32
1 “Beinywe ba kwigulu, ungwililazi; nu inyuwe ba ga kisi, ungwazi moki mankubula: 2 Meigisia mane mavwe kumuli anga bukuloka mbula;
Nu moki mane mabe anga mame,
Mabe anga mbula zikuloka ga nsamba mbisi,
Nu anga mamata ma mbula ga bitogo.
3 Kubuno nkusambala izina lya Yehowa;
Ganunazi Kalaga weitu kubuno eli munene.
4 Eli lwanda kutuli, nu mulimo wage wasililila,
Nu nzila zage insania zili zisanana.
Eli Kalaga wasililila utakukita bubi aba kakeke.
We eli wisanana nu wasililila nunsania.
5 Tondo bantu bage bamukitilaga bubi,
Nu tabaswaga lingo kumanwa bantu bage.
Beli beya ngini.
6 Inyuwe bikongolo biteli na menge,
Ndi bubo mukukitilaga Yehowa?
Ndi nteli Tateiswe Mubumbi weinyu,
Wozo wamukitile nu kumubumba?
7 Kengelazi myaka za wakalazi;
Kengelazi bibuti byatingile kalazi.
Buzia so, nu akulolesie,
Buziazi bakulu beinyu nu bamwigisie.
8 Gabeganizie Wozo Wasakama Nunse bwiyani ku bilongo,
Ee, gaabeganizie kisi ku bantu bansania,
Abikile myaga za kisi anga geigezye maganzo ma baIsraeli.
9 Kubuno kilongo kya Yehowa kili bantu bage,
Nu babo ba Yakobo beli bwiyani bwage.
10 Amusangile mu kalula,
Mu kalula kanene nu keli bulia;
Amutimbile nu kumulanga;
Amulangile anga kamoni ka liso lyage.
11 Nu anga bukupupa ndiu ga kizumba kyazo
Nu kusindika byana byazo,
Nu kulambya byupi nu kubakata
Nu kubeka ga byupi byazo.
12 Yehowa tugu amusondelezizie.
Takwabezaga kango kalaga kageni gamozi nage.
13 Amusakikile gantata ga biziki bya kisi;
Nu balide mbuto za masoa nu biguma bya miti.
Amukuzizie na buuki bwatukile mu makozi,
Nu na makiti matukile mu ikozi ibibu,
14 Nu na mabele nu manteka ma bituganwa,
Nu na byana bya mikoko nu bya mpene byanona,
Na bilimba bya mikoko bisoga nunse bya Basani, nu mpene,
Nu na ngano nsoga nunse.
Mwanune mazi makisimana ma biguma bya mizabibu.
15 Tondo Yesuruni alundile nu kunana.
Embukile nu kulunda nunse,
Nu asigile Kalaga wamubumbile;
Abengile lwanda lwa lonio lwage.
16 Bamwitizie na lugi ku kabamba ka tungo tulaga twabo,
Nu bamwongezie na nkisi zabo mbi.
17 Bakasile tuyulo twabo ku basumbu, ta ku Kalaga lebelebe,
U tulaga tubatamenyine,
Tulaga tuto twamonekile lubi tugu,
Tulaga tutakule beisibo boba.
18 Mwatukile ku lwanda lwamubutile;
Ee, mwasigile Kalaga wamubutile.
19 Gaamonine bubo, Yehowa ongilwe
Nu asombile basikila nu bakinga bage.
20 Atendile bunee: ‘Nkubakasa mugongo,
Nimone buni bwabe kuzinda kwabo.
Kubuno beli kikanga kya kuguna,
Bantu beteli na bukatizio.
21 Banitizie na lugi ku kikyo kiteli Kalaga;
Banongezie na nkisi zabo zili bulia.
Nabeitizie na lugi ku babo beteli kilongo,
Nabongie na kilongo kiteli na menge.
22 Bongoa bwane buli bukali anga keiya,
Nu bwakumba ku biziki bya bakuzi.
Bwagisie kisi nu matubulo makyo,
Nu bwagulumizie nanda za miduko.
23 Nitizie bubi bwingi kubeli
Nu kubalibula na misungu zane insania.
24 Nabasingile nzala nkali,
Nu nsambo nkali za kondia nu lukuo lukali.
Nasinge kubeli nyama nkali za meinyo makali,
Gamozi na buganga bwa mpoma zikugelegeta mu mukungu.
25 Mu mulungu myene za nganda zitane,
Nu mu numba zabo boba bukali bwabe.
Basikila nu bakinga bakue,
Nu babo bakumoma nu babo beli na mbwe.
