Busoga nu mponga kungwa basubya ku Yehowa.
30
1 Nu atendile lingo bunee: “Gamubasile bitondo bibino binsania, busoga nu biswililo binabika kumuli lelo, nu gamwabikengele munkatini mwa bilongo binsania byamupumbie mu Yehowa, Kalaga weinyu, 2 kungwa mwasubya ku Yehowa, Kalaga weinyu, inyuwe nu bana beinyu, nu kumwanza na mutima unsania nu kalenganio keinyu kansania, 3 nti Yehowa, Kalaga weinyu, agalukye bukobe bweinyu nu kumukwila kyombo, nu amusubye nu kumukundamania kutukila biziki binsania bimwabalanganibwe mubyo. 4 Ndi bamozi babalanganizibwe ku kuzinda kwa kisi, kutukila gago Yehowa, Kalaga weinyu, abakundamanie nu kubasubya. 5 Nu amubasie lingo ku kisi kiyanine basoinyuwe buno mukiyane. Mukyo amukitile busoga nunse nu kumwitizia kutinga basoinyuwe. 6 Nu Yehowa, Kalaga weinyu, amonesie mitima zeinyu, nu mutima wa kibuti kyeinyu, buno mwatunde Yehowa, Kalaga weinyu, tugu, na mutima weinyu unsania nu na bumenyinino bunsania, buno mulame. 7 Nu Yehowa, Kalaga weinyu, abike biswililo bibino binsania ga beiti beinyu, bamusombile nu kumubabazia. 8 Mwanze iyuki lya Yehowa, nu kulanga makakizio mage mansania manamukakizia lelo. 9 Nu Yehowa, Kalaga weinyu, amwitizie na busoga ku milimo insania zimukukitaga, nu mu ibuta lyeinyu, nu mu ibuta lya bituganwa byeinu nu ku matubulo ma kunaga kwa kisi kyeinyu, kubuno Yehowa amubogelebogele nu kumwitizia busoga, anga bwabogedebogede basoinyuwe, 10 kungwa mwanza iyuki lya Yehowa, Kalaga weinyu, na mutima weinyu unsania nu na bumenyinino bunsania. 11 Makakizio mamano mankumukakizia lelo tameli mabibu kumuli, nu tameli bulazi n'inyu. 12 Tameli kwigulu buno munatenda bunee: ‘Nazi wabakame kwigulu kututolela mo nu kumasambala buno tumanze?’ 13 Nu lingo, tameli ku lisilya lya kitatenge kinene buno mutende bunee: ‘Nazi wasoke kitatenge kumatola nu kutusambalilamo buno tumongwilile nu kumakita?’ 14 Tondo iyuki lili bwigi nunse. Lili mu tunua tweinyu nu mu mitima zeinyu buno mulikite.
15 Kengelazi buno nkubika lelo lwabusio lweinyu, ku lulenge lumozi kalamo nu busoga, nu ku lungo lulenge lukuo nu bubi, 16 kubuno nkumukakizia lelo kutunda Yehowa, Kalaga weinyu, nu kwenda mu nzila zage nu kukita makakizio mage nu milembe nu nsungio zage. Ndi mwakita bubo, nti mwalame nu kwitila, nu Yehowa, Kalaga weinyu, amukase mponga mu kisi kimukwingila mukyo kukiyana. 17 Tondo ndi mitima zeinyu zagaluka, nu tamwaziga kwanza, nu mwalutwa kukumbamina tungo tulaga nu kutukitila, 18 nkumusambalila lelo buno lebelebe mwazike, nu tamwikale bindi byingi mu kisi kimukwingila mukyo nu kukiyana, gamukusoka Yordani. 19 Lelo nkumana babo beli kwigulu nu babo beli ga kisi bamulongekele, buno nkubika lwabusio lweinyu kalamo nu lukuo, busoga nu kiswililo. Ububo sombolazi kalamo; mulame inyuwe nu bana beinyu, 20 nu kutunda Yehowa, Kalaga weinyu, nu kwanza iyuki lyage nu kugomia nage, kubuno Yehowa eli kalamo keinyu nu amukase bindi byingi bya kwikala mu kisi kyalagile kukasa ku basoinyuwe, Abrahamu, nu Isaka nu Yakobo.”