Yakobo agela ku Misri.
46
1 Israeli alingile lugendo nu endile na binsania byage. Gaabasile ku Beri-Seba akasenne tuyulo ku Kalaga w'isi Isaka. 2 Nu Kalaga amubwide, mu ndozi mu kindi bunee: “Yakobo, Yakobo.” Israeli akwide bunee: “Nne wono.”
3 Kalaga amubwide bunee: “Nne nili Kalaga wa so. Nu uwe ntukue boba kwenda ku Misri, kubuno mu kisi kikyo nkakukitila buno ube kilongo kinene. 4 Nkugela nobe ku Misri, nu lebelebe nkakusubya lingo kuno. Yosefu abe gamozi nobe gawakue.”
5 Yakobo atukile Beri-Seba, nu basikila baIsraeli bekile Yakobo, isibo, nu bakikulu babo nu bana babo mu tuyanga twasingile Farao kubeka. 6 Bendile na bituganwa byabo binsania nu ntiko zabo insania zibakatile mu kisi kya Kanana. Yakobo endile ku Misri na kikanga kyage kinsania, 7 bana baabutile nu bayukulu bage bansania, bamulume nu bakikulu.
8 Meina ma bansania bendile ku Misri meli: Rubeni, u nkula zage, 9 na bana bage Hanoki, nu Palu, nu Hezironi, nu Karmi; 10 nu Simeoni na bana bage u Yemueli, Yamini, Ohadi, Yakini, Zohari nu Sauli u mwana wa mukikulu muKanana; 11 nu Lawi na bana bage u Gersoni, nu Kohati, nu Merari; 12 nu Yuda na bana bage u Eri, Onani, nu Sela, Perezi nu Zera, tondo Eri nu Onanu bakule mu kisi kya Kanana. Nu lingo bana ba Perezi babezaga Hezironi nu Hamuli, nu bendile n'isibo ku Misri; 13 nu Isakari na bana bage u Tola, Puwa, Yasubu, nu Simuroni; 14 nu Zebuluni na bana bage u Seredi, Eloni nu Yaleli. 15 Lea mukazi wa Yakobo abutile babo mutuba mu kisi kya Padani-Aramu, gamozi na mukinga wage Dina. Maganzo ma bana nu bayukulu ba Lea mabezaga makumi masatu nu basatu.
16 Gadi nu bana bage u Sefoni nu Hagi, Eziboni, Eri, Arodi nu Areli; 17 nu Aseri na bana bage u Imuna, Isiwa, Isiwi, Beria, nu mubitu wabo Sera. Bana ba Beria babezaga Heberi nu Malkieli. 18 Babano beli bana nu bayukulu ba Zilpa wozo mukiti wakasile Labani ku Lea. Abede mukazi wa Yakobo nu abutile bana. Maganzo ma bana bage nu bayukulu meli bantu ikumi nu mutuba.
19 Bana ba Rakeli mukazi wa Yakobo u Yosefu nu Benjamina. 20 Ku Misri, Yosefu nu mukikulu wage Asenati, mukinga wa Potifera, sankoga wa ku Oni, babutile Manase nu Efuraimu. 21 Bana ba Benjamina u Bela, Bekeri, Asibeli, Gera, Namani, Ehi, Rosi, Mupimu, Hupimu, nu Ardi. 22 Babano beli bana nu bayukulu ba Rakeli, nu maganzo mabo meli ikumi nu banazi.
23 Nu mwana wa Dani u Husimu, 24 Nu bana ba Nafutali u Yazieli, Guni, Yezeri nu Silemu. 25 Babano beli bana nu bayukulu ba Biliha, wozo mukiti wakasile Labani ku Rakeli. Maganzo mabo mabezaga mutubakamo.
26 Maganzo ma kikanga kinsania kya Yakobo bagelile nage ku Misri mabezaga bantu makumi mutuba nu mutuba, tondo kutaganza bakamwana bage. 27 Nu Yosefu abutile bana babili ku Misri. Ububo maganzo ma bansania ba numba za Yakobo bendile ku Misri mabezaga makumi mutubakamo.
28 Yakobo asingile Yuda lwabusio lwabo kubakama ku lulenge lwa kisi lwamanagwa Goseni. 29 Gababasile ku Goseni, Yosefu alongekile lugendo lwa kwenda ku Goseni mu kayanga kage buno asekele isi. Gavule Yosefu kumonana n'isi, bemenne nu kulila nkungu ndazi. 30 Yakobo abwide Yosefu bunee: “Nili kayikayika kukua kubuno nnenyene nakumonako nu namenya buno ukilama.”
31 Yosefu abwide mibuto zage nu ku bansania ba numba z'isi bunee: “Nkwenda kuli Farao kumutendela kweli. Nkumutenda bunee: ‘Mibuto zane, u kikanga kinsania kya tatane, balamaga mu kisi kya Kanana, bavule kundi. 32 Bamulume beli balangi ba mikoko, nu beli na mpene nu mikoko. Bavule kuno nazo, nu lingo na binsania byabo.’ 33 Gakumumana Farao nu kumubuzia bunee: ‘Mulimo weinyu guli mukizi?’ 34 nti mwamwakula bunee: ‘Kutukila bwana bweitu beiswe bakiti bobe tukulangaga bituganwa, anga bwakitile batateiswe.’ Nu aneitabizia mwikale mu kibe kya kisi kikumanwa Goseni, kubuno baMisri bakusombaga balangi ba mikoko.”