26 Natendile nababalanganie mu kisi
Nu kuzimizia lukumu lwabo munkatini mwa bantu,
27 Tondo nakule kwililika kwa beiti babo boba,
Banavwa kutamenya;
Nu banavwa kutenda bunee: “Kuboko kweitu kwasakikwa
Nu Yehowa ntakitile bubo.”’
28 Kubuno beli kilongo kiteli na menge,
Nu kitakusongolola.
29 Songo babezaga na menge,
Songo banamenyine kitondo kikino nu kumenyinina kuzinda kwabo.
30 Buni bunamenya muntu umozi kupumbia kanunu,
Nu bantu babili kutinia tununu ikumi,
Ndi lwanda lwabo talwabakunzile,
Nu Yehowa ntabasigile?
31 Kubuno lwanda lwabo taluli anga Lwanda lweitu,
Nu beiti beitu beitabizia bubo.
32 Kubuno muzabibu wabo watukile ku mizabibu za Sodoma,
Nu watukibwa ku masoa ma Gomora;
Mizabibu zabo zili za lubaba,
Kibombo na kibombo kyazo kili ngigi.
33 Maku mabo meli buganga bwa nzoka,
Ee, buganga bukali bw'igilima.
34 ‘Ndi nsyalangile kikino
Nu kukibisa mu isuku lyane?
35 Kusuba kuli kwane; ee, nkasuba;
Ku nkungu za kuselemukya kugulu kwabo zikavwa;
Kubuno lukuo lwabo luli bwigi,
Nu kuzika kwabo kukusasia kuvwa.’
36 Kubuno Yehowa akasungia bantu bage,
Nu kukwila bakiti bage kyombo
Mu nkungu zamone buno magala mabo masila,
Gaamone takuli wampa wasigala, aba mukandwa aba mukandulwa.
37 Nu We atende bunee: ‘Tulaga twabo tuli kuni,
U lwanda lubatinine kulo?
38 Kuni kuli tulaga twalide manona ma bisansa byabo?
Nu kunua maku ma tuyulo twabo twa kunubwa?
Tuzanzuke, tumukasie!
Nu tube itinino lyeinyu!
39 Kano kaluma menyazi buno nne nili wozo.
Takuli kango kalaga tondo nne tugu.
Nkwita nu kulamia, nkusumita nu konia;
Nu takuli wozo unavwama kutikya ku kuboko kwane.
40 Nkulambya kuboko kwane kwigulu nu kusambala bunee:
‘Anga bunkulama ku milyalya,
41 Gankuyikila mwene wane wa nganda ukukelima,
Nu kugukata ku kuboko kwane mu lusungio,
Nti nkasuba beiti bane,
Ee, nkuliga babo bakunsomba.
42 Nkakita misungu zane kulebwa na mikila,
Nu mwene wane wa nganda kulia misuna;
U mikila za beitwa nu za bakandwa,
Zabase ku matoe ma basondelezia ba beiti bane.’
43 Inyuwe ba bilongo, bogazibogazi gamozi na bantu bage,
Kubuno asube mikila za bakiti bage.
Asube beiti bage
Nu kukulula kisi kyage nu bantu bage.”
44 Musa avule na Yosua nu atendile moki mansania ma lwimbo luluno ku bantu, nu bamungule. 45 Gasilile Musa kutenda moki mamano ku baIsraeli bansania, 46 abakakizizie bunee: “Kokomeziazi mitima zeinyu mu bitondo bibino binsania binkumulongekela lelo, buno mukakizie bana beinyu beidange nu kwanza nunse moki mansania ma milembe zeno. 47 Kubuno tameli moki ma bulia kumuli, kilo, meli kalamo keinyu. Namo mwalamage bindi byingi mu kisi kimwiyane gamwasoke Yordani.”
Musa akue ga mwiduko wa Nebo.
48 Yehowa abwide Musa bunee: 49 “Bakama mwiduko wono Nebo guli munkatini mwa miduko za Abarimu mu kisi kya baMoabu, gukulolana na Yeriko, nu lola ku kisi kya Kanana kinsania, u kisi kinkukasa baIsraeli kuba bwiyani bwabo. 50 Gago ga mwiduko u wabakama wakue nu kukundamanibwa na baso, anga bwakule Haruni solonzi ga mwiduko wa Hori nu kukundamanibwa na beisi. 51 Keli kabamba keinyu kubuno mwanagide, inyuwe babili, munkatini mwa baIsraeli ku mazi ma Meriba-Kadesi, mu Kalula ka Zini, nu kubuno tamwakokomekizizie kusililila kwane munkatini mwa baIsraeli. 52 Ukinsa wamone ku kisi kutukila bulazi, tondo ntwingile mu kisi kinkukasa baIsraeli.”