Amubwide bunee: “Mukota ntagile mukiti wage Davidi kubuno Davidi ntakwagide, lingo kubuno makitilo mage kuguli meli masoga nunse. 5 Ee, eikasenne kalamo kage mu kuboko kwage nu eitile muFilistini. Yehowa onezie nunse baIsraeli bansania. Wabumonine ko nu wabogilebogile. Nu kubuni kuukwagila mikila ziteli na katati mu kwita Davidi geteli kitondo?”
6 Saulo ongule iyuki lya Yonatana nu alumbide bunee: “Anga bukulama Yehowa, Davidi ntakue.” 7 Yonatana amanine Davidi nu amusambalide moki mamo mansania. Nu Yonatana alusizie Davidi ku Saulo nu abezaga lwabusio lwage anga bwabezaga mu kulinga.
Davidi atina Saulo.
8 Nu kwabede bita lingo nu Davidi endile kwitana na baFilistini. Eitile beingi kubeli nu bamutinine. 9 Muuza mubi watukaga ku Yehowa wavwilide Saulo gaabezaga eikala mu numba zage, nu abezaga n'isumo lyage mu kuboko. Gatutaga Davidi nzenze na kuboko kwage, 10 Saulo agelekile kubasania Davidi isumo aaba nu ku kitutu. Tondo eiyusile nu Saulo asumitile kitutu. Davidi atinine nu eiyonezie mu kikyo kindi.
11 Saulo asingile migenzi ku numba za Davidi kumukobela nu kumwita mu nindunindu. Tondo mukazi wage Mikali abwide Davidi bunee: “Ndi ntwiyonia mu kikino kindi, lubi nti witwe.” 12 Mikali agezizie Davidi g'idilisa nu endile nu atinine. Bubo u bwonine.
13 Kusila, Mikali atwede nkisi nu azibikile ga mugu. Ga kiziki kyazo, abikile kikoba kya mpene nu abikukide na nsulu. 14 Gasingile Saulo migenzi kukata Davidi, Mikali abwide bunee: “Akusamba.”
15 Saulo asubizie migenzi zimone ku Davidi, abwide bunee: “Mbakamiziazi we na mugu, nimwite.” 16 Migenzi zingide nu zasangile nkisi ga mugu nu kikoba kya mpene g'itoe lyazo.
17 Saulo abuzizie Mikali bunee: “Kubuni kuwanengelede bubuno mu kwenzia mwiti wane nu es'ona?” Nu Mikali akwide Saulo bunee: “Ambwide bunee: ‘Nsige niyendele; aba nkukwita.’” 18 Davidi atinine nu onine. Abasile ku Samweli ku Rama nu amusambalide bunsania bwamukitide Saulo. Nu endile na Samweli kwikala ku Nayoti. 19 Basambalide Saulo bunee: “Lola, Davidi eli ku Nayoti mu Rama.” 20 Nu Saulo asingile migenzi kukata Davidi. Gazamonine musanganano wa balengania bakulengania nu Samweli emana musondelezia wabo, Muuza wa Kalaga wazivwilide nu zalenganizie nuzo. 21 Basambalide Saulo ku bubo nu asingile ingo migenzi. Zalenganizie nuzo. 22 Ububo Saulo wenyene endile ku Rama. Gaabasile ku kanuabalongo kanene mu Seku, Saulo abuzizie bunee: “Kuni kuli Samweli nu Davidi?” Bamwakwide bunee: “Lola, beli ku Nayoti mu Rama.” 23 Nu mu lugendo lwa Saulo ku Nayoti mu Rama, Muuza wa Kalaga wamuvwilide nu we endelede akulengania aaba nu kubasa kwage ku Nayoti mu Rama. 24 Eitikizye nsulu zage nu alenganizie nu we lwabusio lwa Samweli. Agwede mundulu gansi mu wozo musi unsania nu mu kindi kinsania. Ukinsa bwabuzibagwa bunee: “Ndi Saulo nu we eseli mu kibombo kya balengania?”