Yosua abe musondelezia muto.
31
1 Mu nkungu zezo Musa endile ku baIsraeli bansania nu ababwide bunee: 2 “Lelo nili na myaka lukama nu makumi mabili, nu nsikuvwama lingo kumusondelezia kutuka nu kwingila. Yehowa ambwide bunee: ‘Ntwasoke Yordani.’ 3 Yehowa, Kalaga weinyu, asoke luuzi lwabusio lweinyu nu abigie bilongo bibyo lwabusio lweinyu, nu mwiyane kisi kyabyo. Yosua, nu we lingo asoke lwabusio lweinyu, anga bwatendile Yehowa. 4 Yehowa abakitile anga bwakitide Sihoni nu Ogi, u bakota ba baAmori, nu kisi kyabo akibigizie. 5 Nu Yehowa abakase kumuli, nu mwatunganana kubakitila anga bunkumukakizia. 6 Mube na magala nu kuba na bupuka. Tamubakue boba aba kugilimina lwabusio lwabo, kubuno Yehowa, Kalaga weinyu, akwenda gamozi n'inyu, nu ntamusige aba kumumenka.” 7 Nu Musa amanine Yosua lwabusio lwa baIsraeli bansania, nu amubwide bunee: “Ba na magala nu bupuka, kubuno ukwenda na bantu babano kwingila mu kisi kyalagile Yehowa kukasa ku beisibo, nu ubeiyanie kyo. 8 Nu Yehowa wenyene akwenda lwabusio lweinyu, nu abe gamozi nobe. Ntakwibilile aba kukusiga. Ntukue boba aba kukutwa mu mutima.”
Nkungu za kusomena bantu milembe.
9 Nu Musa asanzile milembe zeno, nu azikasile ku basankoga, u baLawi bekaga Sanduku z'Idagano lya Yehowa nu ku bakulu bansania ba baIsraeli. 10 Musa abakakizizie bunee: “Ku kuzinda kwa mwaka na mwaka wa mutubakamo, ku nkungu zasombwedwe za mwaka wa kusigilila bantu nsombi, ku Kisagulo kya Nusu, 11 geli baIsraeli bansania lwabusio lwa Yehowa, Kalaga weinyu, ku kiziki kyasombole, somazi milembe zeno insania ku matuzi ma baIsraeli bansania. 12 Mwakundamanie bantu, bamulume nu bakikulu nu bana, nu bageni bansania bakwikala mu miino zeinyu, buno bongwilile, nu kwanza kukua Yehowa, Kalaga weinyu, boba, nu kwidanga mu bitondo binsania bya milembe zeno. 13 Nu bana babo batamenya milembe zeno batunganana kuzungwilila nu kumenya kukua Yehowa, Kalaga weinyu boba bindi binsania bimukikalaga mu kisi kimwiyane gamwasoke Yordani.”
Kwana kuzinda kwa Yehowa ku Musa.
14 Yehowa abwide Musa bunee: “Busi bwobe bwa kukua buse bwigi. Mana Yosua nu enda nage ku Numba za Musanganano buno nimwane nu kumubika mu mulimo.” Ukinsa Musa nu Yosua bavule nu beingide mu Numba za Musanganano, 15 nu Yehowa amonekile mu Numba za Hema mu kimpa kyasigede ku lwibi lwa Numba.
16 Yehowa abwide Musa bunee: “Kumbusa kwa bindi bikeke nti wakue nu kwenda ku baso. Nu bantu babano bakasasia kunsiga lubilo nu kukumbamina tungo tulaga twa bantu ba kisi kibakwingila mukyo. Bakansiga nu kwita idagano lyane linakitile nabo. 17 Nu busi bubo bongoa bwane bwabe bukali kubeli, nu nabasige nu kubisa kilungi kyane kubeli nu kubazikya. Bubi bwingi nu tubebe twingi twabavwile, nu busi bubo batende bunee: ‘Bubi bubuno nu tubebe tutuno, ndi tabyatubasila kubuno Kalaga weitu nteli n'iswe?’ 18 Lebelebe nkabakasa mugongo busi bubo ku kabamba ka bwagi bwabo bunsania bubakitile kugalukila tungo tulaga.
19 Kano kaluma sanza lwimbo luluno nu kulwigisia ku baIsraeli, balwimbe nu lube bulongeki bwane kubeli. 20 Kungwa nabeingizie mu kisi kiyala na mabele nu buuki, u kisi kinalagile beisibo, nkungu zibakulia nu kwembuka nu kulunda, nti bagaluke ku tungo tulaga nu kutukumbamina nu kumbenga nu kwita idagano lyane. 21 Gabavwile bubi bwingi nu tubebe twingi, nti lwimbo luluno lwabe bulongeki kubeli, kubuno talwibililwe na bana babo. Nizi makengelo mabo mabakukengelaga kano kaluma nti nsibeingizia mu kisi kinabalagile.” 22 Nu Musa asanzile lwimbo luluno busi bubo, nu alwigisizie ku baIsraeli.
23 Kumbusa kwa kusanza lwimbo, Yehowa abwide Yosua mwana wa Nuni bunee: “Ube na magala nu bupuka, kubuno ukwingizia baIsraeli mu kisi kinabalagile, nu nne nnenyene nabe gamozi nobe.”
24 Kumbusa kwa kusanza mu mukanda moki mansania ma milembe zeno 25 Musa akakizizie baLawi bekaga Sanduku z'Idagano lya Yehowa bunee: 26 “Tolazi mukanda wono wa milembe nu kugubika ku ntungo za Sanduku z'Idagano lya Yehowa, Kalaga weinyu, buno gube bulongeki kumuli. 27 Kubuno nizi buni bumuli, baguni nu beya ngini. Ganalamaga gamozi n'inyu mwagunine Yehowa, embe lino kumbusa kwa lukuo lwane! 28 Kundamaniazi bakulu bansania ba bikanga byeinyu nu mitonge zeinyu insania, nibasambalile moki mamano mansania nu kumana babo beli kwigulu nu ba ga kisi kubalongekela. 29 Kubuno nizi kumbusa kwa lukuo lwane mwabige nunsania nu kugaluka mu nzila zinamukakizizie. Mu bindi bikavwa bubi bukamuvwila ku kabamba ka mibi nu bwagi bumukakitaga ku Yehowa, nu mukamwongia ku kabamba ka milimo zimwakitage.”
Lwimbo lwa Musa.
30 Musa eimbile lwimbo luluno lunsania, gongwilide baIsraeli bansania bunee: