Bwiyani bwa baManase.
17
1 Kyindi kyalasilwe ku kikanga kya Manase, kubuno abezaga nkula za Yosefu: Makiri, nkula za Manase, isi wa Gileadi, akasilwe Gileadi nu Basani kubuno abezaga muntu wa bita. 2 Nu byindi byalasilwe ku bango baManase anga buli bikanga byabo: baAbiezeri, nu baHeleki, nu baAsirieli, nu baSekemu, nu baHeferi, nu baSemida; babano u bikanga bya Manase, mwana wa Yosefu, anga buli bikanga byabo. 3 Tondo Zelofehadi, mwana wa Heferi, mwana wa Gileadi, mwana wa Makiri, mwana wa Manase, ntabezaga na basikila, tondo bakinga: nu mamano meli meina ma bakinga bage: Mala, nu Noa, nu Hogla, nu Milka, nu Tirza. 4 Babasile lwabusio lwa Eleazari, sankoga, nu Yosua, mwana wa Nuni, nu basondelezia nu babatendile bunee: “Yehowa akakizizie Musa kutukasa bwiyani gamozi na mibuto zeitu.”
Ububo Yosua abakasile bwiyani munkatini mwa mibuto za beisibo anga ikakizio lya Yehowa. 5 Ububo byindi ikumi byatingide ku Manase, gantata ga kikyo kya kisi kya Gileadi nu Basani kili lisilya lya Yordani, 6 kubuno bakinga ba Manase bakatile bwiyani gamozi na basikila bage. Nu kisi kya Gileadi kyabede ku babo bango baManase.
7 Nu mwaga wa baManase watukide ku Aseri nu kubasa ku Mikimetati, guli kuntata kwa Sekemu; gago wasigelede ku lulenge lwa kwidume ku beiya Eni-Tapua. 8 Kisi kya Tapua kyabezaga kya Manase, tondo mwino wa Tapua guli mu mwaga wa baManase wabezaga wa baEfuraimu. 9 Nu mwaga wakumbide ku Mpinga za Kana. Gago, miino zabezaga ku lulenge lwa kwidume lwa luuzi, gasamba miino za baManase, zabezaga za baEfuraimu. Kutukila gago, mwaga wa baManase watingile ku lulenge lwa kwikazi kwa mpinga nu wazindide ku Kitatenge. 10 Kisi kya ku lulenge lwa kwidume kyabezaga kya baEfuraimu nu kya ku lulenge lwa kwikazi kyabezaga kya baManase, nu Kitatenge kyabezaga mwaga wabo. Kisi kya baAseri kyabezaga ku lulenge lwa kwikazi nu kya baIsakari ku lulenge lwa kuntata.
11 Lingo mu kisi kya baIsakari nu kya baAseri, baManase babede na Beti-Sani, nu Ibuleamu, nu beiya Dori, nu beiya Endori, nu beiya Tanaki, nu beiya Megido, gamozi na miino zazo mikeke; bisi bisatu. 12 Tondo baManase tabavwamine kwangata miino zezo; tugu baKanana tabazigile kutuka mu kikyo kisi. 13 Nu gabede baIsraeli bamona magala, babikile baKanana anga bakobe nu tababapumbizie nunse.
14 Nu kikanga kya baYosefu kyatendile ku Yosua bunee: “Kubuni kuwatukasa kyindi kimozi tugu kya kisi nu tuli kikanga kinene, kubuno aaba nu buno, Yehowa atukasile mponga nunse?”
15 Yosua ababwide bunee: “Ndi muli kikanga kinene kya bantu mwende ku lubanda kwidimina kiziki mu kisi kya baPerizi nu baRefaimu, kubuno kisi kya miduko kya baEfuraimu kyakundelela kumuli.”
16 BaYosefu bakwide bunee: “Kisi kya miduko takyatukuka; nu baKanana bansania bakwikalaga mu kibitabita, beli na tuyanga twa byuma, babo beli ku Beti-Seani gamozi na miino zago mikeke, nu babo beli ku kibitabita kya Yezereheli nu bo.”
17 Yosua abwide ba numba za Yosefu ku baEfuraimu nu baManase, bunee: “Muli kikanga kinene, nu muli na bwangato bunene, tamwabe na kyindi kimozi tugu, 18 tondo kisi kya miduko kyabe kyeinyu, kubuno luli lubanda nu mwalulime nu lwabe lweinyu aaba nu ku myaga zalo; kubuno mwabapumbie nunse, aba beli na tuyanga twa kyuma nu beli na magala.”