Idagano lyatendwa lingo.
29
1 Mamano meli malagano makakizizie Yehowa ku Musa kukita na baIsraeli mu kisi kya Moabu, kutinga malagano maakitile nabo ku mwiduko wa Horebu. 2 Musa amanine baIsraeli bansania nu ababwide bunee: “Mwamonine bunsania bwakitile Yehowa lwabusio lweinyu mu kisi kya Misri, buni bwakitide Farao, nu bakiti bage bansania, nu kisi kyage kinsania. 3 Mwamonine ku zezo mbabazio nnene, nu tulolesio nu miganogano. 4 Tondo aaba nu lelo Yehowa ntamukasile mutima wa kumenya, aba meiso ma kumona, aba matuzi ma kungwa. 5 Namusondelezizie mu kalula myaka makumi manazi, nu nsulu zeinyu tazakungukile nu bisalapata byeinu tabyakungukile. 6 Tamwalide kampampa, aba tamwanune maku m'ituba aba makali magaga. Namukitilaga bitondo bibino buno mumenye buno Nne nili Yehowa, Kalaga weinyu. 7 Gamwavule mu kikino kiziki, Sihoni u mukota wa ku Hesiboni nu Ogi u mukota wa Basani batubaside na bita, nu iswe twabakindile. 8 Twakatile kisi kyabo, nu twakikasile kuba bwiyani ku baRubeni nu ku baGadi nu ku kyindi kimozi kya bibili kya kikanga kya baManase.
9 Idangazi mu malagano mamano nu kumakita, buno mube na busoga mu binsania bimwakite. 10 Lelo inyuwe bansania mwemana lwabusio lwa Yehowa, Kalaga weinyu, u bakota nu mitonge za bikanga byeinyu, bakulu nu basondelezia beinyu, nu bamulume bansania ba baIsraeli, 11 gamozi na bana beinyu nu bakikulu beinyu, nu lingo bageni beli mu ido lyeinyu, u babo bakusena misali nu kumutagila mazi. 12 Mukwemana gano buno mwingile mu idagano na Yehowa, Kalaga weinyu, u kilumbilo kikukita Yehowa, Kalaga weinyu, gamozi n'inyu lelo. 13 Akutenda lelo buno muli kilongo kyage, nu We eli Kalaga weinyu anga bwamulagile, nu anga bwalagile basoinyuwe, Abrahamu, nu Isaka nu Yakobo. 14 Tondo nsikukita idagano lilino nu kilumbilo kikino n'inyuwe tugu, 15 inyuwe bakwemana n'iswe lwabusio lwa Yehowa, Kalaga weitu, tondo nkubikita lingo na babo batakwemana n'iswe lelo.
16 Mwizi lukita lutwikalaga mu Misri nu buni butwatingile mu bilongo bitwendile mubyo na magulu kubasa gano. 17 Mwamonine ku nkisi zabo, za miti nu za makozi, nu za feza nu za olo. Nkisi zezo zasombwa nunsania. 18 Mwikokomezia nunse buno munkatini mweinyu tamwabe wamulume umozi aba mukikulu umozi, aba kikanga kikeke aba kinene kimozi, kikugaluka mu mitima kusiga Yehowa, Kalaga weiyu, nu kukitila tulaga twa bilongo. Idangazi buno takwabe munkatini mweinyu kangonongono kakulusia lubaba anga kaabi.
19 Wozo muntu ukukengela bubo, gaakungwa ku bitondo bya lilino idagano, eikase mponga nu kwitenda mu mutima wage bunee: ‘Nabe na busoga nu bubobelelo gankwenda mu ngini zane,’ tondo bukulusia kuzikya banuzi nu batakunua. 20 Yehowa ntamusigilile, tondo bongoa bwa Yehowa nu lugi lwage byabe kweli. Biswililo binsania byasanzilwe mu mukanda wono byabe kweli, nu Yehowa azimie izina lyage ga kisi. 21 Yehowa amulekanukye na bikanga binsania bya baIsraeli buno amuzikye, anga buli biswililo binsania by'idagano lyasanzilwe mu wono mukanda wa milembe.
22 Bana ba bibuti byeinu babutwe kumbusa kweinyu, nu bageni batuke mu kisi kili bulazi n'inyu bamone ku nsungio za kisi kikino nu nsambo zasingile Yehowa kukisungia nazo. 23 Kisi kinsania kyabe kibiliti nu munkange. Takyayikwe mu mbuto, nu takwase nsamba aba kisugu mukyo. Kyazike nunsania anga kuzika kwa Sodoma nu Gomora nu Adima nu Zeboimu, zazikizye Yehowa mu bongoa bwage bukali. 24 Nu bilongo binsania byatende bunee: ‘Kubuni Yehowa akitide kisi kikino bubuno? Bwisulilwa bukizi bwa bongoa bubuno bukali?’
25 Nu bantu banakula bunee: ‘Bantu babano basigile idagano lya Yehowa, Kalaga wa beisibo, lyakitile na bo, gaabatikizye mu kisi kya Misri. 26 Kubuno bendile nu kukitila tungo tulaga nu kutukumbamina, u tulaga tubatamenyine, nu tuntabakasile. 27 Ububo bongoa bwa Yehowa bwabede ku kisi kikino, buno akilusizie biswililo binsania byasanzilwe mu mukanda wono. 28 Mu bongoa bukali nu lubaba lunene, Yehowa abeimbizie mu kisi kyabo nu ababalanganizie mu kingo kisi anga buli lelo.’
29 Tukungu tunsania tuli twa Yehowa, Kalaga weitu, tondo bibyo byalolesibwa bili byeitu nu bya bana beitu ku milyalya, buno tukite binsania bya milembe zeno.”