Kituma kya feza mu nsago.
44
1 Kumbusa kwa kubalisia, Yosefu akakizizie mwangati wa numba zage bunee: “Izazia nsago za muntu na muntu na mbuto anga bwavwame kweka, nu bika feza za muntu na muntu mu nsago zage. 2 Nu bika kituma kyane kya feza mu nsago za malibilo gamozi na feza zage nu z'idia.” Akitile anga bwakakizizie Yosefu. 3 Gakede busi benzizie babo bantu gamozi na mpunda zabo. 4 Gababezaga tabeba bulazi na mwino, Yosefu atendile mwangati wa numba zage bunee: “Zanzuka, uyange babo bantu nu ndi wabasanga, batende bunee: ‘Kubuni mwasubizie bubi ku busoga?’ 5 Ndi kikyo kituma takili kya mukota wane kyakunwinaga mukyo nu kulagulila mukyo? Mwamwagila mu kukita bubuno.” 6 Gaabasangile mu nzila, ababwide moki mamukakizizie Yosefu. 7 Tondo bamwakwide bunee: “Kubuni mukota weitu akutubula bitondo anga bibino? Bakiti bobe tabanakita bwagi anga bubo aba kakeke. 8 Gatwatukile kweitu, lebelebe twavule na feza zitwamonine mu nsago zeitu. Su, buni butuneiba feza aba olo mu numba za mukota wobe? 9 Ndi kuli umozi munkatini mweitu uli na kituma kya mukota wobe, nti akue, nu iswe bango bansania nti twabe bakobe ba mukota weitu.”
10 Abakwide bunee: “Busoga bubo. Bube anga bumwatenda. Unsania uli nakyo nti abe mukobe wane, tondo bango tababe na katati aba bwagi.” 11 Ukinsa na muntu na muntu akandwide nsago zage ku mpunda, nu bazigezizie gansi nu kuzikandula balonde kituma kya Yosefu. 12 Mwangati alingile kukilonda mu nsago za nkula, nu alolile mu nsago za muntu na muntu anga bwabezaga kubutwa kwabo, aaba nu ku nsago za malibilo. Kituma kyamonekile mu nsago za Benjamina. 13 Batile nsulu zabo ku kabamba ka kabebe nu bakandile nsago zabo ku mpunda nu basubizie ku mwino.
14 Yuda nu mibuto zage babasile ku numba za Yosefu gaabezaga eikili ko. Bakumbaminne lwabusio lwage. 15 Yosefu ababwide bunee: “Buni bumwanagide? Ndi tamwizi buno muntu anga nne anavwama kulagula?”
16 Yuda amwakwide bunee: “Buni butunakwakula? Buni butunabula mukota weitu? Buni butuneibingia? Kalaga amenyesizie bwagi bweitu. Kano kaluma tuli bakobe ba mukota weitu, iswe bansania nu wozo wamonekile na kituma.”
17 Tondo Yosefu akwide bunee: “Kikyo kibe bulazi na nne! Tugu wozo wamonekile na kituma, we u wabe mukobe wane, nu inyuwe bango bansania mwendazi kuli soinyuwe mu bubobelelo.”
18 Yuda asigelede ku Yosefu nu amubwide bunee: “Tatane, ndi watunda, mukobe wobe atende moki mamozi ku mukota wane. Uli munene anga Farao, tondo ntwongoe na mukobe wobe. 19 Mukota wane abuzizie bakobe bobe bunee: ‘Ndi muli n'ungo mubuto? Ndi soinyuwe eikiligo?’ 20 Nu twakwide bunee: ‘Tuli na mukungu wa tateiswe nu tuli na malibilo waabutile ku bukungu bwage. Mubuto wage akule kalazi, nu we wenyene asigala ku bana ba nina. Isi akumutunda nunse.’ 21 Nu watukakizizie kuvwa na muto weitu buno umumoneko, 22 nu twakutondile bunee: ‘Tatunavwama kuvwa nage kubuno we ntanasiga isi. Ndi asiga isi, nti isi akua.’ 23 Tondo watubwide bunee: ‘Ndi tamwavwa na wozo muto weinyu, nti tamunammonako lingo.’ 24 Nu twasubanizie kuli tateiswe nu kumubula buni bwatutendile mukota weitu.
25 Tateiswe atukakizizie bunee: ‘Endazi kutukunzila lingo idia.’ 26 Twamwakwide bunee: ‘Tatunenda, ndi malibilo ntenda n'iswe, kubuno mukota wa kisi atubwide bunee: “Tamukammonako ndi malibilo nteli gamozi n'inyu.”’ 27 Nu tateiswe atubwide bunee: ‘Mwizi buno mukazi wane Rakeli abutile bana babili tugu. 28 Umozi wabo endile, nu nakengede buno alibilwe na nyama nu nsyamumonine ko lingo aaba nu lelo. 29 Ndi mwantikya malibilo mane nu lukuo lwabasa kweli, nti mwagezie mbwe zane na kabebe kanene mu nsinda.’
30 Nu kano kaluma, ndi musikila nteli n'iswe mu nkungu za kusubania ku tatane, nti akue, kubuno kalamo ka tatane keli mu mwana wage, 31 nu ndi ntamumonako, nti akue lebelebe. Bakobe bobe bagezie tateiswe mu bukungu bwage ku nsinda na kabebe. 32 Nne, mukobe wobe, nalagile buno nasubanie musikila bulonge bukata kuli tatane. Namutendile bunee: ‘Ndi nsyasubania nage kuguli, nti nabe na bwagi nu katati kabe mu kalamo kane kansania.’ 33 Kano kaluma, nkukusega mukota wane, nitabizie buno nne, nisigale gano anga mukobe wobe mu kiziki kya musikila, nu musikila asubanie kuli isi gamozi na mibuto zage. 34 Buni buninasubania ku tatane geteli musikila? Kilo! Nsikutunda namona ku kabebe kanene kabe ku tatane.”