Mibuto za Yosefu zenda lingo ku Misri.
43
1 Nzala zitide mu kisi. 2 Ububo gabalide idia linsania libakunzile ku Misri, isibo Yakobo ababwide lingo bunee: “Subyazi lingo kutukunzila idia.” 3 Tondo Yuda amwakwide bunee: “Wozo mukota wa kisi atwanine nunse bunee: ‘Ndi muto weinyu nteli n'inyuwe, nti tamukamona meiso mane.’ 4 Ndi wasinga muto weitu n'iswe, nti tunagela ko nu kukunza idia lyobe. 5 Tondo ndi ntwamusinga n'iswe, nti tatunenda ko, kubuno muntu wa kisi atubwide bunee: ‘Ndi malibilo nteli n'inyuwe, nti tatwamumoneko.’”
6 Israeli abuzizie bunee: “Kubuni mwanitizie na kabebe kakano mu kubula wozo muntu buno muli n'ungo muto weinyu?”
7 Bamwakwide bunee: “Wozo muntu atubuzizie lebelebe ku kitondo kya kikanga nu bitondo byeitu. Atubuzizie bunee: ‘Ndi soinyuwe eikili alama? Ndi muli n'ungo muto?’ nu iswe twakwide tugu ku mbuzio zage. Buni butunamenyine buno atukakizie bunee: ‘Vwazi na muto weinyu?’”
8 Yuda abwide lingo isi bunee: “Singa musikila na nne nu twasasie kwenda, buno uwe nu iswe nu bana beitu tulame nu kutakua. 9 Nnenyene nkukulaga lebelebe buno namusubye bulonge bukata. Bika katati ka kalamo kage kundi. Ndi nsyamusubye nu kumubika lwabusio lwobe, nti nkeeka katati lwabusio lwobe ku kalamo kane kansania. 10 Songo tatwasigala gano, songo twasubanizie kalazi mambizi mabili.”
11 Israeli, isibo, ababwide bunee: “Ndi bubo, kasi kitazi bubuno: Tolazi bibyo bili bisoga bya kisi kikino, manemane makeke, nu buuki, nu bya kuswagia idia, nu bulago, nu biguma bya miti anga batani nu lozi. Mwende nabyo nu kubikasana anga lukaso ku wozo muntu, mukota wa kisi. 12 Tolazi feza mambizi mabili ma limbizi litangi, kubuno mwatunganana kuzisubania ku wozo muntu feza zabezaga mu nsago zeinyu. Embe batingilwe tugu. 13 Tolazi muto weinyu nu mwendazi ku wozo muntu kano kaluma. 14 Nu Kalaga Mwiya Mayombo, a amukitile mponga ku wozo muntu buno azige kusubya Benjamina kundi nu wozo uli kuko. Tondo kundi, ndi kukwilwa na bana nti nakwilwa nabo.”
15 Batolile nkaso zabo, nu feza mambizi mabili ma bukunza bw'idia nu bendile gamozi na Benjamina. Basasizie kwenda ku Misri nu babasile lwabusio lwa Yosefu. 16 Gamonine Yosefu ku Benjamina gamozi nabo, abwide mwangati wa numba zage bunee: “Enda na babano bantu ku numba zane. Sesa mukoko aba ngombe nu yika zo gamozi na lingo idia. Anza meza, kubuno batunganana kulia na nne ku makuluka.” 17 Mwangati akitile anga bwamubwide Yosefu. Endile na babo bantu ku numba za Yosefu.
18 Gabamonine buno benda ku numba za Yosefu, bakule boba. Bakengede bunee: “Bavule n'iswe gano ku kabamba ka feza zibabikile mu nsago zeitu limbizi litangi. Bakutunda kutuyukila nu kutukinda buno tube bakiti bage nu kukata mpunda zeitu.” 19 Ububo bakundile mwangati wa numba za Yosefu ku mwingilo wa numba nu bamubwide bunee: 20 “Tateiswe, twavule gano limbizi litangi kukunza idia lyeitu. 21 Tondo gatwabezaga tuse twasubania kweitu, twakandwide nsago ku ido itangi nu iswe bansania twamonine ku feza zage gantata g'idia, nawe nawe anga bwaligile idia. Tondo twasubanizie na feza zezo. 22 Nu twavule n'ingo feza buno twakunze idia nazo. Tatwizi nazi wabikile feza zeitu mu nsago.”
23 Mwangati abakwide bunee: “Ta kitondo. Tamukue boba. Kalaga weinyu, u Kalaga wa soinyuwe, amukasile ntiko mu nsago zeinyu. Nabezagile na feza zeinyu.” Nu akandwide Simeoni nu avule nage kubeli.
24 Abeingizizie mu numba za Yosefu, nu kubakasa mazi ma koga ku masindi, nu alisizie mpunda zabo nu kuzinusia mazi. Abatendile bunee: “Mwalie gano na mukota wane ku makuluka.” 25 Ku kabamba kako balongekile nkaso zabo buno kungwa abasa ku makuluka, nti bamukasa zo. 26 Gavule Yosefu bakumbaminne gansi lwabusio lwage nu kumukasa nkaso zabo. 27 Yosefu ababuzizie bunee: “Misagu mikizi? Ndi mukungu wa soinyuwe wozo u mwantendaga ndi eli na magala? Ndi eikili alama?”
28 Bakwide bunee: “Mukiti wobe tateiswe eikili alama nu eli na magala,” nu bakumbaminne lingo lwabusio lwage.
29 Yosefu amonine ku Benjamina, muto wage, wabutile nina nu abuzizie bunee: “Ndi wono u muto weinyu u mwatendaga?” Nu abwide Benjamina bunee: “Mwana wane, Kalaga akukase mponga nunse.” 30 Mutima wa Yosefu watutaga gaamonine ku muto wage, nu atukile lubilo mu busio mubabezaga buno alile. Endile ku busio bwage bwa kwiyombeka, nu mumo alilile. 31 Kumbusa, ogile ku meiso nu kusubania kubeli, ku kyage kya kulia. Eikandile nu ntalilile lingo, nu akakizizie buno bakiti bavwe n'idia. 32 Yosefu eikalaga ga mage meza nu mibuto zage ga mango meza nu baMisri baliaga nu bo ga mango meza kubuno baMisri bakengede buno kulia na baEbrania ga meza emozi buli kitampo. 33 Mibuto za Yosefu zikalaga ga meza mabo kulolana na Yosefu. Baganineganine bwabeikazizie bulingilingi na kubutwa kwabo, kulinga na nkula aaba nu ku malibilo. 34 Idia linsania lyabezaga ga meza ma Yosefu, alisingile ku muntu na muntu tondo asingide Benjamina mambizi matano kutinga bango bansania. Balide nu kunua gamozi nage nu bembukile.