Kwangata kwa Abimeleki.
9
1 Abimeleki, mwana wa Yerubaali, endile ku Sekemu ku baninalume, atendenne nabo nu na kikanga kinsania kya numba z'isingulu wabuta nina bunee: 2 “Ndi bwakulungana, mutende mu matuzi ma bantu bansania ba Sekemu bunee: ‘Buni buli busoga buno mwangatwe na bana ba Yerubaali makumi mutubakamo aba buno mwangatwe na muntu umozi?’ Kengelazi buno nili ikwa lyeinyu nu musuna weinyu.” 3 Nu baninalume batendile moki mamano mansania ku matuzi ma bantu bansania ba Sekemu; nu mitima zabo zagalukile kuyanga Abimeleki, kubuno batendile bunee: “Eli mubuto weitu.” 4 Bamukasile byindi makumi mutubakamo bya feza bibatikizye ku numba za kukumbamina Baali-Beriti. Abimeleki abikasile ku migazanga nu miluba buno bamuyange. 5 Nu endile ku numba z'isi ku Ofura nu eitile mibuto zage, basikila ba Yerubaali; bantu makumi mutubakamo g'ikozi limozi, tondo Yotamu malibilo ma Yerubaali onine kubuno abezaga eibisa. 6 Bantu bansania ba Sekemu bakundamenne nu bansania ba Beti-Milo, bendile bwigi na muti wa mwalo guli ku isula lya Sekemu buno beimike Abimeleki mukota.
7 Gabasambalide Yotamu, abakamine gantata nkangamo za mwiduko wa Gerizimu nu abalalukide n'iyuki inene bunee: “Inyuwe bantu ba ku Sekemu, nnungwililazi buno Kalaga amungwe nu inyuwe. 8 Miti zendile kubongia mukota mwambo nu kumwimika. Batendile ku muti wa biguma bya makiti bunee: ‘Utwangate.’ 9 Tondo muti wa makiti wabakwide bunee: ‘Ndi nisige makiti mane makutananizia tulaga nu bantu nu kwenda kwangata miti?’
10 Nu miti zatendile ku muti wa mutini bunee: ‘Vwa utwangate.’ 11 Tondo mutini wabatendile bunee: ‘Ndi nisige nse zane nu biguma byane bisoga buno nende kwangata miti?’
12 Nu miti zatendile ku muzigi wa muzabibu bunee: ‘Vwa utwangate.’ 13 Tondo muzabibu wabakwide bunee: ‘Ndi nisige maku mane makubogiabogia tulaga nu bantu nu nende kwangata miti?’
14 Kumbusa miti insania zabwide mikele za lute bunee: ‘Vwa utwangate.’ 15 Nu mukele wakwide miti bunee: ‘Ndi lebelebe mukumbongia mwambo buno nibe mukota weinyu, vwazi mumunwe mu mpololo zane, nu ndi ta bubo, keiya katuke mu mikele nu kuzikya mabulungu ma Lebanoni.’
16 Nu kano kaluma ndi mwakitile mu bulili geteli bwengelezi gamwimikile Abimeleki mukota, aba ndi mwakitide Yerubaali nu numba zage busoga, aba ndi mwamukitide anga bwakulungana na makitilo mage? 17 Kubuno tatane amwitaninne, abikile kalamo kage mu lukuo nu amwonezie ku kuboko kwa Midiani. 18 Tondo lelo mwazanzuka kwita kikanga kya tatane, mwitile basikila bage, bantu makumi mutubakamo g'ikozi limozi, nu mwimika Abimeleki, mwana wa mukiti wage, mukota wa bantu ba Sekemu, kubuno eli mubuto weinyu. 19 Ndi lelo mwakitide Yerubaali nu numba zage bulili geteli bwengelezi, kasi mubogeboge na Abimeleki nu abogeboge na beinyuwe. 20 Tondo ndi ta bubo, keiya katuke ku Abimeleki kazikye bantu ba ku Sekemu nu ba ku Beti-Milo nu keiya katuke ku bantu ba ku Sekemu nu ku ba ku Beti-Milo nu kazikye Abimeleki!” 21 Nu Yotamu atinine lubilo nu endile ku Beeri nu eikede kuko ku kabamba ka kukua mubuto wage Abimeleki boba.
22 Abimeleki angatile Israeli myaka isatu. 23 Nu Kalaga asingile mutima mubi gasamba Abimeleki nu bantu ba ku Sekemu. Bantu ba ku Sekemu bengelede Abimeleki, 24 buno mibi zakitidwe bana makumi mutubakamo ba Yerubaali zisubwe, nu mikila zabo zibikwe gantata ga Abimeleki mubuto wabo wabeitile, nu gantata ga bantu ba ku Sekemu bamukasizie kwita mibuto zage. 25 Bantu ba ku Sekemu babisamizie bantu gantata ga miduko kwita Abimeleki. Banyagile bansania batingaga mu zezo nzila. Nu bubo bwasambedwe ku Abimeleki.
26 Gaali, mwana wa Ebedi, avule gamozi na mibuto zage nu eingide mu Sekemu. Nu bantu ba ku Sekemu bamulemaninne. 27 Nu bendile ku isoa kutubula biguma bya mizabibu; babikambutwide nu bakitile kisagulo, beingide mu numba za kalaga kabo. Balide nu banune nu baswilide Abimeleki. 28 Gaali, mwana wa Ebedi, atendile bunee: “Nazi Abimeleki nu banazi ba ku Sekemu buno tumukitile? Ndi nteli mwana wa Yerubaali? Nu Zebuli ndi nteli nkangala zage? Kitilazi bantu ba Hamori, isi wa Sekemu. Kubuni tunamukitila? 29 Songo bantu babano babezaga ku kuboko kwane, songo natikya Abimeleki. Ninatendile ku Abimeleki bunee: ‘Talikila iyombo lyobe, nu vwa nalyo.”’
30 Gongule Zebuli, mwangati wa mwino, moki ma Gaali, mwana wa Ebedi, bongoa bwage bwabede bukali. 31 Nu asingile migenzi mu bwengelezi ku Abimeleki, ku Aruma kumutenda bunee: “Lola, Gaali, mwana wa Ebedi, nu mibuto zage bavwa ku Sekemu nu balubikania mwino buno bakusombe. 32 Kano kaluma, enda mu kindi, uwe nu bantu beli nobe gamozi, mukobe mu isoa. 33 Mu nindunindu, mu kusanuka kwa musi, yukazi nu solobokelazi mwino. Gabase Gaali nu bantu beli nage, wabakitile anga buwavwame.”
34 Abimeleki nu bantu bansania babezaga gamozi nage bazanzukile mu kindi nu bakobile bwigi na Sekemu mu bibombo binazi. 35 Nu Gaali, mwana wa Ebedi, abasile nu emenne ga mwingilo wa mwino. Abimeleki nu bantu babezaga gamozi nage bazanzukile, babisukile gabakobaga. 36 Gaamonine ku bantu, Gaali atendile ku Zebuli bunee: “Lola. Bantu bakugela ku nkangamo za miduko.”
Zebuli amwakwide bunee: “Bilimelime bya miduko u byukumona anga bantu.”
37 Gaali atendile lingo bunee: “Lola, bantu bakugela munkatini mwa kisi nu kibombo kimozi kikutuka ku lulenge lwa ku muti wa Mwalo wa Bagila.”
38 Nu Zebuli amutendile bunee: “Kutenda kwobe kuli kuni kuwatendile bunee: ‘Abimeleki eli nazi buno tumukitile?’ Ndi babano ta bantu bawabengagile? Basa lino witane nabo.”
39 Nu Gaali asondelezizie bantu ba ku Sekemu nu eitenne na Abimeleki. 40 Abimeleki amuyangile nu Gaali atinine. Bantu beingi basumitilwe aaba nu kubasa ku mwingilo wa mwino. 41 Abimeleki eikede ku Aruma; nu Zebuli apumbizie Gaali nu mibuto zage buno tabeikale lingo ku Sekemu.
42 Gakede busi bantu bendile ku masoa. Nu basambalide Abimeleki. 43 Abeganizie bantu bage ku bibombo bisatu nu bakobile mu masoa. Gaamonine bantu bakutuka ku mwino, abasolobokede nu kubeita. 44 Abimeleki nu kibombo kyage basasizie nu bemenne ga mwingilo wa mwino. Bingo bibombo bibili bitumine lubilo kwita bansania babezaga mu masoa. 45 Abimeleki eitanizie mwino musi unsania. Akatile mwino nu eitile bantu babezaga mugo. Asambwide mwino nu abalanganizie munkange mugo.
46 Gongule bantu bansania ba numba nnene za Sekemu beingide mu kiziki kyalanga kya numba za kalaga Beriti. 47 Abimeleki asambalidwe bunee: “Bantu bansania ba numba nnene za Sekemu bakundamana.” 48 Abimeleki abakamine mwiduko wa Zalmoni, we nu bantu bansania babezaga gamozi nage, nu Abimeleki akatile isaga mu kuboko kwage nu asesile lutabi lwakama, alusongezye nu alwekile ga kituli kyage. Kumbusa abwide bantu babezaga nage bunee: “Anga bubo bumwamona nkukita, sasiazi kubukita.” 49 Ububo na muntu na muntu asesile lwage lutabi nu bayangile Abimeleki kulubika ku kitutu kya numba. Bakongizie keiya ku numba nu bantu beli mumo. Ububo bantu bansania ba numba nnene za Sekemu bakule bwigi na kanunu kamozi (1.000) ka bamulume nu bakikulu.
Lukuo lwa Abimeleki.
50 Kumbusa, Abimeleki endile ku Tebesi, abikile ido ku Tebesi nu agukatile. 51 Kwabezaga numba ndazi nu mbibu munkatini mwa mwino nu bantu ba mwino batinine mo, bamulume nu bakikulu bansania; beiyigede mo nu babakamine gantata ga numba. 52 Abimeleki endile ku zezo numba buno azite, nu abasile bwigi na lwibi buno alugisie na keiya. 53 Mukikulu umozi akumbizie ngogo nnene gantata g'itoe lya Abimeleki nu amubungwide itoe. 54 Kazanga kongo amanine mweki wa ngabo zage nu amubwide bunee: “Tikya kisando kyobe, nnite; bantu banakivwa kuntenda bunee: ‘Mukikulu u wamwitile.”’ Nu wozo musikila amubasanizie mwene wa kisando nu akule. 55 Gamonine baIsraeli buno Abimeleki akua, basubizie nawe kwage ku numba.