NGATU 10

Ngatu Tola nu Yairi.

1 Kumbusa kwa Abimeleki, Tola, mwana wa Puha, mwana wa Dodo, muntu wa Isakari, emenne buno onie Israeli. Eikalaga ku Samiri mu kisi kya miduko za Efuraimu. 2 Abede ngatu mu Israeli myaka makumi mabili nu isatu. Kusila akule nu ayikilwe ku Samiri.

3 Kumbusa kwage kwemenne Yairi, wa ku Gileadi; abede ngatu mu Israeli myaka makumi mabili nu ibili. 4 Abezaga na bana bamulume makumi masatu bendaga ga mpunda makumi masatu, nu babezaga na miino makumi masatu zikizamanwa Hawoti-Yairi, aaba nu lelo zili mu kisi kya Gileadi. 5 Yairi akule nu ayikilwe ku Kamoni.

6 Nu baIsraeli bakitile bwagi lingo ku meiso ma Yehowa; bakitide baBaali nu baAstaroti, nu tulaga twa baAramu nu baSidoni, nu tulaga twa baMoabu nu tulaga twa baAmoni nu tulaga twa baFilistini. Basigile Yehowa nu tabamukitilaga lingo. 7 Bongoa bwa Yehowa bwabede bukali ku baIsraeli nu abakunzizie ku maboko ma baFilistini nu ku maboko ma baAmoni. 8 Mu wozo mwaka, babasungizie nu babababazizie myaka ikumi nu kinana. Bababazizie bantu bansania ba Israeli babezaga lisilya lya Yordani mu kisi kya baAmori kili mu Gileadi. 9 Lingo, baAmori basokile Yordani kwitania baYuda nu baBenjamina nu numba za Efuraimu. Ububo baIsraeli bababazizibwe nunse. 10 Nu baIsraeli balilile ku Yehowa kutenda bunee: “Twakwagide, kubuno twasigile Kalaga weitu nu twakitide baBaali.”

11 Yehowa abwide baIsraeli bunee: “Ndi nsyamwonezie ku baMisri nu ku baAmori nu ku baAmoni nu ku baFilistini? 12 Nu lingo, gamubabazagia baSidoni nu baAmaleki nu baMaoni, mwalilile kundi nu namwonezie ku maboko mabo. 13 Tondo mwansigile nu mwakitide tungo tulaga; ukinsa nsyamwonie lingo. 14 Endazi mulile ku tulaga tumwasombwede, tumwonie mu nkungu za tubebe tweinyu.”

15 Nu baIsraeli babwide Yehowa bunee: “Twagile. Tukite anga buukutunda, tugu tukukusega utonie lelo.” 16 Nu batikizye tulaga tugeni munkatini mwabo nu bakitide Yehowa. Nu Yehowa abede na kabebe ku mutima ku kabamba ka mbabazio za baIsraeli.

17 Kumbusa baAmoni bakundamanizibwe nu babikile ido ku Gileadi. Nu baIsraeli bakundamenne nu babikile ido ku Misipa. 18 Nu basondelezia ba baGileadi babuzanizie bunee: “Nazi muntu walinge kwitana na baAmoni? Wozo u wabe musondelezia wa bantu bansania ba Gileadi.”