Kalaga akokola ku iyombo lya Gideoni.
7
1 Yerubaali, u Gideoni, nu bantu bansania baabezaga nabo bayukile lukesikesi nu bakitile ido bwigi na kanuabalongo ka Harodi, nu iyombo lya baMidiani lyabezaga ku lulenge lwa kwikazi lwa Gideoni bwigi na mwiduko wa More, mu kibitabita. 2 Yehowa abwide Gideoni bunee: “Bantu baguli nabo beli beingi kutinga, buno nikasane baMidiani ku maboko mabo, Israeli anakivwa kwikotia kundi nu kutenda bunee: ‘Kuboko kwane nnenyene u kwanonia.’ 3 Kasi, enda usambale ku matuzi ma bantu bunee: ‘Wozo ukukua boba nu kugilimina asubye nu kutuka mu mwiduko wa Gileadi.”’ Munkatini mwabo mwasubizie tununu makumi mabili nu tubili (22.000). Basigede tununu ikumi (10.000). 4 Nu Yehowa abwide Gideoni bunee: “Bantu beikikili beingi kutinga. Gela nabo ku luuzi nu nakulindikilebo kuko. Nu muntu unsania u nakubulage buno wono akwenda nobe nti enda nobe. Nu wozo muntu u nakubulage buno ntakwenda nobe nti ntende.” 5 Kumbusa Gideoni agelile na bantu ku luuzi. Yehowa amubwide bunee: “Babo bansania banuage mazi mu kulamba anga bukulambaga mboa, nti wabalekanukya na babo banse bakunua mazi nu kukoma mazu.” 6 Maganzo ma babo balambaga mazi na kuboko ku kanua kabo mabezaga nkama isatu; nu bango bansania banune mazi na kukoma mazu. 7 Nu Yehowa abwide Gideoni bunee: “Namwonie nu nakasane baMidiani mu kuboko kwobe na zezo nkama isatu za bantu balambile mazi. Nu bango bansania basubye nawe kwage.” 8 Nu Gideoni asubizie babo bango bansania baIsraeli, nawe ku hema zage, nu alangile babo bantu nkama isatu nu bakatile malia nu myonze za babo bango.
Nu ido lya Midiani lyabezaga kunsi kwage mu kibitabita. 9 Mu kindi kikyo, Yehowa amubwide bunee: “Zanzuka, ugele ku ido lya Midiani, kubuno nalikasenne mu kuboko kwobe. 10 Tondo ndi ukukua kugela boba, kasi gela gamozi na Pura, mukiti wobe. 11 Ungwilile bibakutenda nu kumbusa maboko mobe mabe na magala kugela kwitana n'iyombo.”
Agelile gamozi na Pura, mukiti wage, ku isula ly'ido. 12 BaMidiani nu baAmaleki nu bantu bansania ba kuntata babezaga mu kibitabita anga bwingi bwa nzige nu ngamia zabo ziteli na maganzo anga misege za kitatenge. 13 Gabasile Gideoni, ongule muntu akulagulila munyage ndozi, atendile bunee: “Ungwilila, nakesia na ndozi nu kampampa kamozi kakoloka munkatini mu ido lya Midiani nu kabasa ku hema emozi, kuzitulungula nu kuzigusia gansi.”
14 Nu munyage amwakwide bunee: “Kikino takili kingo kintu umpanga mwene wa nganda wa Gideoni mwana wa Yoasi, muIsraeli. Kalaga es'akasana Midiani nu iyombo lyage linsania mu kuboko kwage.”
15 Gongule Gideoni kulagulwa kwa ndozi nu bwisulilwa bwazo, akumbaminne Kalaga. Nu asubizie ku iyombo lya Israeli, nu atendile bunee: “Zanzukazi, kubuno Yehowa es'akasana iyombo lya Midiani ku kuboko kweinyu.” 16 Nu abeganizizie babo bantu nkama isatu mu bibombo bisatu. Akasile bansania myonze nu malega meli bulia nu tusuku mu malega. 17 Nu ababwide bunee: “Kulolaga kundi, nu mukite bunakite. Ganabase ku isula ly'ido, nti mwakita anga bunakite. 18 Ganide monze, nne nu bansania beli na nne gamozi, mwide nu beinyuwe myonze mu ndenge insania z'ido nu lalukazi bunee: ‘Ku Yehowa nu ku Gideoni.”’
19 Gideoni nu babo bantu lukama babezaga gamozi nage, babasile ku masula m'ido bwigi na nkungu mutuba za kindi anga gababikaga balangi. Bidile myonze nu kubugia malega mabezaga mu maboko mabo. 20 Nu bibombo bisatu bidile myonze nu byabugizie malega nu kukata tusuku mu maboko mabo ma seikazi nu mu kuboko kwa seidume myonze buno bazide. Balalukile bunee: “Mwene wa nganda wa Yehowa nu wa Gideoni.” 21 Muntu na muntu emenne ku kiziki kyage kutimba ido. Iyombo lya Midiani linsania litumine lubilo; balalukile nu kutina. 22 Babo bantu nkama isatu bidile myonze, nu mu iyombo linsania Yehowa abagalukizye buno beitane na muntu na muntu na munyage na mwene wage. Iyombo lyatinine ku Beti-Sita mu Zerera aaba nu ku mwaga wa Abeli-Mehola bwigi na Tabati.
23 BaIsraeli, u baNafutali nu baAseri nu baManase bansania bamaninwe nu bayangile baMidiani. 24 Gideoni asingile migenzi mu kisi kya miduko kya Efuraimu, atendile bunee: “Gelazi ku baMidiani nu katazi Yordani nu nuuzi lwabusio lwabo aaba nu ku Beti-Bara.” Bantu bansania ba Efuraimu bakundamenne nu bakatile Yordani aaba nu ku Beti-Bara. 25 Bakatile bakota babili ba baMidiani, Orebu nu Zebu. Beitile Orebu ga lwanda lwa Orebu, nu beitile Zebu ku itengu lya kukambutula biguma lya Zebu. Bayangile baMidiani, nu bekile matoe ma Orebu nu Zebu ku Gideoni lisilya lya Yordani.