Bukindi bwa Yefuta ku baEfuraimu.
12
1 Bantu ba Efuraimu bamaninwe kukundamana; basokile Yordani ku lulenge lwa Zafoni nu batendile ku Yefuta bunee: “Kubuni kuwasokile kwitana na baAmoni geteli kutumana kwenda gamozi nobe? Tukugisia numba zobe na keiya nu we gamozi.” 2 Nu Yefuta abakwide bunee: “Nne nu bantu bane twabezaga na nsake nnene na baAmoni nu ganamumanine, tamwanonezie ku maboko mabo. 3 Nu ganamonine buno tamwanonezie, niyonezie na kuboko kwane, nasokile ku baAmoni nu Yehowa abakasenne mu kuboko kwane. Kasi kubuni kumwavwa kundi lelo kunitania?”
4 Yefuta akundamanizie bantu ba Gileadi nu eitenne na Efuraimu. Bantu ba Gileadi beitile Efuraimu kubuno batendaga bunee: “Benywe baGileadi muli batini ba Efuraimu munkatini mwa Efuraimu nu Manase.”
5 Nu baGileadi bakatile masokelo ma Yordani mabezaga butunganana na baEfuraimu. Nu ndi umozi wa batini ba Efuraimu atenda bunee: “Nsige nisoke,” nti bantu ba Gileadi bamubuzia bunee: “Ndi uli muEfuraimu?” Ndi akula bunee: “Kilo,” 6 nti bamutenda bunee: “Tenda Shiboleti.” Nu ndi atenda “Siboleti,” kubuno ntavwamaga kubutenda anga bwakulungana, nti bamukata nu kumwita ga masokelo ma Yordani. Nu beitile tununu makumi manazi nu tubili (42.000) twa baEfuraimu mu bibyo bindi.
7 Yefuta abede ngatu mu Israeli myaka mutuba nu Yefuta muGileadi akule nu ayikilwe mu mwino umozi wa miino za Gileadi.
8 Kumbusa kwage Ibusani wa ku Betelehemu abede ngatu mu Israeli. 9 Abezaga na bana bamulume makumi masatu nu bana bamukazi makumi masatu baagabile kungo; nu asongede basikila bage bakinga makumi masatu ba kungo. Abede ngatu mu Israeli myaka mutubakamo. 10 Kumbusa, Ibusani akule nu ayikilwe ku Betelehemu.
11 Kumbusa kwage Eloni muZebuluni abede ngatu mu Israeli. Abede ngatu mu Israeli myaka ikumi, 12 nu Eloni muZebuluni akule nu ayikilwe ku Ayaloni, mu kisi kya Zebuluni.
13 Kumbusa kwage, Abudoni, mwana wa Hileli, muntu wa ku Piratoni, abede ngatu mu Israeli. 14 Abutile bana bamulume makumi manazi nu bayukulu bamulume makumi masatu, bendaga gantata ga mpunda makumi mutubakamo. Abede ngatu mu Israeli myaka kinana. 15 Kusila Abudoni, mwana wa Hileli, muPiratoni, akule nu ayikilwe mu kisi kya Efuraimu mu kisi kya miduko za baAmaleki.