Hema za Musanganano zimikwa ku Silo.
18
1 Nu musanganano unsania wa baIsraeli wakundamenne ku Silo, nu beimikile Hema za Musanganano gago; kisi kyabezaga kise kyakindwa lwabusio lwabo. 2 Nu kwasigede munkatini mwa baIsraeli bikanga mutubakamo bitekata bwiyani bwabo. 3 Yosua atendile ku baIsraeli bunee: “Gani gasilile mutambo weinyu mu kukata kisi kyamukasile Yehowa, u Kalaga wa basoinyuwe? 4 Sombolazi bantu basatu mu kikanga na kikanga, nu nabasinge kutambula kisi, kutinga mukyo nu kusanza bukinabeganibwa ku bwiyani bwabo, nu kusubya kundi. 5 Nu bakibeganie mu byindi mutubakamo. BaYuda beikale mu mwaga wabo wa ku lulenge lwa kwidume, nu ba numba za Yosefu beikale mu mwaga wabo wa ku lulenge lwa kwikazi. 6 Mwalolesie buli kisi mu byindi mutubakamo, nu mumvwile nalyo kuno, nu namwesele mbale lwabusio lwa Yehowa, u Kalaga weitu. 7 Tugu baLawi tabeli na kyindi munkatini mweinyu, kubuno busankoga bwa Yehowa buli bwiyani bwabo; baGadi nu baRubeni nu kyindi kya kikanga kya baManase bakatile bwiyani bwabo ku lisilya lya Yordani ku ntungo za kuntata, bwabakasile Musa, mukiti wa Yehowa.”
8 Bamulume bazanzukile nu bendile, nu Yosua akakizizie babo bendile kutambula kisi; abatendile bunee: “Tingazi mu kisi nu sanzazi bukili nu nti mwamvwila lingo, nu namwesele mbale kuno lwabusio lwa Yehowa ku Silo.” 9 Babo bamulume bendile nu batambwide kisi, nu basanzile ku kigondi kya mukanda miino zakyo nu kuzibegania ku byindi mutubakamo, nu basubizie ku Yosua ku ido ku Silo. 10 Yosua abeside mbale ku Silo lwabusio lwa Yehowa, nu gago Yosua abeganizizie baIsraeli kisi anga bwabezaga bikanga byabo.
Bwiyani bwa baBenjamina.
11 Nkungu za kwesa mbale kwa kikanga kya baBenjamina anga bwabezaga bikanga byabo zakukile, nu mwaga wabo wabede gasamba kikanga kya baYuda nu kikanga kya baYosefu. 12 Mwaga wa ku lulenge lwa kwikazi wabezaga watukila ku Yordani nu wabakamine mu kilenge kya ku lulenge lwa kwikazi kya Yeriko nu wabakamine mu kisi kya miduko ku lulenge lwa kunsi, nu wazindide ku kalula ka Beti-Aweni. 13 Mwaga wasigelede kutuka gago ku lulenge lwa Luzi mu ntungo za ku lulenge lwa kwidume, ku kilenge kya Luzi u Beteli, nu wagelile ku Ataroti-Adari, ku mwiduko guli ku ntungo za ku lulenge lwa kwidume kwa Beti-Horoni wa kunsi. 14 Kutukila gago mwaga watingile ku lulenge lwa kunsi kwa mwiduko walolana na Beti-Horoni, wakumbile ku lulenge lwa kwidume nu wazindide ku Kiriati-Baali, u Kiriati-Yearimu, mwino wa kikanga kya Yuda. Wono wabezaga mwaga wa kunsi. 15 Nu mwaga wa ku lulenge lwa kwidume watukile ku isula lya Kiriati-Yearimu nu watingile ku Efuroni, ku kanuabalongo ka luuzi lwa Nefutoa, 16 nu mwaga wagelile ku kibelekelo kya mwiduko wetamina mpinga za mwana wa Hinomu guli ku ntonga za ku lulenge lwa kwikazi kwa mpinga za Refaimu, nu wagelile mu kibitabita kya Hinomu ku lulenge lwa kwidume kwa kilenge kya baYebusi nu wagelile ku Eni-Rogeli. 17 Wakumbile ku lulenge lwa kwikazi nu wabasile ku Eni-Semesi nu wasigelede ku Geliloti walolela ku mwiduko wa Adumimu, nu wagelile ku ikozi lya Bohani, mwana wa Rubeni. 18 Watingile mu kilenge kya Beti-Araba ku lulenge lwa kwikazi nu wagelile ku Araba. 19 Wasigelede ku kilenge kya Beti-Hogla ku lulenge lwa kwikazi nu mwaga wazindide ku kiziba kya ku lulenge lwa kwikazi kwa Kitatenge kya Munkange, ga meito ma Yordani. Wono u mwaga wa ku lulenge lwa kwidume. 20 Yordani u wabede mwaga wa ku lulenge lwa kuntata. Bubuno u bwiyani bwa kikanga kya baBenjamina anga bwabezaga bikanga byabo mu myaga zage insania. 21 Nu miino za kikanga kya baBenjamina anga buli bikalo byabo, zabezaga Yeriko, nu Beti-Hogla, nu Emeki-Kesisi, 22 nu Beti-Araba, nu Zemaraimu, nu Beteli, 23 nu Awimu, nu Para, nu Ofura, 24 nu Kefari-Amoni, nu Ofuni, nu Geba: miino ikumi nu ibili gamozi na miino zazo mikeke: 25 nu Gibeoni, nu Rama, nu Beroti, 26 nu Misipa, nu Kefira, nu Moza, 27 nu Rekemu, nu Iripeli, nu Tarala, 28 nu Zela, nu Elefu, nu Yebusi, u Yerusalema, nu Gibea, nu Kiriati: miino ikumi nu inazi gamozi na miino zazo mikeke. Zeno u ntiko za kikanga kya baBenjamina anga bwabezaga bikanga byabo.