Gideoni apumbia baMidiani.
8
1 BaEfuraimu bamubuzizie bunee: “Kubuni ntwatumanine gawendile kwitana na baMidiani? Kubuni kuwatukitide bubo?” Bamubezizie nunse. 2 Nu abakwide bunee: “Kikizi kinakitile kigezye na kimwakitile? Ndi bisesa bya ngano za Efuraimu ta bisoga kutinga matubulo ma biguma bya Abiezeri? 3 Kalaga akasenne bakota ba Midiani, Orebu nu Zebu, mu maboko meinyu. Nu ninavwamine kukita kikizi kutinga beinyuwe?” Nu gaatendile bubo, bongoa bwabo kweli bwabotile.
4 Gideoni nu bantu nkama isatu babezaga gamozi nage babasile ku Yordani nu basokile. Babezaga bakutwa tondo babayangile kankanka. 5 Ububo abwide bantu ba Sukoti bunee: “Ndi bwakulungana, kasazi bantu banili nabo tumpampa kubuno bakutwa. Nkuyangana na Zeba nu Zalmuna, bakota ba baMidiani.”
6 Bakota ba Sukoti bakwide bunee: “Ndi kuboko kwa Zeba nu Zalmuna kuseli ku kuboko kwobe kalazi buno tukase iyombo lyobe tumpampa?”
7 Gideoni abwide bunee: “Ku bubo gakasane Yehowa Zeba nu Zalmuna mu kuboko kwane, nasusule mibili zeinyu na mikele za mu kalula nu za migunga.”
8 Kutuka gago abakamine ku Penueli nu ababuzizie nubo lulo lubuzio. Nu bantu ba Penueli bamwakwide anga bwakwide bantu ba ku Sukoti. 9 Nu abwide bantu ba Penueli bunee: “Ganasubye bulonge bukata, nasambule numba nnene zeno.”
10 Zeba nu Zalmuna babezaga ku Karkori, nu mayombo mabo gamozi nabo, bantu tununu ikumi nu tutano (15.000), babo bansania basigalaga ku iyombo lya bantu ba kuntata. Bantu bakule babezaga tununu lukama nu makumi mabili (120.000), bansania babezaga na myene za nganda. 11 Gideoni abakamine mu nzila za babo beikalaga mu hema ku lulenge lwa kuntata kwa Noba nu Yogibea, nu asolobokede iyombo, kubuno iyombo talyabezaga kayikayika ku bita. 12 Zeba nu Zalmuna batinine nu abayangile nu kukata bakota babili ba baMidiani, Zeba nu Zalmuna. Nu azangiziezangizie iyombo linsania na boba.
13 Gideoni mwana wa Yoasi asubizie kutuka ku bita mu kusanuka kwa musi. 14 Akatile musikila wa ku Sukoti nu amubuzizie. Musikila amusanzide meina ma bangati ba Sukoti, nu bakulu bago, bantu makumi mutubakamo nu mutubakamo. 15 Nu Gideoni abasile ku bantu ba Sukoti nu atendile bunee: “Lolazi Zeba nu Zalmuna bamwambengelagile kubo. Mwambwide bunee: ‘Ndi kuboko kwa Zeba nu Zalmuna kuseli ku kuboko kwobe kalazi buno tukase bantu bobe bese bakutwa tumpampa?”’ 16 Nu akatile bakulu ba mwino nu atolile mikele za kalula nu za migunga nu eigisizie bantu ba Sukoti nazo. 17 Nu asambwide numba nnene za Penueli nu eitile bantu ba mwino.
18 Kusila abuzizie Zeba nu Zalmuna bunee: “Buni bwabezaga lukita lwa bantu bamwitaga ku Tabori?”
Bamwakwide bunee: “Babezaga basusanania nobe, nawe na wabezaga anga mwana wa mukota.”
19 Nu atendile bunee: “Babezaga mibuto zane, natukile nabo mu nda emozi; nkulumbila mu Yehowa mulami, songo mwabalamizie, songo nsinamwitile.”
20 Nu atendile nkula zage Yeteri bunee: “Zanzuka, ubeite.” Tondo musikila ntatikizye mwene mu musagi kubuno akule boba nu abezaga eikili musikila tugu.
21 Zeba nu Zalmuna bakwide bunee: “Zanzuka uwenyene utwite, kubuno buli wamulume u buli magala mage.” Gideoni azanzukile nu eitile Zeba nu Zalmuna, nu atikizye myambalo za malebo mu makosi ma ngamia zabo.
22 Nu baIsraeli batendile ku Gideoni bunee: “Utwangate, uwe nu mwana wobe aba nu muyukulu wobe kubuno watwonezie mu kuboko kwa baMidiani.”
23 Nu Gideoni ababwide bunee: “Nsyamwangate aba mwana wane ntamwangate. Yehowa u wamwangate.” 24 Gideoni ababwide bunee: “Nkumusega tugu kimozi. Nkasazi mpete za matuzi zimwakatile ku bita.” Babezaga na mpete za olo ku matuzi kubuno babezaga baIsimaeli.
25 Bamwakwide bunee: “Tukukukasa byo na mbogimbogi.” Banzile nsulu gansi nu muntu na muntu eisile gago mpete zaakatile ku bita. 26 Nu buzitu bwa mpete za olo zaasegile, zakukile shekeli kanunu nu nkama mutubakamo (1.700) za olo a gamozi na myambalo, nu mango malebo, nu nsulu zakisimana zavwalaga bakota ba baMidiani, nu myambalo zabezaga ku makosi ma ngamia zabo. 27 Nu Gideoni akitile efodi za nkisi za malebo na olo nu azibikile ku Ofura, mwino wage. BaIsraeli bansania bakitile nazo butazi mu mitima zabo kuko nu zabede itega ku Gideoni nu ku kikanga kyage.
28 Ububo baIsraeli bakindile baMidiani nu tabayukizie lingo bita. Nu kisi kyabobelede myaka makumi manazi mu bindi bya Gideoni.
29 Yerubaali mwana wa Yoasi endile kwikala mu numba zage. 30 Gideoni wenyene abutile basikila makumi mutubakamo, kubuno abezaga na bakikulu beingi. 31 Nu kalemba kage keikalaga ku Sekemu kamubutide mwana wamulume nu amwinikile Abimeleki. 32 Gideoni mwana wa Yoasi akule ese mukungu nunse, nu ayikilwe mu nsinda z'isi Yoasi mu Ofura wa baAbiezeri.
33 Nu gakule Gideoni, baIsraeli basubizie lingo kukita butazi mu mitima zabo na baBaali, nu babikile Baali-Beriti kuba kalaga kabo. 34 BaIsraeli tabakengede lingo Yehowa, Kalaga wabo, wabonagia ku maboko ma beiti babo bansania mu ndenge insania. 35 Nu tabakitide kikanga kya Yerubaali, u Gideoni, mponga ku busoga bunsania bwakitide Israeli.