Bwiyani bwa baYosefu.
16
1 Nu mwaga wa kyindi kya kisi kyalasilwe ku baYosefu watukide ku Yordani bwigi na Yeriko mu mazi ma Yeriko ku ntungo za kuntata. Watingile mu kalula, nu kutuka ku Yeriko wabakamine mu kisi kya miduko ku Beteli. 2 Watukide mu Beteli nu kutinga ku Luzi, wasulukile mwaga wa baArki ku Ataroti. 3 Wagelile ku ntungo za kunsi ku mwaga wa baYafeleti, kubasa ku mwaga wa Beti-Horoni wa kunsi, aaba nu kubasa ku Gezeri nu kuzindila ku Kitatenge. 4 BaYosefu, u baManase nu baEfuraimu, batolile bwiyani bwabo.
Bwiyani bwa baEfuraimu.
5 Bubuno u bwabezaga myaga za baEfuraimu, anga bwabezaga bikanga byabo: mwaga wa bwiyani bwabo watukile ku ntungo za kuntata, wabezaga Ateroti-Adari aaba nu kubasa ku Beti-Horoni wa kuntata. 6 Wagelile ku lulenge lwa ku Kitatenge; ku lulenge lwa kwikazi kwa Mikimetati, nu ku lulenge lwa kuntata wakumbile ku Tanati-Silo, nu kutinga ku lulenge lwa kuntata ku Yanoa. 7 Wagelile kutuka Yanoa kubasa Ataroti nu ku Nara, witubizie ku Yeriko nu kuzindila ku Yordani. 8 Kutuka ku Tapua, mwaga wasigelede ku ntungo za kunsi ku Mpinga za Kana nu kuzindila ku Kitatenge.
Bubuno u bwiyani bwa kikanga kya Efuraimu, anga bwabezaga bikanga byabo, 9 gamozi na miino zabikidwe baEfuraimu munkatini mwa bwiyani bwa baManase, miino zezo insania gamozi na miino zazo mikeke. 10 Tondo tabapumbizie baKanana beikalaga mu Gezeri; ububo baKanana beikede munkatini mwa baEfuraimu aaba nu lelo, tugu babikilwe kukita milimo mibibu anga bakobe.